TPHCM lac labik akaok mereip dalam negar peih ngak mô hình “Tư vấn tâm lý sang bac” meng thun bac 2012-2013. Yau nan min hadei di dom thun peih ngak, mô hình ini di gah pato megru bal raya njauk Mentri pato megru brei padeih kayua angan gru pato tâm lý oh hu dalam thông tư tacei pato gah định biên, định mức, chức danh gru pato dalam dom sang bac công lập. Meng nan tal urak ini, bruk nan di TPHCM jeng daok hu khik, min kayua dom sang bac eng drei buh jien tabiak. Kayua yau nan ye nyu ngak patrun ảnh hưởng di bruk njauk di nyu brei hu ngak ka nyu siam jang.

Duk bilik oh ka đạt chuẩn, ralo gru tư vấn oh ka ginup ilamu, asal bruk ngak oh ka gheih nyu ngak ka ralo anek saih oh ka biak biai caik hatai jia tame phòng tư vấn tâm lý học đường. Ralo anek saih di bal raya daok huac yam takai tame duk tâm lý tuk gaok bruk khin daong. Dom adei huac dom bruk kandauk dalam di drei drei hu ralo urang karei thau, huac gru tư vấn oh thau hatai bloh ngak ka bruk nyu srau kadhau jang. Tuk hu sua lac ngak hagait meyah gaok cuang kandah gah tâm lý, ralo anek saih jeng javap lac eng drei langyah atau duah tal panuac tacei di ayut sahabat:

    “- Nan lac dom bruk di eng drei nan ye drei oh mbuan hagait khan brei urang karei thau.

    - Tuk hu bruk hagait adei bhian sua tangi ayut sahabat ralo jang. Bruk hagait jeng sua tangi ayut sahabat. Ayut sahabat nyu daok jaik drei, nyu thau hatai drei saong nyu umo thun nde drei.

    - Tame dalam nan oh thei daong ka drei hu hagiat. Yaom lac dalam duk hu gru tư vấn min tui adei saneng gru tư vấn tok xoa dịu tâm lý daong ka adei trun meneng huac kanda min bruk biak jeng daok biak yau nan”.

Urang kamei Cam An Giang

  Anak meta mboh lac, anek saih dom pakat, abih di nyu lac anek saih di umo bahrau prong hu oh takik suh sah, tavak tavaiy dalam hatai saneng. Min kayua anek saih oh ka biak biai jia tame nan ye takik duah mai tal duk tư vấn tâm lý piah caong lang yah. Dom gru tâm lý di dom sang bac rilo meng ngak bruk tui kiểu thời vụ atau kiêm nhiệm.. Kayua yau nan ye biak kan piah hu gru hu chuyên môn glaong atau abih hatai ka bruk tư vấn. Blaoh jeng kayua oh hu công nhận chức danh nan ye gru  tâm lý di dom sang bac tok mbang jien bilan lac nhân viên, oh tương xứng haong bruk bac megru. Jien bilan biar, bruk ngak oh hu caik hatai sangka nan ye biak kan piah ka dom sang bac khik takai gru tâm lý.

Tui Tiến sĩ Lê Nguyên Phương, dahlau diah lac Chủ tịch Liên hiệp Phát triển Tâm lý Học đường Quốc tế, ini lac cuang kandah njauk peih talaih chip, meyah oh peih talaih, bruk tham vấn học đường meda laik tame khủng hoảng. Bruk ngak samar drah di dom sang bac nan lac njauk peih phòng tham vấn học đường mek hu chuẩn. Labik nan njauk hu dom chuyên viên biak biai hu ilamu piah mboh, piah thau saong can thiệp dom kadha tâm lý ka anek saih. Bằng cấp chuyên môn nan lac bruk oh kurang hu, kayua yau nan ye gru pato oh njauk lac tư vấn tui jalan kiêm nhiệm hu. Tiến sĩ Lê Nguyên Phương lac: “Urang hu bằng cấp cử nhân tâm lý ye oh meda ngak hu bruk chẩn đoán, nhận diện saong can thiệp gah tâm lý ka dom adei anek saih. Dom urang nan njauk brei nao bac tagok glaong chuyên sâu jang. Jaik 80% dom negar angaok dunya urak ini tabiak bruk lac urang ngak chuyên viên tư vấn tâm lý học đường njauk hu bằng thạc sĩ tagok meng hu ngak bruk ini dalam sang bac.”.

Jeng hu hatai saneng yau nan, ong Phạm Phương Bình, Phaok Hiệu trưởng Sang bac Trung học phổ thông Nguyễn Hữu Huân di  quận Thủ Đức, TPHCM ndom lac tư vấn tâm lý học đường nan lac bruk ngak njauk jhul pakhang dalam saman ini. Kadha bo dom sang bac caong khin di abih urak ini lac kadha mbuan lagaih gah cơ chế saong tự chủ ka jien padai piah buh tame ngak ka nyu siam bruk ngak ini ba mai labik bac da-a,  sinh hoạt siam di abih ka anek saih: “Ndom ka gah định biên, biên chế nhân sự ye njauk biak biai jao trách nhiệm ka hiệu trưởng dom sang bac. Dalam nan hiệu trưởng  brei hu quyền ký hợp đồng haong chuyên gia tư vấn piah ka urang ini hu ginup ilamu saong hu patao pakai bài bản. Taphia di nan, dom sang bac jeng brei hu  chủ động jien padai piah padang duk bilik, blei trang bị thiết bị saong jien brei ka gru pato ngak bruk tư vấn tâm lý.”.

Anak bruk yau nan, Sở Pato megru bal raya HCM jeng daok pok panuac likau công nhận angan gru tâm lý piah samar daong ka dom sang bac langyah binah halei dom cuang kandah, dak harei dak patagok chất lượng bruk  tư vấn tâm lý học đường./.