Urang lin daong bhap bini tam padai

  Dom harei ini, mikva palei Bu Prăng xã Quảng Trực, huyện Tuy Đức daok trun pajaih padai bilan Đông Xuân. Labaih 15 thun tapa, hu bruk daong di đồn biên phòng Đăk Dang saong karja pak ini, bhap bini hu thau dom ilamu ngak padai ia.

Ong Điểu Toi, daok di palei Bu Prăng khan lac, sa thun ngak hu dua vụ padai, jeng lac dua mbang bo đoi biên phòng mai daong ngak taneh, trun pajaih. Tal tuk buh khak, pacang halak halin…tuk halei jeng hu bol lin abih hatai tacei pato. Meng mblang hamu Đăk Huýt, bhap bini bhum taphia negar atah di abih lac tỉnh Đăk Nông urak ini oh daok bruk mbang mesup eik biar harei: “ Puk drei urak ini pala hu 35 hecta padai, dahlau di thun 2010 drei oh ka thau ngak padai tok thau ngak apuh. Sang dahlak ngak padai ginup mbang luac thun. Adei sa-ai đồn biên phòng Đăk Dang tuk halei jeng  daong ka baoh sang kan kandah, pato ilamu ngak padai, daok veik saong mikva , tacei pato ilamu ky thuat. Rilo thun blaoh  nan ye hamu urak ini biak rilo likhun, adei sa-ai bien phong tacei ka mikva blei cur, khak vi sinh piah buh tame ngak pasiam hamu.”

Thiếu tá Phạm Minh Tuấn, Đội phó Đội jak ba bhap bini - Đồn biên phòng Đăk Dang khan lac, urang M’nông daok di bhum taphia negar Tuy Đức tok thau ngak apuh. Daong ka mikva ngak padai ia, dom urang jakar chiến sĩ gam mbang, gam daok, gam ngak, bac sap bangsa saong kham tacei patao biak tani tanat ka mikva. Thiếu tá Phạm Minh Tuấn lac, hadei di rilo thun ngak padai, vụ Hè Thu meng blaoh padai hu takik duk saong dahlau. Mboh hamu njom likhun, bộ đội biên phòng gam saong mikva ba ia craoh tame hamu rao hacih likhun, caga trun pajaih padai Đông Xuân: “Dahlau diah daok tamo khol dahlak trun hamu tam padai, yuak padai ka mikva, lavik lavik harei miikva thau ngak. Hu dom ilamu ky thuat mikva oh thau ba tame ngak ye khol dahlak bac tapa mbao, rayo, tivi piah tacei pato mikva. Đồn brei urang jakar saong urang xung kích mai daong mikva, pato mikva kuac ribaong rao hacih likhun piah mikva caga trun pajaih padai vụ anak tal.”

Ong Đoàn Hồng Quân, Akok UB bhap bini xã Quảng Trực taong yaom: Bruk jak ba di đồn biên phòng Đăk Dang ba mai rilo siam lagaih ka puk palei. Daong ka bhap bini, bol lin hu daok jaik bhap bini, pathau khan dom sarak di Đảng hukum di Karja, khik kajap an ninh trật tự bhum taphia negar. Salih mboh cambaih di meta lac daong mikva thau sahaneng dalam bruk ngak tabiak, dak harei dak paglaong  raidiuk  di labik taphia negar: “Langiu bruk pathau khan ka mikva ngak njauk tui dom sarak di Đảng, hukum di karja ye dom urang lin daok hu daong ka mikva thau ngak padai ia. Tal bilan padai ye dom urang lin daong mikva ngak taneh, tam drak padai saong tui iek daong mikva  thau ngak hamu padai habar piah hu rilo padai brah…”

Bruk ngak pasiam veik mblang hamu Đăk Huýt hu daong ka mikva tabiak truh eik lipa, kan kathaot, rilo thun gam jeng talei pambuak dom urang lin biên cương saong mikva urang bangsa takik di bon Bu Prăng. Bộ đội biên phòng Đăk Dang hu jeng gauk gar di bhap bini daok di bhum taphia negar./.

Urang lang: Ái Nghiêm -