Jaik 4.000 lít menyek DO tame ia hu ba tagok truh gilai Bạch Đằng karam di bhum tasik Mũi Né, ban Phan Thiết, tỉnh Bình Thuận

Mesup ni (22/3), Mban tacei jalan pakat negar pacang caga jit Covid-19 brei thau, dalam 12 tuk tapa, dalam negar oh hu urang halei njom Covid-19; lac harei ka 3 gam gam Việt Nam oh hu urang halei njom bahrau dalam bhap bini. Dom urang njom bahrau kuhria meng harei 27/1 tal ni lac 908. Dalam dom urang ruak Covid-19 dok iek ruak hu 118 urang âm tính song virus SARS-CoV-2. Kurhia tal harei 21/3, Danak dak klauk jru peih prong pakat negar hu klauk pacang caga Covid-19 ka 33.891 urang.

Tui kuhria dahlau harei 23/3 saong harei 25/3, 30 urang halan hatian patui veik vaktu 1 hu klauk iek jru vaccine COVIVAC. Tui bruk roh duah, 120 urang halan hatian klauk iek tukvak ka 1 hu parabha jeng 5 kapol piah klauk iek jru ngan saong dom jru karei di gauk. Tui bruk brei thau meteh vaktu ka 1 meda ngak salah di bilan 7 thun 2021 brei ngak salah. Dom bruk taong yaom dahlau tuk jaik klauk jru brei mboh vaccine pacang caga hu siam jit ruak, salamat, meda pacang hu siam biến thể virut di Anh saong Nam Phi.

Tatua Thủ Thiêm 2 nao tapa krong Sài Gòn, pambuak đô thị bahrau Thủ Thiêm song quận 1, TPHCM tui kuhria tal thun 2023 meng ngak salah oh lac bilan 9 thun ni yau bruk batabiak. Bruk nan kayua danak dak njauk suai peih taneh riya gah quận 1, pambuak tal 6 boh sang, 3 kapul song taneh quốc phòng ngan song taneh prong labaih 13.000 m2; gam song dom tavak tavaiy dalam pasang iek song yaom peih ngak. Puac thun 2020, tatua Thủ Thiêm 2 ngak hu labaih 70%. Urak ni karja ban raya kham merat ngak bruk song dom gah pagam tal piah samar mek taneh ka danak dak.

Jaik 4.000 lít menyek DO tame ia hu ba tagok truh gilai Bạch Đằng karam di bhum tasik Mũi Né, ban Phan Thiết, tỉnh Bình Thuận, hu ba tame sang mac hlang ngak hacih tui quy định. Hadei di tuk taong abih dom menyek nan hu njuk tagok piah plaih bruk nerak tachrauk alam moi truong, dom jalan ngak piah srong gilai Bạch Đằng tagok, langayh dom bau par di nhiệt điện karam trun daok hu peih ngak. Gilai Bạch Đằng pajeng hu labaih 2.500 tấn, pajeng labaih 2.200 lít menyek DO saong 1.500 tấn dhun mun meng dang karam trun tasik harei 14/3. Taong abih 7 urang angaok kapal gilai patuah hu sraong tagok.

Bộ Chỉ huy BĐBP tỉnh An Giang brei thau, hu 61 urang tame negar suan hukum meng Campuchia tame tỉnh An Giang harei 20/3, njauk gah Biên phòng pabah mbang negar pakat dunya Tịnh Biên chap khik, brei dok karei piah pacang caga jit Covid-19. Tui panuac khan di gah chức năng, nyaom urang nan jeng lac urang Chăm, dok di huyện An Phú (An Giang), rilo meng lac urang ngak tapa Campuchia ngak mbang pah labaih sa thun ni mai. Kayua jit ruak Covid-19 srau kadau, nyaom urang ni duah jalan mai veik palei An Giang.

Dunya hu jaik 124 trieu urang njom ruak, labaih 2 trieu 7 rituh urang metai kayua nCoV. Hadei di tuk urang birau njom mbak rilo tagok, jabat Thủ tướng Đức Angela Merkel ba tabiak dự thảo brei dui atah tukvak pacang cakak Covid-19 tapa bilan ka 5, daok brei dui atah tal harei 18/ 4. Di Mỹ, Pasak Pasang iek saong Pacang caga Jit ruak di taneh ia ini brei thau kuhria tal harei 21/3 hu klauk jru ka labaih 124 trieu mbang vaccine Covid-19. Bruk klauk jru vaccine Covid-19 samar nan yau ngak brei rilo urang Mỹ mboh cadu hatai, iek lap dom jalan pacang caga jit.

Toà án Hukum negar Niger brei thau ong Mohamed Bazoum lac Tổng thống bahrau di negar ni. Bruk tagok rai hu peih peih tabiak di harei 2/4. Dahlau di nan, Tổng thống dok ngak lac ong Mahamadou Issoufou likau padeih hadei di 2 mbang ngak Tong thong, peih jalan ka bruk palih ruah dân chủ. Tapa mbang ka 2 di bruk palih ruah, tổng thống di Niger njauk gah đối lập cagar veik biak khang, rah tabiak bruk tong paoh gauk ngak ka rilo menuac metai.

Ban Seville di Tây Ban Nha danei angan haong sa janih baoh yau yamen bingi siam ka prein yawa nan lac baoh kruac. Lingiu di nan, baoh kruac di labik ini daok hu ngak jeng điện sinh học. Dom labik ngak hu blei tame labaih 35 tấn kruac khut, ngak tabiak labaih 1.500 kWh điện. Tây Ban Nha ba tabiak jalan ngak caong khin salih abih hệ thống điện tapa pandar baoh kayau klak ngak tabiak điện di thun 2050, padeih abih dom nhiệt điện. Labaih 1/5 kadung jien karja hu buh brei ka dom jalan ngak patrun patakik gaok kan kandah di biến đổi khí hậu.

Urang lang: Hani Pha – Ái Nghiêm – 22/03 11:23:33