Meng ini tal harei 1/7/2022, jabat thuế pachreih bhap bini, doanh nghiep pandar hoa đơn điện tử tui quy định birau

Tui Tổng cục Thuế, meng harei 1/11, gah thuế brei pandar hóa đơn điện tử di dom tỉnh, ban. Tukvak ka sa meng harei 1/11 brei ngak iek di 6 tỉnh, ban lac Hà Nội, TP.HCM, Bình Định, Quảng Ninh, Hải Phòng saong Phú Thọ. Tukvak ka dua, peih ngak meng bilan 3 di 56 tỉnh, ban daok veik. Tổng cục Thuế ndom lac meng ini tal harei 1/7/2022, jabat thuế pachreih bhap bini, doanh nghiep pandar hoa đơn điện tử tui quy định birau, piah caga ka bruk peih ngak meng bilan 7 thun 2022 hu lagaih.

Mintri Y tế brei thau meng bilan 11/2021, bruk klauk vaccine pacang COVID-19 ka uranaih hu peih ngak dalam taneh ia song janih vaccine Comirnaty kayua Pfizer-BioNTech di Hoa Kỳ ngak . Ni lac janih vaccine hu gah Y tế dunya ieu klauk ka uranaih song hu rilo taneh ia pandar, khik siam mekre ka uranaih. Vaccine pacang COVID-19 Comirnaty di Pfizer-BioNTech hu brei klauk ka uranaih umo 12 thun tagok. Jru pacang hu ruak COVID-19 meng 95% tal 100% hadei di tuk klauk mbang ka 2 labaih 7 harei.

UB bhap bini tỉnh Bình Dương payua harak samar ka bruk peih klauk vaccine Covid-19 ka uranaih umo meng 12 -17 thun dalam tỉnh. Tỉnh kham merat klauk jru ka taong abih uranaih umo nan di dom sang bac, dom labik daong bruk xa hoi saong di dom labik dalam tỉnh. Uranaih umo klauk jru lac labaih 180.000 urang; tukvak caga peih klauk meng harei 31/10. Dahlau di nan, Sở Y tế tỉnh Tây Ninh jeng ginum biai, caga blaoh blai bruk klauk vaccine ka uranaih umo meng 12 tal 17 thun dalam tỉnh ngan saong labaih 100.000 mbang urang.

Tui yaok pataom ka oh ginup abih, kuhria tal abih harei 28.10, dalam negar hu 21.600 urang bangsa takik njom SARS- CoV-2, dalam nan bhum Tây Nam Bộ hu labaih 2.000 urang, gah kreik negar - Tây Nguyên labaih 3.000 urang , ban raya Hồ Chí Minh- Đông Nam Bộ hu 13.800 urang, dom tỉnh gah brak hu 2.600 urang song hu 94 urang lac anek saih Tsang bac Dự bị Đại học ban raya HCM.

Di Baha Phật Giáo Nam tông Kh-mer Rạch Sỏi, tỉnh Kiên Giang hu 16 ong bhik, 2 urang tui agama saong jaik 100 urang bangsa Khmer dalam labik njom Covid-19 dalam bhap bini. Dalam tuk nan, jalan ba tabiak di tỉnh Kiên Giang lac caga ngak iek bruk raok tuai dunya mai Phú Quốc di puac bilan 11 thun 2021. Kayua yau nan ye, piah khik salamat abih gah ka tuai damuai saong bhap bini labik ini, Kiên Giang brei klauk jru vaccine pacang Covid -19 mbang sa ka taong abih bhap bini di Phú Quốc saong urak daok peih brei klauk mbang 2.

Mintri Y tế Japon kuhria ba tabiak sarak ka bruk klauk veik vắcxin pacang COVID-19 ka rahra negar ni dalam harei 10/11 anak tal. Tui nan dom urang hu klauk ginup 2 mbang vaccine di Pfizer hu klauk veik mbang ka 3, labaih 8 bilan hadei di tuk klauk mbang ka 2. Japon mong iek bruk klauk patagok vắc-xin COVID-19 ka rahra dalam tuk dok duh hatai ka siam lagaih suai lavik di vaccine meng di tuk rah tabiak biến chủng bahrau kan kandah jang.

Bruk ba tabiak ngak tui piah pacang caga Covid-19 di Đức, yau ye pacap cuk pataih pacang mbaok, takik tame wuan bar atau nhà hàng jeng yau dut iek ruak Covid-19 dalm dom sang bac…meda brei klaak di bilan xuan anak tal. Ini lac panuac khan hu ba tabiak hadei harei nyaom akok meti di bruk ginum biai padang rajaei Đức. Tui bruk ba tabiak, meyah dom mbang ginum biai di lien minh hu sron mbon, rajaei anak tal brei tabiak hukum piah brei ka rajaei dom bang eng drei patabiak bruk pacang caga jit.

Dom harei tapa, yaok rituh ribau drei kara kanduk tasik quý hiếm metai di takai tasik Morro Ayuta di bang Oaxaca, gah merong Mexico, labik hu mong lac “bhum taneh ” khik ramik janih athur ni. Makna ba tal metai lac kayua halam tong chap ikan lihik atau njauk urang tong ikan var angaok tasik. Ni lac bruk kara kanduk tasik metai biak rilo trak damak di abih rah tabiak di pak ni. Meng harei 23 tal 26/10, hu labaih 300 drei kara kanduk seik di takai tasik. Di Mexico, ni lac janih athur mbuan si lahik pajaih ./.

Urang lang: Ai Nghiem – Hani Pha – 30/10