Ngak salah danak dak ba điện negar tabiak pulao

Labaih 10 thun dahlau, dom menuac urang camereip di abih halan hatian tabiak padang mbang ngui angaok pulao Trần. Kham merat yam tapa kan kandah di langik tasik, dom menuac urang di baoh pulao hu brei angan lac "Trường Sa di Đông Bắc" haong dom urang jakar, urang lin angaok pulao hu ngak brei pulao Trần hadah mekre yau harei ini. Tuk danak dak ba điện negar tabiak pulao bahrau hu peih tabiak ngak, sa-ai Vũ Văn Định haong dom urang angaok pulao maong akaok yaok harei. Blaoh njauk di tuk pahadar mbang ka 75 harei negar, baoh sang di sa-ai hu truac hadah meng điện negar: “Sang dahlak saong taong abih dom sang pak ini uan tabuan lo tuk hu điện tabiak ini brei ka mikva pandar saong ngak mbang. Kol dahlak cang harei ini meng lavik mai. Bui sambai lo saong ini jeng lac bruk daong ka kol dahlak kham merat jang piah khik tasik, khik pulao.”

Dom bilan dahlau daih, điện angaok pulao praong oh ka tal 4 ki-lô-mét vuông hu pabak meng pin ia harei saong jamriak menyek. Tuk langik oh siam, atau tuk jamriak khut, điện truac hadah pulao jeng oh ginup, ndom hagait tal bruk pandar điện ka dom bruk yau khik piah kaya ikan atau ti vi, tủ lạnh... Anai Ngần Thị Minh, gru pato sang bac pulao Trần brei thau: Hu điện tani tanat, anek saih di anai hu bac da-a siam lagaih jang: “Điện mai, dom adei anek saih hu bac rilo jang gah công nghệ thông tin, dom danak dak bac siam di abih. Taong abih dom adei biak bui sambai, chreih chrai, Nan lac prein pachreih ba dom anek praong jang di harei hadei.”

Melam camereip ala gom hadah meng điện negar, dom adei sit angaok pulao ba gauk daoh tamia. Oh hu hagait piah biai meyah oh thau lac piah hu điện negar angaok pulao sit atah di baoh taneh tal labaih 35km ini, dom gah padang ngak brei yam tapa biak rilo kan kandah dalam bruk pajeng ba pandap saong padang ngak angaok tasik, abih di nyu lac tuk langik tasik oh siam lagaih. Bruk ba điện negar tabiak pulao Trần oh lac kham merat di tỉnh Quảng Ninh piah pabak điện pandar ka taong abih dom baoh sang angaok pulao bo daok lac jak jeng praong di tỉnh dalam bruk oh oh padeih paglaong raidiuk bhap bini daok di angaok pulao, dui ka nyu jaik gauk jang dom bhum palei. Ong Trần Như Long, Bí thư Huyện ủy, akaok UB bhap bini huyện Cô Tô brei thau: “Meng hạ tầng hu padang ngak blaoh, kol dahlak kham merat jak ba mikva paglaong yaom dom janih kaya ikan, pandar dom ilamu bahrau piah patagok kinh tế. Jia lac anak tal pulao Trần lac labik dui pachreih rilo rahra mai daok. Tuk nan meda mblo tabiak cuang kandah ka Cô Tô ka bruk khik ramik taneh riya, padang ngak đô thị, an ninh trật tự… Min dahlak jia lac meng ilamu khik taneh, khik pulao di urang Cô Tô jeng yau di pulao Trần meda lac jalan peih tabiak ka mikva sahanang hatai khik tasik, khik pulao saong ngak siam jang bruk khik caga quyền ngak po tasik pulao di taneh ia.”

Gam haong bruk ngak salah danak dak ba điện negar tabiak pulao, bruk Giáo hội Phật Giáo Việt Nam tỉnh Quảng Ninh daok kuhria padang baha Trúc lâm Đảo Trần – meda lac prein pachreih ba praong daong ka bhap bini haong urang jakar, urang lin sahanag hatai khik pulao, khik tasik saong ba jalan patagok bruk gak mbang kinh tế di pulao. Thượng tá Ngô Huy Đông, Chính trị viên Đồn Biên phòng pulao Trần (Bộ chỉ huy Bộ đội Biên phòng tỉnh Quảng Ninh) brei thau: “Taphia bruk sangka tal raidiuk, Đảng saong Karja jeng hu caik hatai sangka tal bruk ilamu. Bruk padang baha lac bruk sangka gah tâm linh, jalan sahneng, gah ilamu di urang lin saong bhap bini daok angaok pulao. Menuac sia angaok pulao meda kham merat yam tapa kan kandah, ngak siam di abih dom bruk piah patagok kinh tế, khik caga khang kajap quyền ngak po tasik pulao di taneh ia, palei negar.”

Điện negar hu hadah tagok labik pulao gah anak di bhum Đông Bắc. Nan oh lac pui hadah di akaok sahneng, di bruk patagok kinh tế-xã hội di pulao, bo daok lac pui hadah di talei rohim khang kajap di urang lin haong bol bhap rahra. Labik akaok riyak, urang jeng daok khang hatai kak kajap haong tasik, haong pulao, brei mboh quyền ngak po tasik pulao ginreih di Việt Nam./.

Urang lang: M. Phương – 13/09