Alin brei harak vé radaih ka urang ngak nao palei mbang tết 

Dom harei tapa, di dom khu công nghiệp, khu chế xuất hu rah tabiak rilo bruk iek glang Tết ka urang ngak. Dalam nan hu danak dak “Nyaom drak pasa anit ranam”, kayua Liên đoàn Lao động ban raya HCM peih tabiak piah palagaih ka urang ngak blei pandap Tết, bui sambai song taom gaok ndom nyai nao mai song gauk. Pak ni hu  63 gian hàng, pablei rilo janih pandap gia dụng, điện tử, jhik pet, pandap mbang menyum, hóa mỹ phẩm song dom janih kaya nong, đặc sản puk palei…, saong yaom mbiah lap. Muk Thân Thị Lan Ny, Tổng Giám đốc Công ty Kim Sáng, Quận 12, ban raya HCM pabak pandap di drak pasa ini, brei thau: Urang ngak ye cong khin blei hu pandap siam, hacih saat  song yaom mbiah. Daok gah  doanh nghiệp, khol hulin khin angan je di drei pambak praong, nan ye dom pandap hu pablei di nyaom drak pasa yaom trun meng  20-50%.

Langiu di bruk blei pandap Tết yaom mbiah lap, thun ni, hu 35.000 urang ngak kan kathaot dok ngak bruk di ban raya HCM hu danak dak “Blah harak anit ranam” brei harak radeih nao palei raok Tết. Abih di nyu nan lac 500 urang ngak naih gheih, hu sahaneng duah ngak laba ka doanh nghiệp meng 15 triệu đồng tagok hu alin brei harak kapan haok. Nan lac dom phần thưởng daong ka urang ngak pachreih hatai ngak bruk naih joi, sahneng duah rik daong tame bruk cakrok di doanh nghiệp. Rilo urang ngak hu mbang tui phúc lợi dalam tuk Tết bui sambai brei thau:

Adei hu phiếu alin brei pandap di Liên đoàn Lao động ban raya HCM, lac sa muot bảo hiểm song jien. Adei kham merat ngak siam bruk di drei jang.

Dar phol danak dak hu dong palagaih ka urang ngak kan kathaot, atah palei hu blei pandap trun yaom.

Adei mboh biak bui sambai, chreih chrai tuk hu nao palei mbang Tết.

Tui  ong Nguyễn Thành Đô, Trưởng Ban Chính sách-Pháp luật - Liên đoàn Lao động ban raya HCM, bruk iek glang Tết ka urang ngak thun ni hu rilo salih bahrau. Meyah thun bloh, “Tết pataom gauk” tok hu peih sa labik ye thun anek sak takuh ni, danak dak peih tabiak di 3 labik karei di gauk, piah palagaih ka 1.500 boh sang urang ngak naih gheih, song 4.500 urang, hu mbaok tame mbuan lagaih jang. Labik peih ngak jiak dom pasak pablei salih, siêu thị, piah dom urang  pandar chip phiếu alin brei pandap, gam song 1 triệu đồng jien mbaok, blei dom pandap pandar song hu labik piah ka anek kamuan urang ngak bui sambai main. Ong Nguyễn Thành Đô brei thau dom nghiệp đoàn ngak bruk tự do – labik oh hu po pandar urang ngak jeng lac labik hu sangka: Thun ni khol hulin iek glang ka 500 gru pato di nyaom uranaih tư thục hu rai duik biak kan kandah. Ka 2 lac peih bruk nao rivang 97 nghiệp đoàn dalam ban, alin brei ka dom labik sa pok pandap yaom 2 triệu đồng piah urang hu jien peih bruk mbang tết trei sil ka urang ngak.

Oh taeng urang ngak, ban raya HCM jeng kham merat iek glang Tết ka urang hu rai duik kan kandah, boh sang dalam sarak karja, urang amaik Việt Nam Anh hùng, thương bệnh binh… saong yaom jien abih tih lac  819 tỉ đồng, rilo jang 60 tỉ đồng dut song Tết thun anek sak pabui 2019. Muk Triệu Lệ Khánh, Phó Chủ tịch UBMTTQ ban raya HCM brei thau: Khol hulin pasang iek boh sang dalam sarak karja hu rai duik kan kandah, thương binh trak hu rai duik kan kandah piah daong. Oh lac daong pandap bo dok sangka tal dom bruk me-in sambai.

Dom danak dak “Tết taom gauk”, “Xuân anit ranam” rah tabiak di rilo labik dalam ban raya HCM hu ba mai ka urang ngak, urang kathaot, urang taha dok sa drei, uranaih metui medar dalam dom mái ấm, nhà mở… hu mbang Tết trei sil bui sambai. Nan lac bruk pachreih ba piah daong ka urang kham merat yam tagok dalam rai duik, njauk song angan lac rahra di sa ban sami samar, hadah krah, ndung bak hatai anit di Đảng, hatai ranam di bhap bini./. 

Urang lang: Hani Pha-15/1