Mai tal ấp 3, xã An Phú Tây, huyện Bình Chánh, tangi sua tal angan amuk Lê Thị Lập ye thei jeng thau. Labaih 20 thun ngak bruk dalam Mặt trận Negar, dalam Kapul urang ngak nong, kapul urang kumei, Kapul pachreih bac palei, amuk Lê Thị Lập hu dom rik daong oh sit, ngak brei salih bahrau mbaok meta palei pala jeng yau paglaong raidiuk ka bhap bini dalam ấp 3. Meng hu bruk jak ba di amuk bo rilo jalan di ấp 3 dahlau daih lac jalan haluk, gluh baok ye urak ini hu tuh bê-tông mekre, siam. Lingiu di nan, amuk Lập daok jak ba hu  labaih 130 triệu đồng piah daong ka yaok pluh baoh sang dalam palei hu điện, hu ia pandar. Ndom ka dom rik daong di amuk Lập, amuk Lê Thị Thanh Thúy – sa urang daok dalam ấp 3, xã An Phú Tây, huyện Bình Chánh brei thau: “sang dahlak ngak công nhân, jien bilan takik, sa-ai Lập mboh yau nan, nao duah likau jien bac brei anek dahlak. Oh ta-eng hagait sang dahlak bo mikva daok di ấp 3 ini jeng hu sa-ai Lập daong. Sa-ai Lập siam hatai haong mikva lo, hu hagait oh thau ye nao sua sa-ai lac hu sa-ai tacei pato abih drei. Sa-ai jak ba mikva alin hadiah taneh piah ngak jalan ka nyu hacih, mekre. Dom anek saih klaak bac ye sa-ai nao jak ba mai bac veik”.

Akaok thun 2000, tuk amuk Lập bahrau tame ngak bruk karja ye ấp 3 jeng daok lac palei kan kathaot di xã An Phú Tây, huyện Bình Chánh, kayua yau nan ye amuk gaok oh takik kan kandah. Min urang kumei nan oh taduan lah kayua amuk abih hatai khin rik daong ka bhum taneh labik drei menek tabiak saong praong tagok. Tuk tame ngak bruk, hu pato pasram, amuk Lập thau rilo jang ka jalan ngak hadah krah saong bac megru hu rilo kadha di CT HCM. Meng nan, amuk ba tame bruk ngak di drei. Meng kham merat abih drei, amuk dak harei dak hu mikva dalam palei anit ranam, pachreih tui. Amuk Lê Thị Lập brei thau, amuk tuk halei jeng mek dom kadha, dom panuac kakei di Wa piah ngak jalan nao dalam luac 20 thun ngak bruk di drei: “Dahlak bac hu jalan ngak di Wa lac: bruk hagait kein ka bhap bini ye njauk ngak, bruk hagait khat ka bhap bini ye njauk plaih. Drei tuk halei jeng brei nao jaik bhap bini. Drei lac menuac dalam palei. Drei taduan hu panuac caong khin di bhap bini ka dom bruk ye drei samar khan brei dom urang pan akaok dom pakat thau piah langyah ka bhap bini”.

Sa bruk tra bo amuk Lập bac hu meng Wa Hồ lac tuk halei jeng thau lac, ngak urang jakar brei ngak kreih camin ka bhap bini maong tame blaoh ngak tui. Tuk jak ba padang kadung jien ye amuk lac menuac rik tame dahlau di abih, tuk jak ba brei darah ye amuk lac menuac nao dahalau, tuk peih bruk puh ramik haci hacih puk palei, amuk jeng lac menuac camereip abih pan gai puh, pataom mek hareik hareim... Ini jeng lac jalan ngak hu daong ka amuk dui pachreih hu rilo rahra dalam palei tame dom bruk jak ba.

  Dalam dom bruk ngak dalam palei, amuk Lê Thị Lập biak sangka tal bruk pachreih bac. Amuk hu ba tabiak saong likau hu 37 pok jien bac abih tih labaih 52 triệu đồng daong ka uraniah kan kathaot di ấp 3 hu nao bac. Amuk jeng jak ba hu rilo rahra rik jien tame drei pabui haluk piah daong Kadung jien pachreih bac di palei. Amuk Nguyễn Thị Thu Hà – akaok kapul pachreih bac xã An Phú Tây brei thau: “sa-ai  Lập ngak biak siam bruk pachreih bac. Tuk kapul pachreih bac caong pambuak bruk ye jar var bruk hagait sa-ai jeng kham merat hu mbaok haong kapul pachreih bac, nao tal yaok sang. Sa-ai thau biak cambaih angan di yaok adei, sang danaok bruk hit yau habar, kan kandah yau halei. Tuk nao tal nan, meyah mboh bruk praong jang prein di kapul ye dahlak ba tagok pakat angaok likau daong, daok meyah bruk dalam tangin di kapul ye kol dahlak daong samar ka dom adei”.

Lingiu di bruk kham merat brei ka 3 urang anek di drei hu nao mbang bac tal labik tal dhua, tuk mehit dalam palei hu anek saih halei klaak bac ye amuk Lập nao tal sang piah duah thau, piah jak ba adei saong amaik ame. Adei halei padeih bac kayua sang kan kandah ye amuk duah jalan nao likau jien bac daong ka dom adei hu nao bac veik. Amuk Lập tuk halei jeng mboh lac, hu bac da-a meng daong hu ka bhap bini tabiak truh kan kathaot saong rik daong ka bruk cakrok, patagok di taneh ia: “Jeng lac bac megru tui panuac Wa kakei “Sa ratuh thun pala menuac”, nan ye drei jeng jak ba dom adei kham merat bac da-a,  blaoh nao jak ba dom urang ngak pahla daong jien bac, radaih juak, tapuk siphau … brei ka dom adei”.

Yaom lac ngak rilo bruk min urang kumei umo 52 thun ini tuk halei jeng thau lac, bac megru Wa Hồ di labik lac rami ramik bruk hit ka nyu lagaih piah ngak siam yaok bruk. Ndom ka hội viên ini, sa-ai Nguyễn Phúc Lộc – akaok kapul urang ngak nong xã An Phú Tây, huyện Bình Chánh brei thau, amuk Lập lac menuac joi bruk taneh ia, gheih bruk sang danaok, lac kreih camin hadah ka dak padang baoh sang ilamu saong ngak mbang naih joi di palei: “Sa-ai Lập lac sa urang jakar naih joi, biak hu angan je dalam bhap bini. Tuk kapul urang ngak nong ba tabiak dom bruk ngak di kapul saong bruk di urang ngak nong ye sa-ai Lập ngak biak siam. Lingiu di nan, sang sa-ai Lập daok lac 1 baoh sang ngak mbang pablei salih naih joi, lingiu di raong lamo, sa-ai daok hu ngak padai”.

Bac megru saong ngak tui jalan hadah krah siam mekre di Hồ Chí Minh oh lac dom bruk praong, biak praong, bo meda lac dom bruk biak mbuan, biak sit, yau jalan bo amuk Lê Thị Lập daok ngak./.

Urang lang: M.Phuong