Bruk tame tabiak hu yah klaak di rilo labik 

Tui Ủy ban Bangsa, dalam mbang jit ka 4, Ban raya HCM saong Bhum Đông Nam bộ lac bhum hu urang njom ruak Covid-19 praong abih dalam negar. Dalam nan hu 11.112 urang bangsa takik, ralo daok di Long An 1.386 mbang; Đồng Nai 1.250 mbang; Tây Ninh 793 urang; Ninh Thuận 562 mbang...,ta-eng Ban raya HCM hu 6.591 mbang. Akok mentri, Chủ nhiệm Uỷ ban Bangsa Hầu A Lềnh  mboh lac, bhum urang bangsa takik saong bhum ceik urak ini hu jeng bhum hijao, min jit ruak ngak kan kandah tal bruk ngak mbang, raidiuk meda dui atah. Yau nan ye, dom tỉnh, ban bhum urang bangsa takik saong bhum ceik njauk brei peih ngak siam dom sarak bangsa, piah sarak tal bhap bini bangsa takik hu samar abih, lagaih abih.

Sở Y tế ban raya HCM brei thau hadei di jaik 2 adit peih mgak Sarak 18, jit ruak di ban raya daok trun rilo. Tui nan, harei 1/10 dom urang njom COVID-19 bahrau yaok harei lac labaih 3.600 urang min tal harei 12/10 daok 1.018 urang; dom urang njom COVID-19 tame sang iek ruak yaok harei meng 2.046 urang trun daok  886 urang. Abih di nyu nan lac, dom urang metai trun rilo. Tui pathau khan meng Cổng thông tin COVID-19 ban raya HCM brei mboh harei 12/10 hu 64 urang metai, ni lac harei ka 7 dom urang metai daok di tanut  2 laik.

Meng harei ini 13/10, Hà Nội saong Ban raya HCM peih ngak iek dalam sa adit  brei peih radaih pajeng tuai veik. Dahlau di nan, Mentri Jalan mbak pajeng ba iew dom UB bhap bini pakat tỉnh maong tui bruk lagaih piah ngak iek  bruk brei radaih pajeng tuai jalan raya meng harei 13 tal harei 20 bilan 10. Mbiah tal ini, 7 tỉnh ban njauk hatai brei radaih pajeng tuai dom tỉnh nan lac: Điện Biên, TP.HCM, Đồng Nai, Bắc Giang, Quảng Trị, Quảng Bình, Ninh Bình. Tui kuhria dahlau, harei 13/10, dom radaih pajeng tuai di 6 tỉnh, meda peih ngak veik. Ta-eng Ban raya HCM, bruk peih ngak iek daok cang dom sở jalan mbak pajeng ba hu radaih pajeng tuai dom tỉnh mai Ban raya payua harak pambuak bruk peih ngak.

Dah page ini, Bộ Tư lệnh ban raya HCM pambuak haong dom jabat, kapul nyaom daong ba 94 urang di dom tỉnh Kon Tum, Gia Lai mai palei, hadei di tuk mboh kapul urang nao takai meng Long An tal huyện Nhà Bè di harei 12/10. Dom urang ini ngak bruk di labik ngak kong Long Hậu, tỉnh Long An. Hadei di rilo bilan lahik bruk ngak, dom urang ini khang hatai nao takai mai palei. Dah page harei 13/10, 94 urang ini saong 19 urang ngak karei daok ngak bruk di Long An hu daong radaih hu manieng ndih mai palei. Hu thau, tal tukvak ini, Bộ Tư lệnh TP.HCM saong Ủy ban Mặt trận negar ban raya HCM hu taduan angan jaik 2.700 urang tut angan nao palei di 57 tỉnh, bal.

Jabat cảnh sát pasang iek Công an Ban Phan Thiết, tỉnh Bình Thuận birau mek hu rilo kapol nyaom urang ngak ba-ar dut iek ruak Covid-19 ja. Yau ye, tapa tangi sua catang saong kapol nyaom urang birau chap mek kayua ngak ba-ar dut iek ruak Covid-19 ja, cong an chap hu rilo urang karei, di 2 kapol nyaom ngak ba-ar ja karei tra. Urak ini, Công an Ban Phan Thiết daok ngak brei cambaic laic bruk pambuak gauk di 3 kapol nyaom ngak ba-ar ja dut iek ruak Covid-19.

Gah Y tế dunya (WHO) dalam adit ini meda brei thau kapul roh duah bahrau ka asal di jit praong COVID-19, dalam nan hu labaih 20 chuyên gia ngak dalam rilo gah, yau ye vi-rút học, salamat bilik ngak iek, salamat sinh học. Kapul oh lac roh duah asal di vi-rút SARS-CoV-2, bo daok taong yaom bruk tamuh tabiak di sa janih halei ba tal ruak bahrau di harei hadei. Gah Y tế dunya ieu taong abih dom rajaei pambuak bruk piah jhul samar bruk roh duah ka asal di jit praong saong oh ba bruk nan tame bruk chính trị.

Karja Mỹ meda brei atah klaak dom bruk pakauk takik nao mai di labik taphia negar saong Canada saong Mexico ngan saong dom bhap bini hu klauk jru caga Covid-19 meng bilan 11 anak tal. Ini lac mbang akok meti hadei 20 bilan, bhap bini Canada saong Mexico brei adat tame Mỹ tapa dom pabah mbang negar meng jalan tabak meyah urang hu ba-ar klauk ginup jru pacang caga ruak. Dom urang oh ka klauk jru oh brei tame Mỹ kayua nao mai oh njauk bruk. Dahlau di nan, karja Tổng thống Biden brei atah klak bruk pakauk drei yau nan ngan saong urang negar langiu caong khin tame Mỹ.

Meng urak ini tal puac thun, rilo taneh ia Đông Nam Á meda pacadu bruk brei tame negar ka tuai dunya hu klauk ginup vaccine. Harei paguh (14/10), Indonesia peih pambang pulao Bali saong pulao Riau ka tuai mai meng 18 taneh ia, dalam nan hu Trung Quốc, New Zealand, Nhật Bản... Singapore meda peih pambang negar meng harei 19/10 ngan haong dom rahra hu klauk ginup vaccine COVID-19 meng dom taneh ia Canada, Đan Mạch, Pháp, Ý, Hà Lan, Tây Ban Nha, Anh saong Mỹ. Jeng dalam tukvak nan, Thái Lan meda peih pambang viek 5 labik rivang main. Dahlau di nan, hadei di 3 bilan peih pambang, pulao Phuket pachreih hu labaih 43.000 tuai, ba mai labaih 69 triệu USD./.

Urang lang: Ái Nghiêm -Thu Thảo -13/10