1/ Chi cục hacih saat pandap mbang menyum tỉnh Quảng Ngãi bahrau nao pasang iek đột xuất 3 labik pablei salih, ngak pandap meng lisun lô  Lý Sơn di ban Quảng Ngãi. Tapa nan mboh tong abih dom pandap ngak bloh hu tauk harak brei thau oh njauk song bruk pandar di nyu. Harak tauk nan mbuan ngak ka urang sahneng mboh karei jang . Urak ni, Chi cục hacih saat pandap mbang  tỉnh Quảng Ngãi hu ngak biên bản saong pandar doanh nghiệp ngak harak sinya  klak abih dom nhãn hiệu yaih khan oh njauk angaok pandap dalam 5 harei. 

2/ Harei 5/7, gah chức năng tỉnh Kon Tum hu ba nao am cuh klak labaih 100 lít alak tram yau akaok sâm saong jaik 60 hũ pandap mbang yau cốm, yau kao hu ngak tabiak meng sâm, oh thau mai meng halei. UB bhap bini tỉnh Kon Tum hu tabiak harak  phạt  amuk Đinh Thị Thuý Hằng, po labik pablei salih alak sâm Ngọc Linh di phường Quyết Thắng, ban sit Kon Tum, yaom jien 69 triệu đồng.   

3/ Tui panuac khan meng sang bac  Đại học Quốc gia ban raya  Hồ Chí Minh, dom labik pato di sang bac Đại học Quốc gia ban raya  Hồ Chí Minh hu pilih ruah tapak  13 anek saih di Đồng Nai tame đại học chính quy thun 2017. Abih  13 anek saih  hu palih ruah tapak mbang ni lac anek saih   di sang bac  Trung học phổ thông chuyên Lương Thế Vinh, mek hu  giải glong dalam mbang pakacah anek saih naih joi pakat negar thun bac 2016-2017.

4/ Tamat chặng ka 3 di “Hành trình đỏ xuyên Việt 2017” rah tabiak di ban Cần Thơ, Ban peih bruk brei thau: 800 đơn vị drah mek hu hu payua ka Trung ương piah parabha ka dom puk palei karei daok gaok kan kandah.  Bác sĩ Nguyễn Xuân Việt – Giám đốc sang iek ruak Huyết học – Truyền máu Cần Thơ – gah taduan mek, sàng lọc, pabak drah daong menuac dalam 10 tỉnh, ban bhum taneran kraong Cửu Long brei thau: Labaih 50 sang iek ruak di 10 tỉnh, ban oh daok bruk caik urang ruak cang kayua kurang drah khik mepiah.

      5/ Tui Chi cục pala drak song khik caga phun pala tỉnh Trà Vinh, kayua gaok hajan gam gam dalam labaih 10 harei tapa ngak ka mblang padai Hè Thu di tỉnh tamuh rilo ruak palai pajoa song dak harei dak pambak praong. Piah pacang cakak ruak di angaok padai Sở ngak nong song patagok palei pala tỉnh Trà Vinh ba urang jakar ilamu kỹ thuật pambuak bruk song jabat ngak nong song patagok palei pala dom  huyện tacei pato urang nong jalan pacang caga ruak đạo ôn song rầy nâu meng dom janih jru đặc trị. 

6/ Sở Kế hoạch saong Đầu tư tỉnh An Giang brei thau, dalam 6 bilan akaok thun 2017, meng peih ngak ralo jalan daong doanh nghiệp dalam saong langiu taneh ia buh jien tame sản xuất, pablei salih, tỉnh dui pachreih hu 44 dự án đầu tư tame tỉnh; dalam nan hu 2 dự án đầu tư negar langiu saong 42 dự án đầu tư dalam taneh ia, ngan saong yaom jien tut angan tame đầu tư lac 4.700 tỷ đồng. 

      7/ Ong Nguyễn Chí Thuần, Chủ tịch Ủy ban bhap bini  huyện Đầm Dơi, tỉnh Cà Mau brei thau, tuk vak jiak di ni, di huyện Đầm Dơi hu rah tabiak bruk ikan metai di dom krong chraoh. Tui kajar huyện Đầm Dơi, meng bilan 4/2017 tal urak ni, takik di abih 3 mbang rah tabiak bruk ikan metai. Bhap bini labik ni medhi lac kayua dom sang máy ngak hadang dalam Khu công nghiệp Hòa Trung tathuak ia Nerak tabiak gah langiu ngak jhak halau ia.

Patui di ini dom khau tin dunya:

8/ Ngoại trưởng Nhật Bản Phu-mi-ô Ki-si-đa harei 5/7, hu ginum meyai ka hiệp định pablei salih tự do saong Liên minh châu Âu (EU) di Brúcxen (Bỉ). Brei panuac saong báo chí, ong Ki-si-đa caong khin dua gah mek hu thỏa thuận hadei tuk oh njauk gauk dalam mbang ginum meyai adit dahlau di Tôkiô.

    9/ Thủ tướng Ấn Độ Na-rên-đra Mô-đi (Narendra Modi) hu mbang rivang negar I-xra-en (Israel), ni lac mbang nao rivang camereip abih di sa Thủ tướng Ấn Độ tal negar  Do Thái ni. Tui kuhria, Thủ tướng Ấn Độ meda tamat meng nao rivang di harei 6/7, tuk 2 negar pahadar 25 thun  harei padang talei rohim pambuak bruk ngoại giao.

10/ Dom urang jakar ngak praong gah y tế di Xri-lan-ca brei thau, taneh ia ini daok dang anak bruk hu jit pandiak tabiak drah khang, tuk hu 225 urang metai saong jaik 76 ribau urang njom jit ruak. Tui taong yaom di tiến sỹ Ru-oan Guy-ja-ya-mu-ni, urang jakar y tế di ban Cô-lôm-bô, bruk dom baoh sang saong bhap bini oh puh ramik nerak jeng yau xử lý dom labik kandong ia hadei di dom mbang hajan khang lac makna ba tal jit pandiak tabiak drah mbang ini./.