Anek saih hu klauk jru piah hu nao bac pak di sang bac

        Dalam sarak payua dom tỉnh, ban, Mentri Y tế brei thau bruk daok karei di sang atau di labik y te ngan saong urang dut iek ruak mboh dương tính lac kuhria tui bruk anak meta di bhum palei. Tỉnh, ban brei pasang iek, dut iek nCoV urang mbuan njom ruak glong; oh ndok bhap bini brei hu ba-ar dut iek ruak meng brei tame palei. Dom tỉnh, ban brei bhian taong yaom ruak pambak tui pakat jit piah hu dom jalan pacang gah y tế, bruk hành chính lagaih.

Tui danak dak klauk jru peih praong pakat negar, dalam taneh ia hu 9 triệu, 400 rabau uraniah umo meng 12-17 thun. Kuhria tal harei 9/11 hu 12 tỉnh, ban lac Quảng Ninh, Ninh Bình, Lào Cai, Đà Nẵng, Thừa Thiên Huế, TP.HCM, Cà Mau, Bình Dương, Vĩnh Long, Đồng Nai, Kiên Giang, Sóc Trăng peih bruk klauk vaccine ka uraniah dalam umo thun ini. Bruk klauk jru dalam taneh ia jeng daok patagok saong klauk hu labaih  92 triệu mbang.

       UB Bhap bini Ban raya HCM daok padang ngak jalan peih bruk dut iek ruak pambak prong jang piah taong yaom ka jit ruak rah tabiak anak meta. Cambaic laic, Ban raya kuhria brei dut iek ruak sumu 4/1.000 bhap bini. Tui kuhria mboh, ngan saong 10 triệu bhap bini ye yaok harei, Ban raya brei dut takik abih labaih 6.000 mẫu. Dom quận, huyện saong Ban Thủ Đức  meda brei dut pasang iek ruak ngan saong dom labik mbuan njom ruak, kapol nyaom urang di labaik daok di bhap bini dalam ban raya tui bruk ba tabiak, mek tui palih ruah. Bruk mek mau dut iek tui bruk ba tabiak yaok bilan  meng PCR tui mẫu pataom 10 urang sa mbang.

Tỉnh Ninh Thuận daok peih ngak iek bruk khik ramik labik brei daok karei, taong ruak ka urang ruak COVID-19 di sang. Mbang 1, tỉnh peih ngak iek di ban Phan Rang - Tháp Chàm saong huyện Ninh Phước. Dom kapul y tế lưu động nao tui iek prein yava di dom F0 oh hu triệu chứng, taong yaom piah meda ba tagok sang iek ruak praong, piah taong ruak ka nyu lagaih.

        Harei 9/11, Sở Ilamu The thao Du lich tỉnh Bình Thuận brei thau hu pasiam bruk dulich tui pakat jit ruak Covid-19. Tui nan, Ban Phan Thiết saong huyen Hàm Thuận Bắc daok ngak tui dom jalan hành chính tui jit pakat 4( bhum bhong) brei padeih taduan raok tuai dulich. Dom labaik papah ka urang tuai ndih daok hu mbaoh harak taduan raok tuai dahlau harei 7/11 ye brei ngak min taduan oh tapa meteh prein ngak bruk. Gam hu jalan pajeng ba tuai dulich tui jalan vin sir.

Rajaei Japon bahrau ba tabiak bruk taong yaom bahrau ka jit COVID-19. Tui nan, bruk parabha hu 5 tanut, pataom tame tanut pabak bruk iek glang prein yava, bruk ini piah khik ka bruk njaom mbak daok di tanut oh tapa prein ngak, gam piah khik ramik bruk ngak mbang, kinh tế, raidiuk di rahra hu siam mekre. Urak ini hu labaih 73% rahra Japon hu klauk blaoh 2 mbang vaccine caga Covid-19, saong dom pathau khan brei mboh bruk mbuan ba tal menuac ruak trak trun biak rilo.

        Tui Hãng tin Reuters, Mỹ daok hu jalan buh jien tabiak ngak meng 5 tal 10 danak dak cơ sở hạ tầng praong di dunya dalam bilan 1 thun 2022, piah cagar veik bruk Vành đai – baoh jalan di Trung Quốc. Dom urang jakar Mỹ daok taom gaok dom urang pan akaok doanh nghiep saong rajaei rilo taneh ia piah duah dom danak dak lagaih. Bruk ngak nan meda brei thau dalam mbang nyaom di nyaom 7 taneh ia kinh tế prang ( G7) di bilan 12 thun ini.

Rajaei Pakistan haong Kapul cagar veikTehreek-e-Taliban Pakistan ieu katut lac TTP, njauk gauk brei padeih mesruh dalam  1 bilan. Bruk njauk gauk brei padeih mesruh gauk ini hu ngak tui meng harei ini (9/11), daong ka dom gah patui bruk ginum biai piah mek hu sron mbon suai lavik di taneh ia Nam Á ini. Kapul TTP hu maong lac kapul khủng bố, hu jabat rah tui jalan tapen negar Pakistan haong Afghanistan, hu mbaok tame dom bruk cuh gauk di Pakistan dalam labaih 1 abap tapa, ngak brei yaok rabau menuac metai./.

Urang lang: Mousaphuong -Ái Nghiêm -9/11