Dom urang ruak trak rilo meng lac oh ka klauk ginup 2 mbang vaccine COVID-19

Mentri Y te birau payua sarak drah samar brei thau lac mbuan rah tabiak bruk jit ruak kateik angaok gauk dalam bilan Đông Xuân ini. Mentri Y te kakei dom tỉnh, ban brei padang jalan caga dahlau piah pacang dom bruk jit ruak di labik drei ka nyu cambaic laic, tantu, meda peih ngak hu, khik kajap salamat, sami samar, pasang iek hu siam jit ruak Covid-19; dalam nan pataom tame jhul samar bruk klauk vaccine ka bhap bini; caga padang dom Balai Y tế lưu động di dom labik jit ruak tamuh; brei hu ginup jru taong ruak, mac jamraih y te; labik pacang, bruk pa-atah di gauk hu peih ngak sit. Gam haong nan, iew dom tỉnh, ban jhul khang dom bruk pacang caga jit pandiak tabiak darah; samar peih bruk klauk jru vaccine pacang dom ruak yau: sởi, rubella, ho gà...

Tui Sở Y tế ban raya Hồ Chí Minh, dom urang ruak COVID-19 trak tagok, metai lahik dalam dom harei tapa di ban raya tagok glong. Dom urang ruak trak rilo meng lac oh ka klauk ginup 2 mbang vaccine COVID-19. Muk Nguyễn Thị Huỳnh Mai, Chánh văn phòng Sở Y tế ban raya Hồ Chí Minh brei thau, di dom labik công cộng jeng dok hu bruk menuac urang oh cuk pataih pacang mbaok. Meng harei ni tal puac bilan 11, ban raya Hồ Chí Minh brei padang 19 kapul pasang iek bruk pacang caga jit COVID-19 song pasiam veik kinh tế di dom quận, huyện song ban Thủ Đức. Ban raya daok kham merat pacang caga jit, khik caga pren yava rahra, dui trun tal tanut bier di abih urang tame sang iek ruak song metai, pakhang bruk y tế song dak harei dak pasiam patagok kinh tế - xã hội, salamat, sami samar, kein lagaih.

Kapul thanh long tỉnh Bình Thuận birau hu dom panuac payua tagok UB bhap bini tỉnh Bình Thuận piah lang talaih dom kan kandah bo dom D.N pablei salih baoh thanh long tabiak negar langiu daok tavak. Tui nan, Kapul thanh long Bình Thuận caong UB bhap bini tỉnh pambuak haong dom mentri, dom gah di Trung uong ndem biai nao mai saong dom jabat chức năng Trung Quốc brei ngak njauk tui Hiệp định pablei salih labik taphia negar di dua taneh ia; Ba tabiak sarak, jalan ngak dahlau hadei oh salih karei ka bruk pablei tabiak negar langiu tui jalan tiểu ngạch di taong abih dom pabah mbang gah Barak negar tui jalan suai lavik saong tani tanat. Langiu di nan, kapol jeng hu panuac tal dom gah pambuak tal brei hu jalan daong dom D.N, pablei thanh long tabiak negar langiu di tỉnh. Urak ini, labaih 80% baoh thanh long that di tỉnh hu pablei tapa Trung Quốc tui jalan tiểu ngạch.

Urak ni yaom cà phê asar dalam tỉnh Đắk Lắk lac 41.200 đồng/sa kg, ni lac yaom glong abih kuhria dalam 4 thun meng bloh. Yaom lac yaom khak drak , pandap ngak nong, urang ngak jeng tagok glong, min dut song yaom yau urak ni, urang pala cà phê jeng dok hu laba. Gam haong cà phê, bei plom di Tây Nguyên dok yam tame bilan buac mek pablei song hu yaom. Ong Trịnh Văn Xuân, Tổng Yam ndoc Công ty CP Focecov Tây Nguyên brei thau, tui kuhria thun ni, cty blei tame 100.000 tấn bei. Vụ ni, bei mek hu năng suất glong, meng 25-30 tấn/sa ha. Tui yaom urang mai blei meng 2.700-3.200 đồng/sa kg, urang nong hu laba meng 30-60 triệu đồng/sa ha.

Tukvak tapa, tỉnh Long An hu pataom rilo jien padai, prein yava piah ngak pasaim jalan mbak, abih di nyu lac dom jalan tame palei, labik taphia negar. Yau nan min, di huyen Tân Hưng, rah tui jalan tỉnh 819 di xã taphia negar Hưng Điền bhap bini nao mai angaok jalan jeng daok nao angaok dom jalan mbaih mbaoh, khut trak. Bhap bini labik ini tuk halei jeng daok dalam labik nerak tachrauk saong huac jhak tal prein yawa luac labaih 20 thun tapa. Ong Trần Văn Tám, urang daok di xã Hưng Điền, Tân Hưng, Long An brei thau, dahlau diah jalan hu tuh patau bhong min mbiah tal ini jalan khut trak. Kayua yau nan ye, tuk padang ngak palei pala birau, mikva caong khin karja buh jien tame ngak jalan tuh menyek piah nao mai hu mbuan lagaih jang, abih di nyu lac dalam bilan hajan.

Thủ tướng Anh song Tổng thống Prang njauk gauk brei jhul khang dom kham merat haong gauk piah pacang cakak bruk urang di cư tapa jalan negar tame Anh tapa jalan tasik Manche. Bruk ni hu batabiak hadei di bruk 27 urang di cư metai tuk sruh kapan cao su pajeng dom urang nan tabaleik. Dahlau di nan , Tổng thống Macron hu panuac ieu peih sa mbang ginum biai samar di dom akaok mintri châu Âu, song hu panuac sinya duah dom urang ba tal bruk pandik harao nan. Bruk tabaleik ghaiy pajeng urang di cư harei 24/11 di langiu tasik gah brak negar Prang ngak brei 27 urang metai. Dom urang di cư ni mai meng negar halei oh ka thau cambaih.

Dom urang ilamu birau duah mboh sa biến thể birau di virus SARS-CoV-2 hu rilo karei oh ka bhian mboh. Nan lac biến thể B.1.1.529 hu 32 đột biến protein daruai. Dom đột biến protein daruai meda ngak kan kandah tal virus njom mbak saong pambak tal dom te bao, min jeng meda ba tal dom tế bào pacang hu ruak kan taong tame anek ruak jang. Bruk nan ba tal haduh hatai lac nyu meda jhul tagok dom mbang jit ruak atah jang.

Yam ndoc pasak roh duah Dịch tễ học song Vi sinh vật học pakat negar Gamaleya di Nga brei thau, yaom lac siam lagaih biak biai ka oh hu duah thau ginup abih, min tal tuk vak ni oh mboh hu hagait rah tabiak ngan song dom urang hu mbaok tame ngak iek bruk pandar vắc-xin pacang COVID-19 janih xịt tame dhung. Ni lac janih vắc-xin hu mong lac siam lagaih jang duk song janih jru klauk meng kan, hu prein khik caga phổi – labik gaok ruak khang meng virus SARS-CoV-2. Nga dok dang anak mbang jit COVID-19 ka 4 biak trak, hu yaok ribau menuac metai yaok harei dalam labaih sa bilan tapa. Min bruk klauk vắc-xin di taneh ia ni jeng dok bier./.

Urang lang: Hani Pha – Bhumi – 25/11 19:00:00