Hadei di 12 thun peih bruk daong yaom, bruk pajeng ba tuai damuai meng radaih buýt tagok 12 mbang, pabak hu 9,5% bruk nao mai di bhap bani. Urak ini yaok harei hu 17 ribau mbang radaih ngan haong jaik  6.000 urang peih radaih, urang pamere. Kuhria tal bilan 8/2018, bal raya hu 103/141 tuyến radaih buýt hu daong yaom ngan haong jaik 2.500 sruh radaih. Yaom jien daong yaom radaih buýt bo bal raya peih brei urak ini, lac jaik 1.000 tỷ đồng sa thun.

Yaom lac hu ralo jak jeng siam mekre, urak ini, sarak ini jeng hu ralo  kadha oh daok laghaih, njauk kuhri kuhria veik. Dalam tuk bo yaom radaih, yaom xăng menyek, jien bilan tagok glaong, manuac urang nao radaih buýt oh tagok rilo jang min bruk tabiak đơn giá, jalan kuhria jeng pandar tui dom adat klak oh daok laghaih. Kadha ini ba tal bruk ralo HTX pajeng ba ngak mbang oh hu, ralo doanh nghiệp pajeng ba oh daok hu jalan piah cakrok patagok. Ong Trần Thanh Tùng, xã viên gam lac urang peih radaih HTX Quyết Thắng, lac: Pok panuac tagok bal raya brei tapa bộ đơn giá định mức bahrau  ka nyu njauk haong bruk di anak meta, padanghatai jia khang kajap ka urang peih radaih, urang phục vụ, xã viên sahanang hatai ngak bruk. Taphia di nan hu patak pataom piah kak kajap haong bruk peih radaih buýt.

Tapa duah thau ka bruk njauk hatai di bhap bani di Viện Roh duah cakrok patagok bal raya HCM, dalam tukvak 2013 – 2016, radaih buýt oh tagok rilo jang min bruk njauk hatai di bhap bani tagok 16%... Bruk hu njauk hatai ralo di abih nan lac yaom harak vé (meblah 57%), langiu di nan daok hu tiện nghi angaok radaih saong bruk ndom puac di tài xế… Daok bruk oh njauk hatai di bhap bani ye dang akaok lac bruk an toàn, an ninh yau pataok oh njauk labik, nduac baik samar, vệ sinh di balai raok…Tui roh duah, yaom harak vé piah hòa vốn njauk lac 7.773 đồng sa tuai nao dalam tuk nan yaom harak vé urak ini tok 3.489 đồng sa tuai. Mai meng bruk daong yaom nan nyu dui pachreih biak prong manuac urang nao radaih buýt, abih di nyu lac dom urang ngak hu jien mek tame biar.

Ong Dư Phước Tân, Akaok Jabat roh duah khik iek đô thị, Viện roh duah patagok bal raya HCM caong gah pajeng ba njauk patagok dom gah bo bhap bani njauk hatai yau yaom harak vé, đẩu tư piah pachreih tuai damuai nao radaih buýt yau pagam wifi, pasiam veik bruk vệ sinh, an ninh an toàn; ba radaih buýt mini tame dalam dom tuyến jalan hẻm, roh duah patagok radaih juak công cộng saong abih di nyu lac njauk ngak catang jang brei patrun radaih cá nhân meng di tuk ini. Ong Dư Phước Tân lac: Dahal saneng lac khaol drei njauk ngak catang bruk pasang iek radaih cá nhân meng di tuk ini meyah oh ngak meng urak ini bo cang tal tuk hu metro nan biak kan. Khaol drei njauk ngak meng tuk ini ngan haong sa jalan ngak lagaih.

Bruk daong yaom radaih buýt, tuk ini daok gaok kan kandah prong nan lac daong yaom dalam 3 thun jaik di ini lac oh patagok bo daok trun. Jien daong yaom hu pandar siam jang min anak bruk caong salih bahrau radaih, peih ralo jang jalan tuyến ye mboh biak kan kandah. Urak ini radaih buýt di bal raya HCM pabak hu 9,5% bruk nao mai saong piah ngak hu bruk lac tal thun 2020 tagok jang dut haong urak ini jaik 200 – 220 tuyến pajeng ba tuai damuai ye njauk buh jien tabiak ngak takik abih 80 tuyến sa thun, dom radaih buýt tagok jaik 5.600 sruh. Saong yaom jien njauk caik ka gah pajeng ba tuai damuai công cộng meng daong yaom, blei radaih bahrau nan lac 11.500 tỷ đồng. Ong Bùi Xuân Cường, Akaok Sở Giao thông vận tải ndom lac: Khaol dahlak jeng hu pathau tagok UBND TP saong anak tal meda ba tabiak likau panuac HĐND ka đề án patagok giao thông công cộng saong pasang iek hatai caong khin piah hu loại hình giao thông công cộng salih karei saong meda pasang iek hu piah ka bhap bani salih meng radaih máy tapa radaih buýt. Caong khin HĐND, urang pal akaok bal raya sangka, saong bhap bani nao gam haong radaih buýt saong daok sangka tal bruk daong yaom.

Amuk Nguyễn Thị Quyết Tâm, akaok HĐND TPHCM jeng ndom lac HĐND TP halan hatian pasang iek tapa dom tanut daong yaom, ngak yau habar jien daong yaom ra diah buýt njauk hu pandar siam mekre:  Bruk oh njauk lac drei buh tabiak hadom jien meng kadung jien karja piah patagok giao thông công cộng. Bruk nan njauk ngak. Bruk lac ngak habar piah jien buh tabiak nyu mek hu siam mekre ye bhap banni meng chấp nhận hu kayua nan lac kadung jien karja. Nan lac kadha khaol drei njauk caik hatai sangka tuk pandar tal kadung jien karja. Meyah kein laba ye HĐND TP brei ngak.

Dalam tuk bo radaih buýt jeng daok hu labik dang praong di giao thông công cộng ye njauk di nyu, piah meda mek hu jalan ngak tal thun 2020 pajeng ba tuai damuai công cộng meblah 15-20% bruk nao mai di bhap bani, gah pajeng ba bo pak ini lac gah giao thông công cộng bal raya njauk ngak habar pandar hu kein laba yaom jien daong yaom radaih buýt saong pambuak pagam ralo jalan ngak karei di gauk di anak meta gaom haong suai lavik./.