Bơ hu ngak sinh tố piah menyum yaok harei 

Tui Cục Pala drak - Mentri Ngak nong saong patagok palei pala, urak ini, taneh pala phun bơ daok tagok rilo mbang dut saong 3 thun dahlau. Ini lac phun công nghiệp lavik harei, pala 3 thun meng paih baoh saong paih dalam rilo thun yau nan ye karja dom palei brei tacei pato, oh brei pala mblah di gauk. Langiu di nan, pajaih bơ di Việt Nam baoh oh praong, takik bingi lameh tui tanut chuẩn piah pablei tabiak darak pasar Mỹ, EU. Ngan saong darak pasar Trung Quốc, phun bơ oh hu dalam bruk ginum biai peih pabah mbang negar blei tame. Yau nan ye, dom doanh nghiệp, karja palei, urng nong njauk brei duah thau cambaic laic dahlau di tuk peih praong taneh pala phun bơ.

Bilan Hè Thu saong Thu Đông thun 2020, tỉnh Kiên Giang padang 66 mblang hamu praong ngak padai, abih tih praong labaih 11.580 ha, patagok mblang hamu padang ngak di thun 2020 lac 100, abih tih praong labaih 30.670 ha. Bilan Đông Xuân 2020 - 2021, tỉnh Kiên Giang daok jak ba, daong saong palagaih ka dom doanh nghiệp, hợp tác xã padang bhum taneh ngak padai praong chất lượng glaong ngak tui mô hình mblang hamu praong, pagam haong duah jalan pablei tabiak, rilo abih lac 2 labik ngak padai praong abih lac bhum pak kieng Long Xuyên saong Tây sông Hậu. 

Hardei di 5 thun peih ngak Sarak di Hội ndong bhap bini tỉnh Dak Lak ka bruk khik ramik, patagok ilamu công chiêng tỉnh Dak Lak, tukvak 2016 -2020, danak dak khik ramik ilamu cồng chiêng pabak sumu bruk di anak meta, hu bhap bini njauk hatai. Bruk peih dom tal patao pasram taong chiêng, brei chiêng saong khan ao hu karja palei sangka pambuak bruk, hu siam lagaih, pabak sumu bruk peih ngak dom harei ilamu, adat cambat tanarakun di bhap bini dom bangsa dalam tỉnh. Dalam tỉnh urak ini hu 2.098 bộ chiêng, dalam nan hu 1.645 bộ chiêng Êđê. Yau nan min, bruk khik ramik ilamu công chiêng ralo meng pataom tame karja khik piah, oh ka peih ngak hu rilo bruk khik piah dalam bhap bini.

Cục khik ramik darak pasa tỉnh Bình Dương brei thau daok daok cap khik 3.400 paok pakao negar lingiu loa ba tame saong mboh yau ngak ja angan “555” saong “Craven” di dua baoh sang pablei salih di ban sit Tân Uyên, tỉnh Bình Dương. Tui nan, harei 27/10, kapul pasang iek hu dom jabat jaka di tỉnh Bình Dương saong urang lambaok po angan pakao “555” saong “Craven” peih bruk pasang iek sang pablei salih Văn Hương di ong Lưu Văn Hương daok di phường Thái Hòa, ban sit Tân Uyên. Di dalam tuk pasang iek, kapul hu duah mboh ong Hương daok khik piah 2.490 paok pakau hu angan Jet saong Hero; 420 paok pakao hu tauk tem pakao ngak dalam negar hu angan lac “555” saong “Craven”. Jeng dalam harei 27/10, kapul pasang iek hu duah mboh jaik 490 paok pakao ba meng negar langiu lac Jet, Hero saong pakao ngak dalam negar hu angan “555”, “Craven” di baoh sang pablei salih hu angan Nghiêm Ngân di ong Hoàng Văn Nghiêm, di phường Uyên Hưng, ban sit Tân Uyên. Taong abih dom paok pakao  nan hu pablei di darak pasa bo oh hu harak adat brei mboh cambaih asal labik ngak tabiak.

Công an quận Phú Nhuận (TP.HCM) pambuak saong Jabat cảnh sát hình sự Công an Ban raya HCM chap mek urang pametai manuac, blah drap ar di quận ini. Biar harei 27/10, bhap bini mboh sauk apui khuah meng baoh sang dalam jalan hẻm  Nguyễn Đình Chiểu (phường 3, quận Phú Nhuận) prew daong padam apui saong khan brei gah chức năng thau. Gah cảnh sát Padam apui khuah hu mbaok labik ini, piah padam khuah saong mboh muk N.T.N umo 66 thun, daok di quận Phú Nhuận metai, takoi hu inem klauk. Meng dom bruk duah hu camereip, mboh bruk nan lac pametai manuac piah blah drap ar, urang nan khin ngak brei palahik meng bruk cuh sang. Urang nan dauk di quận Gò Vấp njauk chap hu. Bruk nan daok duah thau ngak brei cambaic laic.

Urang jayah dalam mbang pacacah tame Nhà Trắng di adit hadei meda dang anak sa rai urang Mỹ hu jien mek tame bier, kan kandah dalam bruk duah bruk ngak kayua sarau kadhau di y tế ka oh bhian mboh dalam labaih 100 thun tapa. Mỹ urak ni hu 2,4 triệu urang lahik bruk ngak suai lavik. Dom urang hu dalam angan ni lac dom urang oh hu bruk ngak dalam takik di abih lac 27 adit. Dom urang kinh tế brei thau, dom urang daok duah bruk ngak mbuan tabiak truh darak pasa ngak bruk atau taduan bruk ngak biyar jien bilan bier jang duk saong prien buh tabiak.

Mentri Mỏ saong Năng lượng Campuchia brei thau,dalam thun 2021 taneh ia ini hu ba tabiak bruk padang ngak dom jalan pambuak bhum taphia dua negar Lào saong Thái Lan piah pabak điện dalam negar dak harei dak pandar ralo. Urak ini, Campuchia hu 7 sang mac thủy điện prein khang 1.328 megawatt saong 3 sang mac nhiệt điện hu prein khang 675 megawatt.Rajaei daok kuhria ba điện negar  tal labaih 13.130 palei dalam negar di puac thun 2020.

Kapul urang chuyên gia di gah rivang main dunya kuhria mboh lac, gah rivang main di dunya kan pasiam veik hu dahlau di puac thun 2021 kayua gaok kan kandah di jit Covid-19.Tui nan, dom bruk nao mai daok patakik veik, gum pambah mbang tapen negar gam saong dom bruk huac hana di bhap bini lac dom kan kandah piah pasiam gah rivang main di dunya. Kinh tế gaok kan kandah saong kurang dom jalan pambuak di dom negar jeng lac dom bruk ngak ka tuai rivang main njauk sahneng kuhria veik ka bruk nao mai. Tui taong yaom di dom chuyên gia, gah rivang main di dunya trun 70% dalam thun ni. Khat lahik di gah rivang main lac 730 tỷ đôla Mỹ, tagok 8 mbang duk saong jamar suy thoái praong atah di ni labaih sa abap./. 

Urang lang: Thu Thảo - Ái Nghiêm -31/10