Baqn rayo hu klauk jru mbang ka 2 ka rilo rahra 

Tui Pasak pasang iek ruak kik TP.HCM, urak ini hu 11 labik dalam ban brei thau lac pasang iek hu jit COVID-19 tui dom kadha di Mintri Y tế nan lac dom quận: 1, 3, 5, 7, Gò Vấp, Phú Nhuận, Tân Bình; dom huyện: Củ Chi, Cần Giờ, Nhà Bè haong ban Thủ Đức. Tui kuhria, mesup ini TP họp báo brei thau ka dom bruk pacang jit meng harei 1/10. Dalam mbang jit ka 4, tal urak ini, TP.HCM hu abih tih 380.870 urang njauk COVID-19 hu Mintri Y tế khan brei thau saong hu 7 mbang patagok bruk paatah di gauk, dalam nan hu labaih 80 harei ngak tui Sarak 16 di Thủ tướng Rajaei.

UBND tỉnh Bà Rịa-Vũng Tàu melam 29/9 hu harak samar drah ieu brei padeih bruk ngak di Sang mac ba-ar Sài Gòn piah pacang caga jit COVID-19 mbiah tal tuk hu panuac khan bahrau. Pasak tacei pato pacang caga jit ban sit Phú Mỹ ieu urang pan akaok sang mac ngak chip dom jalan pacang caga jit tui adat, samar dut iek piah ba F0 tabiak. Dahlau di nan, pak ini hu 1 urang dut iek PCR mboh dương tính saong 6 urang test samar jeng mboh dương tính. Sang mac ini jeng hu rilo radaih pajeng pandap tame tabiak.

Melam 29/9, Cảng ikan Đông Hải di TP. Phan Rang – Tháp Chàm jeng brei padeih ngak piah pacang  caga jit tui panuac ieu di UBND tỉnh Ninh Thuận. Dahlau di nan, UBND TP. Phan Rang- Tháp Chàm pandar Sarak 16 di Thủ tướng Rajaei di phường Đông Hải, kayua mboh hu rilo menuac njauk COVID-19 dalam bhap bini. Kuhria tal biar harei 29/9, dalam tỉnh Ninh Thuận hu 939 urang ruak COVID-19.

Tui kuhria, thun bac 2020- 2021, sang bac caga Đại học bangsa Trung ương pato pakai hu 45 khóa, ngan haong labaih 21.000 anek saih lac bangsa takik tame dom sang bac đại học, cao đẳng dalam taneh ia saong dunya, dalam nan hu labaih 200 anek salih lac bangsa biak takik manuac, yau ye Ngái, Lự, Mảng, Si La, Cờ Lao, La Chí, La Hủ, Cống, Pu Péo, Bố Y, Lô Lô. Rilo rai anek saih di sang bac ini hu bac tamat saong daok ngak bruk di grauk tinh, bal dalam taneh ia. Rilo anek saih bac tamat blaoh jeng dom urang jakar naih joi, ngak praong dalam dom jabat di Đảng, Kanja meng Trung ương tal bhum palei.

Kayua jit ruak COVID-19, tuk uan Sêne Đônta thun ini, Trà Vinh oh peih bruk taom mbaok yau yaok thun, salih tame nan, Tỉnh ủy, HĐND, UBND, UBMT negar VN tỉnh padang dom kapul nao ravang, alin hadiah pandap ka 203 sang sarak karja, urang jakar padeih hưu, yaok sang 1 triệu đồng; ravang saong alin hadiah pandap brei ka 26 baoh baha Khmer praong, yaok baha 2 triệu đồng. Daok mban Bangsa tỉnh hu padang dom kapul nao ravang, alin hadiah pandap brei ka 412 urang hu angan je dalam bhap bini bangsa takik, yaok pok pandap yaom 500.000 đồng. Di dom labik nao ravang, kapul hu tadhau ayuh dom urang taha dahlau daih ngak cách mạng, dom sư sãi haong bhap bini, phật tử Khmer raok Sêne Đônta dalam bui sambai, salamat, patak pataom.

Pasak pasang iek saong pacang caga jit ruak Mỹ (CDC) tabiak panuac ieu patagok bruk klauk vaccine ka urang kumei metian piah pacang ruak trak atau metai kayua COVID-19. CDC brei thau, bahrau hu 31% dom kumei metian di taneh ia ini hu klauk vaccine COVID-19, dalam tuk 97% dom kumei metian tame sang iek ruak jeng oh ka hu klauk vaccine. Urang jakar Mỹ brei thau, bruk klauk vaccine di urang kumei metian daok tagaok, min jeng mboh takik jang duk haong dom kapul menuac urang karei.

Gah Taliban daok pan karja di Afganistan bahrau peih tabiak sa danak dak piah ngak brei lahik dom labik khin tamuh tabiak di kol IS  di taneh ia  Nam Á ini. Hãng tin Khaama di Afganistan brei thau, Taliban brei taong tame piah palai dhar di IS daok di ban ine Kabul saong tỉnh Nangarhar jaik taphia negar Pakistan. Taliban tagok pan karja di kreh bilan 8 min gaok bruk palai pajoa di kol IS. Dalam nan hu bruk taong tame mblang kapal haoh Ka-bun harei 26/8 ngak ka jaik 200 urang metai, dalam nan hu 13 urang Mỹ saong dom menuac di Taliban.

Trung Quốc hu peih pakah jalan pasei pambuak ban Thượng Hải haong ban Hamburg di Đức, jeng lac peih tabiak bruk pajeng ba pandap meng jalan pasei tapa negar camriep abih di Pasak kinh tế - pablei salih ini di Trung Quốc haong châu Âu. Sruh radaih pui hu 50 container pandap hu peih nduac atah labaih 10.000km dalam 2 adit piah tal Hamburg. Tui kuhria meda hu rilo sruh radaih pui yau nan dalam thun ini./.

Urang lang: Thu Thảo -Ái Nghiêm -30/9