Akaok UBbhap bini ban raya HCM brei pandap ka urang kathaot 

Tui Mintri Lao động - Thương binh saong Xã hội, hadei di 1 bilan peih ngak Sarak 68/NQ-CP ka dom bruk daong urang ngak haong menuac pandar urang ngak gaok kan kandah kayua jit praong Covid-19 (ieu katut lac Sarak 68/NQ-CP) haong Sarak 23/2021/QĐ-TTg, dom urang ngak hu daong blaoh dalam negar lac labaih 13 triệu urang, ngan saong yaom jien daong lac jaik 6.000 tỷ đồng.  Tui nan,  ban raya Hồ Chí Minh hu taduan mek saong daong tal tangin bhap bini, tal urang ngak 788 tỷ đồng. Bình Dương hu taduan 349 tỷ đồng…   Bruk njauk uan tabuan lac taong abih dom tỉnh, ban kham merat tame bruk ba mai siam lagaih saong samar drah. Tapa nan, dalam taneh ia hu yaok pluh triệu rahra hu mbang tui sarak, yaok triệu urang ngak hu daong jien.

Harei 16/8, Phó Thủ tướng Lê Minh Khái hu mbaoh tangin tame Sarak brei buh tabiak oh mek jien 4.118 tấn brah khik piah di negar brei ka dom tỉnh Bình Phước, Bạc Liêu, Sóc Trăng piah daong ka bhap bini gaok kan kandah kayua jit ruak Covid-19.  Tui nan, tỉnh Bình Phước hu daong 560 tấn brah. Tỉnh Bạc Liêu hu daong 637 tấn brah. Tỉnh Sóc Trăng hu daong 2.921 tấn brah.

UBND TP.HCM hu panuac ieu lac meng harei 1-9 tal harei 15-9, dom gah peih bruk klauk vắc xin lingiu kapul hu klauk dahlau piah mek hu 70% dom menuac umo labaih 18 thun hu klauk mbang 1. Gam haong nan, meda peih praong bruk klauk ka urang umo meng 12-18 thun meyah hu vắc xin lagaih haong umo thun nan.

Mintri Y tế hu peih ngak iek bruk taong ruak F0 di sang. Jalan ngak ini hu daong ka taong abih urang ruak hu tui iek gah y tế, trun bruk metai lahik. Kadung jru “an sinh” meda lac jalan daong meng prein yava tal hatung hatai chreih chrai piah ka rahra jayah COVID-19. Yaok kadung jru hu 7 janih jru piah daong paglaong prein yava saong patrun dom ruak kik pandiak harao ka dom F0 daok taong ruak di sang. UB bhap bini phường 1, quận Tân Bình TPHCM hu jao 100  kadung jru an sinh , angaok yaok kadung hu gam mã QR, piah ka urang ruak meda quét mã saong hu mbaok tame ứng dụng Zalo "Bác sĩ nao gam haong F0 - phường 1" piah hu daong.

Mesup ini 17-8,  UBMT negar Việt Nam ban raya HCM hu taduan 10 sruh radaih ô tô County 29 labik daok, kayua Cty cổ phần Tập đoàn BRG haong Gilang pariak TMCP Đông Nam Á (SeABank) daong brei. Hadei di tuk taduan, radaih hu ba brei dom labik lac: Sang iek ruak Nhi Đồng 1, Sang iek ruak Ung Bướu labik ka 2, Sang iek ruak phục hồi chức năng, Sang iek ruak dã chiến ka 6, Sang iek ruak Covid-19 di huyện Củ Chi, Sang iek ruak truyền máu huyết học haong Sở y tế.

Hãng jru Pfizer/ BioNTech harei kabroi (16/8) hu pok harak pathau khan tagok urang ngak praong gah y tế Mỹ brei thau ka bruk ngak iek, taong yaom siam lagaih di mbang klauk ka 3 vắc xin pacang Covid-19 di hãng ini. Tapa nan mboh lac, mbang klauk ka 3  vắc xin pacang Covid-19 daong patagok biak rilo kháng thể di menuac hu klauk. Ini lac sa kham merat di Phai-dơ haong Bai-ô en tếch piah likau jabat chức năng Mỹ brei adat klauk pabak  vắc xin mbang 3 ka taong abih urang Mỹ, piah patagok tanut khik caga anak dom biến chủng di vi-rút Sars Cov-2.

Washington ginum biai njauk gauk haong Taliban lac gah Taliban oh ba tangin tame ngak hagait tal dom mbang par di Mỹ ba menuac meng mblang kapal haok dunya Kabul.Harei 16-8, 1 urang ngak praong di Mintri Quốc phòng Mỹ brei thau, taneh ia ini brei padeih taong abih dom mbang par ba menuac tabiak meng mblang kapal haoh Kabul kayua hu biak rilo menuac ba gauk tal mblang kapal haok ini piah duah jalan tabiak truh Afghanistan. Min urang ngak praong nan brei thau, bruk padeih nan oh thau dui atah dalam tukvak hadom. Tui CNN, daok hu jaik 3.500 menuac ngak di Đại sứ quán Mỹ di Afghanistan daok cang hu pajeng nao, gam haong rilo menuac Afghanistan ngak bruk ka Mỹ haong diuk anek, gauk gar dom urang nan.

Hãng tin AFP ba panuac sa urang ngak praong dalam karja Tổng thống Mỹ Joe Biden brei thau, Taliban oh hu adat pandar hagait di Afghanistan daok hu khik piah dalam dom tài khoản di Mỹ.Tui Kadung jien dunya (IMF), kuhria tal puac bilan 4-2021, abih tih jien khik piah di Gilang pariak pakat negar Afghanistan lac 9,4 tỉ USD. Urang thau cambaih bruk nan khan lac, jaik abih dom jien khik piah nan jeng hu khik piah di gah langiu taneh ia Afghanistan. Urak ini oh ka thau cambaih dom yaom jien khik piah di Afghanistan hu khik piah di Mỹ lac hadom./.

Urang lang: Mousaphuong -17/8