Laik abih 3 hatai caong khin tame tal 10 công lập, Võ Nguyễn Khánh Linh, sa anek saih trung học cơ sở daok di quận Tân Bình mboh duh hatai, oh duah mboh jalan nao. Hu manuac urang dalam sang pachreih ba, Linh hu jeng anek saih hệ 9+ di Sang bac Cao đẳng dunya bal raya HCM. Hadei di sa thun tui bac, anaik saih kamei ini hu grap tanat jalan saneng bo daok hu jeng anek saih naih gheih dalam tal bac. Võ Nguyễn Khánh Linh bui sambai, lac: "Mô hình 9+ ini laghaih hu rilo kadha saong siam ka anek saih lahik căn bản, trak damak ka bruk bac saong daok having akaok di rilo gah yau adei. Trak damak bac megru ngan haong adei urak ini oh daok tra.”.

Mboh anek yam tapa hu kan kandah saong bac megru naih gheih, sa-ai Nguyễn Hồng Thắm, amaik anek saih Võ Nguyễn Khánh Linh thau drei palih ruah njauk jalan yaom lac dahlau di nan hu rilo urang ndom tame ndom tabiak tuk brei ka anek nao bac bruk ngak kayua sang kaya meda. Thei jeng lac njauk brei ka Linh bac ôn sa thun piah pakacah tame tal 10 công lập min sa-ai thau pren bac di anek drei oh truh nan ye khang hatai salih jalan. Sa-ai Nguyễn Hồng Thắm khan lac: “Xã hội urak ini daok ngak ka manuac sia drei saneng lac njauk hu bằng cấp bo var mong mboh hu kein laba bruk ngak di urang. Dalam tuk nan dahlak mboh bruk nan oh praong. Anek bac hagait tui dahlak sahneng jeng siam  meyah nyu njauk haong pren bac saong anekmboh chreih chai haong bruk bac megru. Dahlak mboh bruk gam bac ilamo gam bac bruk ngak nan biak siam. Siam di nyu lac patak pataom hu tukvak di anek.”

    Hu peih ngak meng thun 2018, tal ini, 2 tal bac tui mô hình 9+Cao đẳng di Sang bac Cao đẳng Dunya bal raya HCM hu labaih 70 anek saih. Trun tal 5 môn bac dut haong hệ thống trung học phổ thông, sang bac pandar tukvak nan piah pato bruk ngak saong pabak kỹ năng ka anek saih, abih di nyu lac sap negar langiu. Langiu di nan, anek saih hu sa thun  piah trải nghiệm blaoh meng palih ruah bruk ngak piah plaih bruk palih ruah tui cảm tính. Tui Thạc sĩ Nguyễn Đăng Lý, Hiệu trưởng sang bac, kadha bui sambai nan lac dak harei dak hu rilo anek saih sangka tal mô hình ini oh daok mong njul yau dahlau diah: “Biak kan dalam bruk parabha thời khóa biểu ka anek saih. Khaol dahlak iew nan lac sa nghệ thuật. Ngak yau habar gru pato ilamo saong gru pato bruk ngak njauk pambuak bruk haong gauk ka nyu siam, lagaih piah daong ka anek saih oh trak damak min jeng ginup asal kadha piah mek chứng nhận tốt nghiệp Trung học phổ thông hadei di 3 thun saong hu bruk ngak dalam tangin, bằng Cao đẳng hadei di 3 thun meteh.”.

     Ba tabiak tal 3 janih lac 9+2, 9+3 saong 9+5 ka urang bac palih ruah tui pren bac, hatai caong khin saong điều kiện, Sang bac Cao đẳng Công nghệ Thủ Đức urak ini hu labaih 950 sinh viên tui bac mô hình ini. Thạc sĩ Nguyễn Thị Lý, Akaok sang bac brei thau bruk palih ruah tuyển sinh pakat bac ini dak harei dak siam jang tuk urang ngak amaik ngak ame hu thau cambaih saong anek saih hu jalan mong iek siam jang ka bruk palih ruah ngành nghề. Kadha ini peih tabiak jalan nao bahrau ka pato pakai bruk ngak dalam tuk meriak gauk biak catang yau urak ini. Mô hình 9+ daok daong ka rilo anek saih patak pataom hu tukvak, jien padai bac megru: "Bac tamat trung học cơ sở tame bac trung cấp ye dom anek saih oh abih jien đóng học phí. Yau nan min tui dahlak bruk oh mek jien bac oh njauk lac siam di abih. Kadha di ini nan lac mô hình njauk haong pren khang di urang bac. Meyah bac siam, urang bac meda liên thông tagok cao đẳng hadei di  5 thun. Yau nan, meyah bac cao đẳng blaoh ye jalan patagok dalam bruk ngak di dom adei jeng siam.”.

Tui đề án 522 ka pato pakai hướng nghiệp saong định hướng phân luồng anek saih dalam pato pakai phổ thông tukvak 2018 – 2025, tukvak anak tal gah pato megru meda kham merat lac hu takik abih 40% anek saih tamat trung học cơ sở patui veik bac trình độ sơ cấp, trung cấp saong takik abih 45% patui veik bac trình độ cao đẳng. Sở Pato megru bal raya HCM jeng daok jhul pakhang bruk phân luồng, hướng nghiệp meng pakat trung học cở sở piah patrun bruk anek saih tame tal 10 công lập trun daok 70% dalam thun 2020. Bruk ini caong khin hu rilo jang  dom mô hình 9+ biak siam lagaih piah dui pachreih, daong ka anek saih định hướng siam jang ka bruk palih ruah ngành nghề, trun bruk thất nghiệp dalam harei hadei./.