Mesup ini 9/9, mban Thường trực UBMT negar Việt Nam ban raya HCM – Mban jak ba, taduan mek saong parabha Kadung jien pacang caga jit Covid-19 TPHCM peih bruk taduan mek saong jao brei jien, pandap mbang, pandap y tế ka Ủy ban Xã hội di Quốc hội payua brei dom jabat, dom sang iek ruak saong bhap bini TPHCM.  Pok daong hu: 1.500 pok pandap brei ka dom uraniah njauk ruak Covid-19 di Sang iek ruak Nhi đồng TPHCM, Sang iek ruak Nhi đồng 2 haong Sang iek ruak dã chiến ka 4 taong ruak Covid-19; 400 triệu đồng jien mbaok alin brei dom urang ngak gaok kan kandah, dom amaik ndih tapui anek njauk ruak Covid-19; 3 mac daong luai suan, 500 bộ khan ao y tế khik caga rup, 1.000 blah pataih pacang mbaok, 5.000 gai dut iek, 30 thung ia jru rao tangin haong 30 thung khẩu trang y tế.

Meng bruk caong hu vaccine klauk njauk tukvak piah pacang caga jit, harei 8/9/2021, kapul tacei jalan pandar vaccine di Mintri Y tế hu ginum biai saong ba tabiak panuac kakei lac: meyah vaccine Covid-19 klauk mbang 1 oh ginup piah klauk mbang 2, meda pandar vaccine karei piah klauk mbang 2. Tui nan, meyah klauk mbang 1 vaccine AstraZeneca, meda klauk mbang 2 vaccine Pfizer atau vaccine Moderna. Meyah mbang 1 klauk vaccine Moderna, meda klauk veik mbang 2  vaccine Pfizer, daok meyah mbang 1 klauk vaccine Pfizer, mbang 2 brei klauk vaccine Moderna.

Piah peih bruk daong brah ka anek saih (tui Sarak ka 116/2016/NĐ-CP di Rajaei), Tổng cục Khik piah Karja hu brei bruk ka 20 cục Khik piah Karja khu vực buh tabiak 37.743 tấn brah piah daong ka anek saih saong sang bac phổ thông di xã, palei biak kan kandah di 43 tỉnh, ban dalam học kỳ 1 thun bac 2021-2022. Tổng cục Khik piah Karja tacei brei ngak salah tal abih harei 31/12.

Mban khik ramik dom labik ngak kong Đồng Nai hu harak payua tal dom doanh nghiệp daok dalam dom labik ngak kong daok ngak tui bruk “3 di labik” samar tut angan klauk vaccine pacang COVID-19 ka urang ngak. Ini lac mbang klauk vaccine pacang COVID-19 ka 7 di tỉnh Đồng Nai saong dalam mbang ini hu 189 doanh nghiệp hu parabha brei vaccine piah klauk ka urang ngak. Dom vaccine hu parabha brei ka dom doanh nghiệp dalam mbang ini, lac jaik 22 rabau mbang saong jaik abih lac piah klauk ka mbang 1. Dom menuac ngak dalam labik ngak kong hu klauk vaccine pacang COVID-19 urak ini, hu labaih 33%.

Long An hu labaih 1.000 doanh nghiệp dalam tỉnh tut angan ngak bruk tui jalan “3 di labik”, dalam nan tỉnh hu pasang iek, taong yaom lac ginup prein ngak ka 408 doanh nghiệp gam haong 22.700 urang ngak. Min dalam tuk ngak bruk, hu 23 doanh nghiệp hu 675 F0 saong jaik abih dom doanh nghiệp brei padeih ngak. Biar harei kabroi, rilo doanh nghiệp “3 di labik” dalam tỉnh Long An hu panuac caong karja palei brei ka dom menuac ngak lac F0 abih ruak hu mai ngak bruk veik.

Gah Y tế dunya (WHO) sa mbang tra hu panuac ieu dom taneh ia brei padeih bruk klauk mbang patagok vaccine pacang COVID-19 angaok dunya tal puac thun ini, piah daong ka yaok taneh ia hu klauk brei ka takik di abih lac 40% menuac sia dalam taneh ia. Di akaok bilan 8, panuac ieu taong abih dom taneh ia angaok dunya brei padeih bruk klauk mbang vaccine patagok di WHO hu ba tabiak dalam tuk dom taneh ia daok peih bruk klauk mbang patagok vaccine pacang COVID-19 ka dom menuac hu klauk ginup 2 mbang, kayua huac vaccine oh ginup prein pacang biến thể Delta.

Harei 8/9, 1 kapal gilai praong hu tên lửa ba jalan di Mỹ tame jaik patau Vành Khăn daok njauk Trung Quốc meblah mek saong ngak labik quân sự suan hukum. Bruk nan rah tabiak 1 adit hadei di tuk Trung Quốc ba tabiak adat bahrau, ieu dom kapal gilai negar langiu 'pathau khan'.  Tui panuac khan hu ba tagok angaok blah web di Hạm đội 7 (Mỹ), bruk ngak di sruh kapal gilai praong USS Benfold vil val patau Vành Khăn lac sa binah di bruk khik kajap tự do pajeng ba nao mai angaok tasik Biển Đông. Patau Vành Khăn dalam pulao kaoh Trường Sa di Việt Nam lac 1 dalam dom labik praong abih njauk Trung Quốc meblah mek saong ramik ngak suan hukum.

Gah Pandap mbang saong ngak nong Liên hiệp quốc (ieu katut lac FAO) bahrau peih bruk ngak dunya ka patagok hijao dom kaya nong ngan saong kadha “Sa taneh ia sa pandap brei ngak dahlau”. Bruk ngak ini piah patagok dom yaom glaong hijao saong khang kajap ka dom kaya nong praong, daong ka urang ngak nong haong sang sit mek hu kein laba ginup di darak pasar dunya saong puac di abih lac daong salih dom kaya mbang urak ini piah mek hu dom bruk patagok khang kajap./.

Urang lang: M.Phuong – 9/9/2021