Đắc Nông lac sa dalam dom tỉnh hu ralo urang ngak mai ngak bruk di bal rayo HCM, dalam nan hu urang ngak lac uranaih. Gah chức năng di tỉnh ini yau Sở Lao động- Thương binh- Xã hội (LĐTBXH), Công an hu pambuak bruk catang piah khik iek, duah mboh samar urang ngak lac uranaih (umo ala 14 thun) hu ba trun bal raya. Bilan 4/2018, báo Nhân Dân saong Sở LĐTBXH Đắc Nông hu duah mboh sa kapul uranaih kamei lac urang bangsa takik hu ba trun bal raya  HCM ngak bruk, samar pacang cakak saong bilan 7/2018 hu ba dom adei nao veik palei. Bruk ini hu gah Đắc Nông payua harak ka Sở LĐTBXH TPHCM min tok lac harak văn bản akaok mereip, yau harak khan brei thau.

Anak meta mboh lac, hu bruk pambuak gauk di dom tỉnh haong bal raya HCM dalam langyah bruk urang ngak lac uranaih, min bruk pambuak gauk ini oh ka catang. Thun ini, Đắc Nông brei thau lac hu 54 uranaih hu ba trun bal raya HCM ngak bruk suan adat hukum. Min pak bal raya HCM, ta-eng bruk kuhria iek hadom uranaih trun mai jeng oh ka ngak hu. Makna di nyu lac kayua bal raya biak prong, kan thau hu cambaih dom labik pandar urang ngak, urang ngak lac uranaih meng labik ini tapa labik diah, labik pandar urang ngak lac uraniah duah ginup jalan piah plaih adat hukum.

Amuk Trần Thị Kim Thanh, Akaok Jabat khik caga, iek glang uranaih saong likei kumei samu gauk, Sở LĐTBXH TPHCM ndom lac: Ini lac sa cuang kandah dalam bruk pambuak gauk. Khaol drei klah rabha jalan pambuak pagam, klah rabha thông tin yau habar tuk hu bruk rah tabiak. Dahlak caong dom tỉnh meyaih hu uranaih nao ngak bruk bo dom tỉnh hu thau ye khan brei khaol dahlak thau piah ba gauk langyah. Tui nan, bal raya HCM hu bruk pambuak tal uranaih ye khaol dahlak jeng khan brei dom tỉnh thau piah daong ka khaol dahlak.

Tui ong Nguyễn Duy Tuyết, Akaok Jabat khik caga, iek glang uranaih, Sở LĐTBXH Đắc Lắc ye bruk urang ngak lac uranaih njauk hu pacang cakak meng gha, nan lac meng di yaok baoh sang, puk palei labik hu dom adei daok. Gah công an njauk ngak catang jang, abih di nyu nan lac thau cambaih bruk, saong langyah. Đắc Lắc urak ini hu jaik 200 adei daok ngak bruk di bal raya HCM min oh thau nyu daok ngak pak halei: Dalam dom angan khaol dahlak thau jeng daok di bal raya HCM min cambaih laih daok pak halei ye oh thau hu. Bo taom gaok ye urang jakar gah hành chính yau khaol dahlak ngak biak kan. Yau nan ye piah ngak hu bruk ini saong pambuak bruk khang kajap ye oh ta-eng hagait gah công an hình sự bo công an hành chính khik iek hộ khẩu, tạm trú tạm vắng jeng njauk pasang iek ka nyu catang.

Yau nan, dalam taong abih dom jalan meda ngak hu piah pacang caga, langyah bruk urang ngak lac uraniah di bal raya HCM jeng yau dalam negar, bruk njauk ngak di abih urak ini lac bruk pambuak gauk catang di dom tỉnh bal haong gauk saong gah chức năng hu pambuak pagam tal yau công an. Ngak habar piah pacang cakak meng gha bruk urang ngak lac uranaih, oh yau nan piah tal tuk rah tabiak bruk ngak suan adat hukum. Đại tá Phan Mạnh Trường, Phaok Cục trưởng Cục Cảnh sát Hình sự, Bộ Công an ndom lac: Urang ngak lac uranaih oh ka njauk lac ngak suan hukum gah hình sự. Tok tuk halei uranaih njauk pachot, kateik greik, pablei salih… jeng sa tội halei nan ka meng hu jeng tội phạm hình sự. Daok dom bruk ini gah công an njauk pambuak haong karja palei, gah LĐTBXH piah patrun patakik di abih bruk urang ngak lac uranaih.

        Urang ngak lac uranaih di bal raya HCM hu meng lavik mai, mboh yau daok jeng jalan talei môi giới, mbuan ba tal xâm hại, bóc lột pren ngak bruk, mbuan ba tal bruk pablei salih manuac urang. Ong Đặng Hoa Nam, Akaok Cục Uranaih, Bộ LĐTBXH lac: Bruk uranaih mai saong ngak bruk di bal raya HCM jeng daok  lac bruk kan pasang iek saong takik ralo daok having akaok dalam langyah, dalam jalan pambuak bruk di bal raya saong dom palei hu ralo uranaih mai bal raya HCM kayua jalan ngak ini oh ka cambaih laih, oh ka gam gam peih ngak. Bruk having akaok, oh ka hu jalan ngak cambaih laih ini oh lac kayua bal raya HCM bo daok kayua jalan pambuak bruk haong gauk.

Tapa duah thau pakat negar ka urang ngak lac uranaih thun 2012 mboh lac, di bal raya HCM hu labaih 80 ribau uranaih umo meng 14-17 thun hu mbaok tame bruk ngak mbang kinh tế, dalam nan hu labaih 44 ribau urang ngak lac uranaih. Piah langyah bruk ini, bal raya njauk hu dom jalan ngak catang jang; khang jang; hu jalan pambuak bruk haong dom puk palei ka bruk di cư urang ngak tự do, dalam nan hu uranaih mai bal raya daok rah tabiak dak harei dak ralo, ba tui ralo kadha oh siam./.