Rilo lo jru hu ba tame negar drei 

Di mbang ginum biai online iek veik 6 bilan akaok thun saong ba tabiak jalan ngak, bruk ngak dalam 6 bilan puac thun, Uỷ ban bangsa brei thau meda pataom tame ngak salah pathau khan, roh duah danak dak bruk ngak negar payua tagok Thủ tướng rajaei, Quốc hội piah parabha kadung jien ka dom tinh, bal peih ngak chip dalam thun 2021. Gam haong nan, pambuak bruk padang ngak saong pathau khan bruk buh jien tame ngak ka danak dak padang ngak palei pala bahrau, danak dak patrun kan kathaot khang kajap tukvak 2021- 2025. Thun ni, yaom lac gaok rilo kan kandah kayua jit ruak Covid-19, Uỷ ban bangsa jeng kham marat peih ngak dom sarak bangsa di bhum bhap bini bangsa takik saong bhum ceik, sangka  raidiuk, bruk ngak mbang, ngak huak ka dom baoh sang kan kathaot.

Tui mintri Lao động Thương binh song Xã hội, mbang jit  Covid-19 ka 4 ngak kan kandah tal bruk pasiam veik  bruk ngak song  jien mek tame di urang ngak dalam quý 2, abih di nyu nan lac di Hà Nội, TP.HCM song dom tỉnh karei karei. Tui panuac khan meng  Tổng cục Thống kê, dalam quý 2 thun ni, dalam negar hu jaik 13 triệu urang meng 15 thun tagok njauk gaok kan kandah meng jit Covid-19 kayua lahik bruk ngak, takik bruk atau salih gauk ngak, trun tuk vak ngak bruk, trun jien bilan… Mbang jit  Covid-19 meng harei  27/4 mbiah tal harei ni  ngak ka 1 triệu 800 ribau urang ngak oh hu bruk ngak.

Tui Mintri Y tế, meyah vaccine Covid-19 hu takik ye brei pandar dahlau vaccine di Pfizer piah klauk mbang 2 ka dom urang hu klauk mbang ka 1 vaccine AstraZeneca meng 8-12 adit, mayah urang klauk jru njauk hatai. Dom urang klauk jru ni njauk hu tui iek prein yava catang jang hadei di tuk klauk jru. Di Việt Nam, kuhria tal harei 14/7, hu labaih 3 triệu 7 rituh ribau urang hu klauk mbang ka 1 vaccine AstraZeneca, labaih 280 ribau urang hu klauk ginup 2 mbang vaccine AstraZeneca.

Meng mon 12 kreh melam 15/7, tỉnh Bình Thuận peih bruk paatah di gauk dalam ban sit La Gi tui sarak 16 di Thủ tướng rajaei. Dom labik ngak pandap, pablei salih hu rilo urang ngak yau Công ty Cổ phần jhik Bình Thuận - Nhà Bè brei hu jalan khik kajap salamat, pacang caga jit yau dang atah gauk di dom labik ngak, bruk nao mai, mbang huak, ndih daok ka urang ngak. Bình Thuận hu jalan pabak pandap panda ka bhap bini, hu panuac kakei rahra dok dalam sang, tok tabiak gah langui tuk hu bruk njauk nao  …

Dah page ni (15/7), tỉnh Ninh Thuận hu 7 urang njom Covid-19 bahrau, dalam nan hu 5 urang dalam 1 baoh sang. Pasak pasang iek ruak kik Ninh Thuận brei thau, urang ruak lac urang peih radaih njom ruak meng darak đầu mối ban Thủ Đức, TP.HCM; diuk saong 3 anek di urang ni njom mbak tabiak rahra. Rajaei pak ni hu pacang cakak khu phố 4, ban sit Phước Dân, huyện Ninh Phước saong khu phố 5, phường Phủ Hà, ban Phan Rang - Tháp Chàm piah pruh jru pametai anek ruak, pasang iek manuac taom gaok jaik, mek mau dut iek. UBND tỉnh Ninh Thuận brei thau lac ngak dom bruk samar drah ka pacang caga jit Covid-19 dalam tỉnh meng mon 12 melam (15/7).

Gah Y tế dunya (WHO) brei thau, dalam thun 2020, jit praong Covid-19 ngak ka jaik 23 triệu uranaih oh hu klauk jru njauk tui harei sanya. Ini lac bruk glaong abih dalam labaih 10 thun tapa, ngak brei tamuh tabiak dom jit ruak yau sởi, bại liệt haong rilo jit ruak meda pacang caga hu. Dalam dom taneh ia hu dom uranaih oh hu klauk jru njauk harei sanya glaong abih, Ấn Độ haong Nigeria lac 2 taneh ia dang akaok. Dom mbang tamuh jit sởi di dom labik yau Afghanistan, Somalia haong Yemen ngak kan kandah trak tal prein yava di uraniah dom taneh ia ini.

Sa sruh jit Covid-19 hu mboh dalam sa khách sạn di ban Hamamatsu. Ni jeng lac labik daok di yaok pluh urang di kapul pakacah Olympic Brazil di Nhật Bản. Tui Reuters, 7 urang ngak dalam khách sạn dut iek mboh dương tính haong SARS-CoV-2 dalam mbang dut iek yaok harei. Yaom lac daok oh ka tal 9 harei tra lac tal harei peih pakak min Tokyo Olympic jeng ka oh mek hu bruk pachreih tui di manuac sia dalam tuk bruk mbuan njom mbak jit ruak daok tagok glaong saong ban ine jeng daok dalam bruk samar drah.

Gah Taliban di Afghanistan bahrau meblah hu quyền pasang iek sa ban sit tapen jalan negar di tỉnh gah merong Kandahar, labik hu pabah mbang negar haong Pakistan. Tapa bruk ini brei mboh Taliban dok hu mbaok pacang vil taom dar saong daok meblah mek dom labik praong di Afghanistan. Rajaei  Afghanistan brei thau, bruk dom pabah lamnge prong  di negar ni laik tame tangin  Taliban ngak dang veik bruk pablei salih tame tabiak negar, ngak kan kandah tal dom bruk ngak kinh tế./.

Urang lang : Thu Thảo -Hanipha- 15/7