Hu mbaok di palei Tân Định 2, xã Suối Đá, huyện Dương Minh Châu, tỉnh Tây Ninh, labik hu labaih 100 baoh sang bhap bini bangsa Tà Mun daok, kol dahlak oh klah di tatuak drei kayua jalan palei atah bayah di xã hu hadah tagok meng hu điện truac. Tui bhap bini daok di labik ini, dom thun dahlau jalan palei ini sup palup, bruk nao mai di bhap bini labik ini gaok ralo kan kandah tukmelam mai. Anak bruk nan, Đoàn dam dara xã Suối Đá, huyện Dương Minh Châu, hu padang ngak công trình hu angan “Dam dara Suối Đá truac hadah jalan palei”. Dalam tukvak panak peih ngak, jalan điện atah 470 m, 14 gom pui patak pataom điện hu dui tal yaok baoh sang bhap bini meng bruk rik pren, jien ndo di bhap bini saong yaok pluh dam dara halan hatian dui talei, pambuak điện ka bhap bini. Bruk nan hu rik daong biak praong ka bruk ngak hu salah tiêu chí điện truac hadah di xã dalam bruk padang ngak palei pala barau. Ong Cao Văn Ken – sa urang daok di palei  Tân Định 2, xã Suối Đá, huyện Dương Minh Châu brei thau:

 “Dahlau daih tuk oh ka hu công trình truac hadah jalan palei mikva nao mai biak kan kandah kayua jalan ini nyu sup saong gluh baok. Meng tuk hu công trình ini, nyu ngak brei salih barau jalan palei, mikva biak pachreih tui, mikva biak chreih chrai saong ndom lac, ini sa bruk ngak njauk”.

Oh lac palei Tân Định 2 di  huyện Dương Minh Châu hu công trình “truac hadah jalan palei” bo urak ini, rilo jalan palei di dom huyện Bến Cầu, Gò Dầu, Châu Thành, Hòa Thành, Tân Biên, Tân Châu, Trảng Bàng tỉnh Tây Ninh hu peih ngak dom công trình “Truac hadah jalan palei”, pasiam bruk nao mai, daok dang ka bhap bini. Kuhria tal urak ini, dalam tỉnh peih ngak hu labaih 200 công trình, atah abih tih jaik 300 km ngan saong yaom jien buh tame ngak labaih 4 tỷ đồng.

Meng tuk dom công trình “Truac hadah jalan palei” hu peih tabiak, bhap bini nao mai hu mbuan lagaih jang di tuk melam. Taphia di nan, công trình “Truac hadah jalan palei” rik daong biak ralo dalam bruk khik kajap an ninh trật tự, pacang cakak tệ nạn XH. Melam melam, bhap bini nao kabak, uranaih sambai me-in angaok jalan hu gam hadah. Dom ayut dam dara bangsa Tà Mun dalam palei pataom gauk mai labik sang meng kan piah sinh hoạt, sambai me-in, daoh tamia. Amuk Hoàng Thị Thanh Thúy - Bí thư Tỉnh Đoàn Tây Ninh brei thau:   

 “Công trình biak hu makna saong hu bruk pachreih tui di UB bhap bini. Công trình ini tuk camereip lac urang đoàn dam dara jak ba piah truac hadah jalan mbak palei pala gam saong sarak di rajaei lac peih ngak danak dak bruk ngak negar padang ngak palei pala barau. Saong tuk điện jalan di bhum palei pala hu truac hadah ye bruk nao mai di mikva hu siam jang. Saong urak ini công trình ini hu bruk pachreih tui di dam dara biak siam, pachreih tui di dom nguồn lực XH biak siam”.

Meda lac, công trình “Truac hadah jalan palei” daok peih ngak di Tây Ninh hu rik daong biak praong dalam bruk paglaong rai diuk mbang ngui daok dang di bhap bini puk palei. Nyu jeng brei mboh bruk ba akaok nao dahlau, bruk halan hatian di dam dara tỉnh dalam bruk ba tangin tame padang ngak palei pala barau, dui ka nyu jaik jang ban sit saong palei pala, rik daong ngak hu jayah bruk  patagok kinh tế XH di tỉnh./.