Peih pakak harei tapuk Việt Nam mbang ka 8 di tỉnh Ninh Thuận

Tui Mentri Pato Megru, bruk peih ngak danak dak pato pho thong birau ngan saong tal bac 2, tal bac 3 di rilo tỉnh, ban daok gaok kan kandah kayua kurang gru pato, abih di nyu nan lac môn Ngoại ngữ saong Tin học. Meyah kuhria njauk định mức tui pakat bac ye dalam negar kurang labaih 70 ribau gru pato, rilo abih lac pakat mầm non saong tiểu học. Piah langyah ka bruk ini, Mentri Pato megru pambuak saong Mentri Nội vụ khan brei Rajaei ba tabiak Sarak 102 thun 2020 ka bruk biên chế gah pato megru saong y tế. Tui nan tacei pato dom palei brei pasang iek, palih ruah tame, pandar ngak dom urang gru patao tui danak dak pho thong birau.

Sở Thông tin Truyền thông pambuak haong Sở ilamo, Thể thao saong Du lịch tỉnh Ninh Thuận bahrau peih pakak harei tapuk Việt Nam mbang ka 8. Ngan haong kadha “tapuk- lac ilammo oh abih” meng ni tal harei 24/4, di Gilang tapuk tỉnh rah tabiak dom bruk ngak hu makna praong yau ye: rami ramik tapuk nghệ thuật, parang iek tapuk pabak; pacacah yaih khan tapuk; pacacah cih thaot binguk, ruah duah online “tapuk, Thư viện saong raidiuk”. Langiu di dom gian hàng yaih khan, parang iek tapuk di dom gah ngak tapuk di dalam tỉnh ngan haong 1.000 kadha biak rilo. Bhap bini mai tal ni meda hu puac tapuk oh lahik jien, blei tapuk ngan haong yaom trun meng 15-20%.

Công an quận Cái Răng (ban sit Cần Thơ) daok ngak harak gar piah taong phat bruk anai dara umo 24 thun khik piah 71 búp bê Kumanthong. Tapa duah thau, công an duah mboh labik di phường Hưng Phú kayua Thái Thị Yến Nhi ( umo 24 thun) pah ngak labik pablei salih, mboh pambak tame hukum tín ngưỡng, yang mebang piah pablei salih pandap oh thau meng halei mai. Công an daok ngak harak gar piah langyah, taong phat bruk ngak suan nan.

Cục khik ramik darak pasa tỉnh An Giang bahrau duah mboh, pataom mek labaih 3 tấn pandap mbang chay oh thau asal cambaih di dom labik pablei salih praong di ấp Hậu Giang 1, xã Tân Hòa, huyện Phú Tân. Sang pablei salih kayua muk Phan Thị Bích Tuyền, umo 38 thun ngak po ngak tabiak pandap chay oh hu harak chứng nhận ginup tanut salamat pandap mbang saong harak eng drei brei thau pandap tui adat hukum, dom pandap hu duah mboh di labik ni lac labaih 3 tấn pandap chay, yau ye chả lụa ikan, chả nấm saong rilo pandap karei.

Jabat Cảnh sát Môi trường Công an tỉnh Kiên Giang birau pambuak saong Bein negar Phú Quốc, Công an xã Bãi Thơm (ban sit.Phú Quốc) jak ba sa urang jao brei 58 drei kra nduh haluk praong, trak abih tih 40 kilo. Tui nan, sang muk Lâm Thuỳ Phương (ngụ xã Bãi Thơm) raong kareih 58 drei kra nduh piah ngak iek mekre. Hadei di tuk pang langyah ini lac janih anek glai njauk brei khik ramik tui hukum dunya, bruk raong kareih nan lac suan, muk Phương halan hatian jao brei 58 drei kra nduh nan ka jabat karja raong saong piah peih palao tame glai.

Gah Y tế dunya kakei dom negar châu Phi jhui klaak dom janih vaccine caga Covid-19 abih harei pandar, bo njauk khik veik saong cang panuac pato tacei hadei. Panuac ieu kakei hu ba tabiak hadei di tuk Ma-la-uy saong Nam Xu-đăng brei thau lac meda klaak labaih 70 ribau mbang vaccine caga Covid-19 di AstraZeneca. Min pasak pasang iek, pacang caga jit ruak châu Phi brei thau, hu taduan panuac khan lac dom vaccine ni jeng daok salamat piah pandar. Bruk klauk jru vaccine di châu Phi daok rahtabiak dalam suai damuai, sa gah lac kayua gah pabak saong kayua hatai saneng huac kan kandah di bhap bini.

Tổng thống Colombia Ivan Duque brei thau, taneh ia ini brei pala 180 trieu phun hijao di thun 2022 saong pasiam labaih 300 ribau ha taneh bilau. Ini lac kham merat di Colombia piah khik ike glai saong pacang caga biến đổi khí hậu. Kuhria tal bilan 12 ini, Colombia meda pala hu 120 triệu phun kayau hijao. Ini lac sa dalam dom bruk caong khin di Colombia dalam bruk mesruh saong bruk glai taha metai. Tổng thống Duque ndom lac taneh ia ini meda trun 51% dom khí tathuak tabiak ngak hiệu ứng sang camin di thun 2030.

NASA brei thau, sa jamraik angaok gilai pasang iek patuk pui Perseverance ngak tabiak hu mẫu ô-xi camriep meng patuk pui. Dom ô-xi camriep hu ngak tabiak lac biak takik tok trak 5 gram, samu haong 10 minit ô-xi yuak yava. Tui NASA, bruk ngak tabiak hu ô-xi peih tabiak bruk lac anak tal, dom urang pasang iek patuk pui meda pandar ô-xi piah suak yava tuk roh duah di mangaok baoh taneh nan./.

Urang lang: Ái Nghiêm – Thu Thảo – 24/04