Mai ravang bản tái định cư Mường Chiên, xã Phỏng Lái, huyện Thuận Châu dalam dom harei akaok thun meng mboh cambaih bruk trei sir daok hu mbaok dalamyaok baoh sang, raidiuk di mikva hu tani tanat biak biai. Ong Điêu Văn Chính, bản Mường Chiên brei thau: Bản di ong hu 65 sang, gam saong 400 urang tabiak truh palei klak di Quỳnh Nhai mai daok di palei bahrau Phỏng Lái ini meng thun 2007. Hu karja saong bhap bini pak nan sangka brei taneh daok, taneh pala drak, sang ong saong mikva kham merat pala tea, cà phê, cakrok bruk raong athur, raong menuk ada, yaok thun mek jien tame hu yaok rituh triệu đồng. Abih di nyu nan lac bruk raong limo ba jien tame tani tanat. Jaik 10 thun daok di palei bahrau, oh daok glaih glar tra. Ong Điêu Văn Chính brei thau: “Raong limo dut saong raong pabui ye meda patrun kathaot hu, kayua jien raong oh abih rilo, yaok thun yaok drei limo menek hu sa drei limo anek, pablei nao jeng hu pluh triệu."

           Mai palei bahrau, hu Karja padang ngak jalan bê tông, sang ilamu, dom janih tea saong cà phê jeng pablei hu, urang mai tal sang piah blei. Phun tea hu daong ka mikva salih bharau raidiuk, yam tagok tabiak truh kan kathaot. Dom thun dahlau, mbang tui sarak di dom sang ndi dân tái định cư, bản hu taduan mek limo binai pajaih ka dom baoh sang taduan raong pavah, tapon limo menek hu yaok pluh drei saong pajeng ba limo binai ka dom baoh sang karei raong. Tal harei ini, bản hu tapon kubao – limo yaok rituh drei, nan oh ka ndom tal tapon menuk ada, pabui... Ong Lò Văn Quang - Trưởng ban Mặt trận bản Mường Chiên, xã Phỏng Lái huyện Thuận Châu, tỉnh Sơn La brei thau: “ Mai ini sang danaok tani tanat, brei hamu brei puh ka yaok baoh sang. Urak ini hu ginup mbang, meng labik hu 16 baoh sang kathaot, urak ini trun daok 3 baoh sang kathaot"

          Huyện Thuận Châu hu raok saong daong tani tanat raidiuk kalabaih 1.500 sang daok di 37 labik tái định cư. Huyện hu ngak bloh bruk brei taneh ka dom sang bhap bini. Dom cơ sở hạ tầng yau điện, jalan, sang bac, balai iek ruak jeng hu sangka padang ngak siam. Tal urak ini, jaik abih dom baoh sang jeng hu jamriakchai padai, 90% sang hu radaih patuh, hu ti vi, tủ lạnh saong pandap pandar yaok harei dalam sang. Urak ini anek kamuan dalam bản nao bac da-a hu mbuan lagaih, kayua tal bac hu peih tabiak pak di labik tái định cư. Ong Nguyễn Văn Toản,  mBan Quản lý di dân Tái định cư huyện Thuận Châu, tỉnh Sơn La brei thau: “Anak meta daok cang Rajaei brei adat ngak mbang ka 2, tui jalan tacei di tỉnh lac pasangiek veik saong pasiam dom công trình hạ tầng hu ngak bloh mbang ka 1, pagap yau jalan nao mai dalam labik tái định cư, sang ilamu, tal bac mầm non, sangka ramik pasiam dom jalan ia pandar, ia thủy lợi  ka mikva" 

            Hadei di dom harei bui sambai raok Tết, tuk lingik siam lagaih, bhap bini tái định cư  di huyện Thuận Châu saong bhap bini daok pak nan meng kan mai daok ba gauk tame sản xuất, iek glang bein tea, tam drak, li-ua taneh saong hatai caong hajan siam – ngin lagaih, bilan pala siam piah raidiuk dak harei dak trei sir jang./.