Urang kathaot hu daong brei harak thể BHYT 

Daok di phường Tân Thành, quận Tân Phú, sang sa-ai Trương Thiên Phú hu mong yau kareih camin dalam bruk kham merat tabiak truh kathaot. Sang biak kan kandah, tuk bac đại học, sa-ai Phú hu mesre phun jien meng danak dak anek saih sinh viên di gilang pariak sarak karja quận 11 triệu đồng sa thun. Sa-ai Phú urak ini daok ngak bruk ka Hãng Kapar haok Vietnam Airlines. Daok amaik ame di Phú hu UBND phường Tân Phú daong brei mesre 100 triệu piah peih pablei bánh ướt anak sang, blei radaih patuh pajeng tuai, jien mek tame tani tanat. Sa-ai Trương Thiên Phú brei thau: Mesre hu dom phun jien meng danak dak sarak karja, amaik ame saong dahlak jeng kham merat jang. Ka sa lac bac megru ka nyu siam, kayua lac tok hu bac megru siam meng salih bahrau hu rai diuk; ka dua lac tuk hu phun jien pasiam veik bruk ngak, hu jalan ngak siam jangye jien mek tame jeng glaong jang.

Jeng meng hu phun jien mesre patrun kathaot, amuk Bùi Thị Hồng Điệp daok di huyện Bình Chánh peih hu quán trà sữa pak sang, hu jien mek tame tani tanat, kinh tế baoh sang dak harei dak salih bahrau biak rilo dut haong dahlau diah. Amuk Điệp khan lac: Thun 2015, dahlak hu mesre phun jien di Gilang pariak sarak karja 50 triệu đồng piah pasiam veik labik saong pablei salih aia giải khát. Meng phun jien nan, sang dahlak peih tiệm trà sữa. Thun 2017 dahlak ba-yar abih sre, tapa truh kathaot saong hu daong veik ka dom baoh sang kathaot di palei.

Piah ngak siam bruk patrun kathaot khang kajap, ye jalan ngak di Karja palei biak prong dalam bruk nao jaik, duah tabiak dom jalan ngak bahrau, hadah krah. Amuk Nguyễn Thị Hồng Vân, Phaok akaok UBND phường 11, quận 5 brei thau phường tuk halei jeng sangka tal dom baoh sang hu manuac urang ngak takik, urang mbang tui rilo, tacei labik ngak bruk laghaih piah ka dom urang nan gam ngak duah jien, gam hu tukvak piah iek glang tal dom urang  dalam sang: Tuk duah thau dom kan kandah di dom baoh sang ka bruk ngak, atau kan kandah ka phun jien ye ngan haong baoh sang daok ngak mbang pablei salih min kurang phun jien ye khaok dahlak tacei jalan piah ka dom baoh sang ini mere hu phun jien, yau ye phun jien ba brei bruk ngak piah pablei salih, pasiam radaih, daong ka dom baoh sang pasiam veik labik piah ngak mbang pablei salih, paglaong jien mek tame.

3 thun tapa, meng dom phun jien di kadung jien patruh eik patrun kathaot, phun jien di Gilang pariak Sarak karja, bal raya HCM hu daong brei mesre ka labaih 33.600 baoh sang kathaot, baoh sang jaik kathaot, baoh sang tapa tanut kathaot ngan haong phun jien brei mesre labaih 1.060 tỷ đồng. Meng dom siam lagaih di sarak ini, mikva hu rilo jalan ngak mbang piah yam tagok. Tui amuk Triệu Lệ Khánh, Phaok Chủ tịch Ủy ban Mặt trận Tổ quốc TPHCM, bruk duah thau cambaih laih dom gah daok kurang di baoh sang kathaot, jaik kathaot anak tal hu caik hatai jang, piah duah tabiak jalan daong ka nyu lagaih di abih: Mặt trận haong dom kapul nyaom  thành viên, Mban tacei pato patrun kathaot khang kajap meda duah thau cambaih  dom kadha daok kurang di baoh sang kathaot, baoh sang jaik kathaot, pagap yau kurang sang daok, y tế, bruk ngak… piah tapa nan hu dom jalan ngak ka nyu siam. Kadua nan lac pambuak pagam Mặt trận haong dom doanh nghiệp, chi bộ đảng, dom labik daong tapak ka dom baoh sang kathaot piah ka dom kadha daok kurang di dom baoh sang nan hu pabak samar drah.

Hu sa kadha bui sambai tra ka urang kathaot, nan lac danak dak patrun kathaot khang kajap di bal raya tukvak 2019 - 2020 meda patagok yaom jien brei mesre glaong abih meng 50 triệu đồng tagok 100 triệu đồng, patagok tukvak mesre meng 5 thun tagok 10 thun. Bruk patagok yaom jien mesre ini piah daong ka urang kathaot patagok bruk mesre hu phun jien, pabak bruk mesre jien piah ngak mbang pablei salih. Meng sarak bahrau ini, bruk bhap bani njuak nao mesre gah langiu meda patrun. Yau nan min, kan kandah di urak ini lac jeng daok hu dom menuac daok pagam pambak tame bruk daong di Karja, oh ka biak kham merat ngak mbang piah yam tapa kan kathaot. Nan ye langiu di bruk sangka daong brei, bruk pathau khan jak ba lac bruk biak praong, kayua lac tok hu hatai saneng yam tagok meng daong ka dom baoh sang kathaot, jaik kathaot tabiak truh kathaot khang kajap./.

Manuac lang: Jasi