Tổng Cục Khik iek darak pasar pambuak bruk saong Cục Khik iek darak pasar Ban raya HCM vaih tame pasang iek 7 kuan pablei pandap

Rajaei bahrau tabiak sarak ka 104/2020 pasiam veik, pabak sarak  ka 53/2015 harei 29/5/2015 di rajaei ka bruk padeih hưu di umo glong jang ngan song urang jakar, urang ngak bruk karja. Tui nan, sarak ka 104 pabak sa bruk lac urang jakar, công chức hu padeih hưu di umo glong jang lac urang jakar, công chức kamei ngak dom bruk lac: Ủy viên Ban Thường vụ Tỉnh ủy, Thành ủy lac urang bangsa takik. Sarak ni hu ngak tui meng harei  4/9/2020.

Tui TS.BS Lê Quốc Hùng, Akok khoa Ruak Nhiệt đới, Sang iek ruak Chợ Rẫy: Gah Y tế dunya (WHO)hu harak brei pabak jru Botulinum taong ruak jru mek ka Viet Nam. Caong lac dalam tukvak katut panak meda taduan hu jru nan. Urak ini, Sang iek ruak Chợ Rẫy pambuak saong Mentri Y tế daok ngak bruk saong dom taneh ia di dunya piah duah jru taong ruak jru mek. Yaom lac jru taong ruak jru mek brei panmdar dalam adit camereip nan siam abih. Yau nan min, tui bruk duah thau di dunya ye meda pandar tuk halei jeng hu, yaom lac bruk taong ruak jru mek meda trun takik min meda dui katut panak tukvak suak yava meng mac di urang ruak.

Tui pathau khan samar ka bruk pasang iek duah thau pacang caga jit ruak  Covid-19, kuhria tal bier harei 8/9 dalam  tỉnh Ninh Thuận oh hu urang halei njom bahrau, langui di  2 urang, urang ruak ka 61, song 67. Dalam 50 urang brei dok paatah di labik dok, jeng hu  45 urang hu dut iek mboh  âm tính mbang 1, 5 urang oh ka thau. Ubbhap bini  tỉnh Ninh Thuận brei adat ka dom labik yau  karaoke, quán bar, pub, vũ trường, labik massage, rạp chiếu phim,… song dom adat cambat agama, likhah caga, dom bruk pataom rilo menuac urang karei karei hu peih ngak veik meng harei 7/9/2020. Min, dom bruk nan brei khik kajap bruk pacang caga  jit ruak.

Tổng Cục Khik iek darak pasar pambuak bruk saong Cục Khik iek darak pasar Ban raya HCM vaih tame pasang iek 7 kuan pablei pandap, dalam nan hu rilo kuan di darak pablei pandap radaih patuh Tân Thành ( Quận 5, Ban raya HCM). Di labik ini, kapol urang jakar mboh hu labaih 33 ribau pandap oh hu harak ba-ar brei thau meng halei mai; oh vak angan labik ngak. Dom pandap pandar suan hukum kuhria tui jien labaih 1 tỷ đồng. Langiu bruk oh ka tut angan pablei salih njauk tui bruk ba tabiak di karja, dom labik pablei salih nan peih blah web oh hu tut angan saong jabat karja. Urak ini, bruk nan daok hu duah thau ngak brei cambaic laic. 

Bier harei kabroi (8/9), Jabat  Cảnh sát pasang iek, Công an huyện Cần Đước (Long An) hu tabiak bruk khởi tố bị can, chap khik  2 bilan ngan song muk Nguyễn Thị Hoa (dok di  xã Long Hòa, huyện Cần Đước) piah pasang iek ka bruk ngak pap amaik pajeng lac amuk N.T.Đ (ndik tapui  1941). Muk N.T.Đ metai di harei 2/9 song hu ba nao am cuk . Dahlau di nan harei 7/9, angaok  mạng xã hội facebook hu  đoạn clip atah jiak 7 minite brei mboh sa urang kamei tong paoh sa muk taha biak kanyah jhak. Muk  Hoa lac urang kamei dalam clip nan.  

Takik di nyu 11 urang metai, 5 urang njauk rambuac saong takik di nyu lac 25 urang lahik tuk sa lubang mỏ patau glut jaleik di tỉnh Khyber Pakhtunkhwa, Tây Bắc Pakistan harei 7/9/2020. Gah daong duah urang gaok laba khan brei thau, jaik abih dom urang gaok bala lac urang ngak bruk di labik ceik mỏ patau Ziarat Ghar pak huyện Mohmand. Bala rah tabiak dalam tuk dom urang nan brei patuh mìn piah mek patau. Urak ini bruk duah daong urang goak bala daok peih ngak dalam sami samar min gaok kan kandah kayua labik ini atah bayah, oh pambuak hu mạng piah iew phone saong riyak di động.

Dalam sa kham merat piah khik tani tanat yaom rilaow pabui di negar ni, dalam 2 harei  10 song 11/9, Trung Quốc hu pablei tabiak  12.900 tấn rilaow pabui meng gilang khik piah tabiak darak pasa. Ni jeng lac bruk pablei rilaow pabui mbang ka 34 dalam thun ni, kuhria abih tih rilaow pablei tabiak darak pasa lac  557.300 tấn meng gilang khik piah rilaow di negar ni. Urak ni, yaom rilaow pabui di negar ni lac 47,91 nhân dân tệ/sa kg (labaih 163 ribau đồng/sa kg) trun hasit dut song  yaom harei 31/8.

Taneh Kubo Pondok Ranggon di gah Easar ban ine Jakarta, Indonesia jaik bak abih, dalam tuk urang metai kayua ruak Covid-19 tagok glaong. Urang khik iek taneh kubo brei thau: Tok daok hu 1.100 labik kubo di gah meraong dalam taneh kubo praong 7.000 met vuong ini. Tal bilan 10, kan plaih hu bruk quá tải. Kuhria rah tapa yaok bilan menuac metai hu dar di taneh kubo Pondok Ranggon lac  700 urang. Di bilan 8, kuhria rah tapa yaok harei hu 27 urang metai ba mai dar labik ini. Harei 31/8, lac ralo abih hu tal 36 urang metai ba mai dar labik ini./.

Urang lang: Ái Nghiêm – Hani Pha – 09/09 10:26:09