Halak mbang tagei lac sa ruak bhian mboh di urang prong song uranaih. Tagei halak mai meng vi khuẩn ngak brei halak mbang tagei, vi khuẩn ni hu meng dom pandap mbang gar veik dalam lin tagei, gam song bruk hacih saat tagei cambuai oh ka njauk, yau nan ye oh palahik hu vi khuẩn. Tuk njauk vi khuẩn mbang tame, nyu ngak khut tal men tagei gah langiu, ngak ka tagei oh dok tamo, ba tal pandik, dui atah. Tuk ni, mboh pandik rilo jang tuk drei mbang menyum oh lagaih.

Pandap jhui mbang piah patrun patakik pandik tuk halak mbang tagei

Pandik tagei halak jhui mbang dom janih pandap yau ni.

   Plaih dom pandap mbang hang, pandiak, pandap nduik, rilaow menuk kayua nyu ngak brei brah rilo jang.

       Dom janih pandap mbang yau kẹo, har, mứt… tuk mbang mbuan gam tame lin tagei, kan vệ sinh hu, ngak jeng labik dok di vi trùng, lavik harei vi khuẩn pataom rilo ba tal halak mbang tagei.

        Takik mbang dom pandap khang, pandap dẻo meda gaok tal tagei dok pandik. Kayua dom pandap mbang khang ngak ka tagei di drei megei khang jang, mbang mameh nyu gaok tal tagei pandik di drei.

Dom janih pandap njauk mbang tuk pandik tagei halak

Piah dong patrun pandik tagei halak song pacang cakak ruak patagok, lingiu bruk jhui mbang dom janih pandap yau ndom angaok nan, drei njauk pabak dom chất dinh dưỡng tuk tagei njauk halak mbang meng dom janih pandap mbang yau hadei ni:

Njauk mbang pandap mbang hu dom chất xơ yau njam patam, boh karaoh, rilaow. Abih di nyu nan lac njam cần, boh ratak meda, cà rố, kruac bung, kruac aik, ratak lô, hạnh đào… Kayua dom chất xơ meda ngak hacih dom cặn bã pandap mbang song dom janih saradang di mbaok tagei, patrun patakik vi khuẩn njom tame tagei

Mbang rilo dom pandap mbang hu rilo vitamin song canxi, photpho, mbang dom janih yau gan pabui,  gan pab, rilaow pabe, dom janih pandap ngak meng ia tasau, boh hu rilo  vitamin A. Cà rốt lac janih hu rilo vitamin A.     

Mbang rilo njam patam song boh karaoh, Vitamin B hu mbaok tame bruk pabak canxi, photpho. Bruk cân bằng di canxi song  photpho ảnh hưởng tapak tal lin tagei

Bhian mbang dom janih pandap hu rilo canxi yau pandap ngak meng ia tasau, kanduh hadang, rau câu, đậu nành, dom janih pandap ngak meng ratak, ratak naih, ratak jhuk, ratak laow

Taphia bruk mbang menyum, njuak sangka tal bruk vệ sinh, crah tagei yaok harei. Njuak pambuak 3 janih piah pandar nan lac kem crah tagei, ia klung pabah song chỉ nha khoa piah ngak hacih tagei, palahik dom vi khuẩn di angaok tagei, pacang caga ruak halak mbang tagei hu siam lagaih.

Tuk tagei halak pandik livik harei, njauk samar nao tal bác sỹ  piah hu iek ruak njauk tuk. Di sang iek ruak tagei, drei hu dom bác sỹ pasang iek bruk halak mbang tagei nan tal tanut halei. Meyah tagei bahrau njauk halak mbang, oh gaok tal tủy tagei ye bác sỹ meda kuah klaak sruh halak, ngak hacih tagei song trám sre tagei halak piah pacang vi khuẩn njom tame.. Daok meyah tagei halak rilo oh  khik veik hu, ye buac tagei lac jalan ngak siam di abih./.