Urang tong chap ikan hu rai duik ginup meda 

Labik pahadar dom urang lin Gạc Ma di xã Cam Hải Đông, huyện Cam Lâm, tỉnh Khánh Hòa lac labik pahadar 64 urang jakar, urang lin tasik Việt Nam ndih trun di mesup harei 14/3/1988. Meng harei peih pakak di bilan 7/2017 tal urak ini, labik pahadar urang lin Gạc Ma hu taduan raok labaih 2.350 kapul gam haong 219 rabau menuac mai ravang, zirah, hadar dhar phor dom AHLS, dom urang anek gheih ghang khang hatai mesruh tal metai kayua quyền ngak po tasik pulao di taneh ia. Rilo jabat, kapul nyaom, sang bac hu peih bruk ba urang tame đảng, đoàn, pato pakai sajarah, bac megru ilamu meng kan… di labik pahadar ini. mBan khik ramik labik pahadar urang lin Gạc Ma jeng hu padang kapul ngak bruk yaih khan, tacei ba jalan, langyah brei dom kapul mai ravang iek hu thau. Bruk njauk biai di labik pahadar lac hu asal kadha "Dom menuac ndih veik gah takai langik" ngan saong biểu tượng "Gavang gul diuk miat" di dom urang lin Gạc Ma. Lingiu di bruk lac labik ka bhap bini mai ravang, zirah, cuh glau pahadar, labik ini daok hu daong kakei, pato dom rai hadei ka bruk sajarah pandik harao min biak gheih ghang.

  Ndom tal labik dang di hải quan dalam salih bharau min Thủ tướng Nguyễn Xuân Phúc brei thau lac jeng daok rilo sap preo ka dom adat daok sarau kadhau saong abih di nyu nan lac bruk kanjak jhak. Bruk ini hu ba tabiak ngan haong gah hải quan di nyaom biai online pataom iek veik 5 thun ngak bruk di kapul ngak bruk di Thủ tướng rajaei di harei ni 16-3.Thủ tướng Nguyễn Xuân Phúc ndom lac tukvak tapa, gah hải quan hu dom bruk salih bahrau biak praong, pandar binah hijao, binah bhong, mac chiếu dalam dom bruk ngak, min jeng daok hu panuac oh njauk hatai pambuak tal hải quan, tuk daok hu dom adat biak sarau kadhau, abih di nyu nan lac bruk ndok mbang jien padai dalam hải quan nan lac bruk njauk ndom rilo abih.

Tukvak tapa, tỉnh Bình Thuận hu mboh bruk mek kapal ikan, ghe gilai ngak dịch vụ suan adat ba tal dom bala biak pandik harao. Harei 16-3,  ong Lê Tuấn Phong, akaok UBND tỉnh Bình Thuận bahrau hu harak pandar dom gah pambuak tal dalam tỉnh brei ramik veik bruk ngak di kapal ikan, ghe gilai dalam tỉnh, tacei pato urang taong ikan ngak njauk tui dom adat ka khik kajap siam mekre salamat kapal ikan, ngak catang bruk pasang iek siam mekre salamat dalam bruk đăng kiểm saong brei harak lac an toàn kỹ thuật kapal ikan njauk tui adat hukum. Abih di nyu nan lac langyah catang dom bruk kapal ikan ngak suan dom adat hukum ka taong cap kaya ikan, pacang cakak chip dom kapal ikan, ghe gilai ngak oh njauk bruk atau oh njauk labik ngak bruk.

Sở Nội vụ TPHCM bahrau hu harak payua UBND ban raya HCM ka bruk caga padang ngak danak dak salih dom huyện jeng quận (atau ban dalam ban raya HCM) tukvak 2021-2030. Jalan ba tabiak ngak tui 2 tukvak: tukvak 2021-2025, meda salih dom huyện Hóc Môn, Bình Chánh, Nhà Bè jeng quận (atau padang ban dalam ban raya HCM); tukvak 2025-2030 meda salih 2 huyện daok veik lac Củ Chi saong Cần Giờ jeng quận (atau padang ban dalam ban raya HCM).

Oh ka tal 1 bilan, dalam tỉnh Đắk Lắk hu 4 mbang anek saih pataom gauk taong gauk. Anak bruk nan, Sở pato megru tỉnh Đắk Lắk hu tabiak harak ka bruk patagok jalan pacang caga taong paoh gauk dalam labik bac da-a. Tui nan, Sở pato megru tỉnh Đắk Lắk ieu kakei dom labik pato megru patagok jang bruk pathau khan adat hukum, pato pakai jalan diukrai siam mekre tapa bruk pablak pato pakai tame dom môn bac. Jhul khang bruk pato tacei ilamu ndom puac, daok dang, langyah dom bruk kandah gauk di anek saih. Hu panuac ieu brei hu bruk pambuak gauk khang kajap di sang bac, baoh sang saong dom kapul nyaom, CA, karja palei dalam bruk khik iek, pato pakai anek saih piah pacang, cakak hu siam bruk anek saih taong paoh gauk.

Thủ tướng Japon Yoshihide Suga harei ni hu klauk vắc-xin Covid-19 mbang camriep di hãng Pfizer, dalam sa bruk ngak piah caga ka mbang rivang Mỹ di bilan anak tal. dahlau di tuk nao rivang Mỹ, Thủ tướng japon  hu klauk jru mbang ka 2.Jeng dalam harei ni, Thủ tướng Thái Lan Prayuth Chan-ocha jeng urang camriep di abih hu klauk jru vắc-xin Covid-19 di hãng AstraZeneca di negar Đông Nam Á ni.

Harei kabroi, TTK LHQ Antonio Guterres lên án bruk taong, cuh urang trun jalan di Mi-an-ma saong hu panuac ieu karja quân sự taneh ia ini padeih bruk pandar phao ndao. TTK ieu dunya daong piah padeih abih bruk taong paoh gauk di Mi-an-ma. Tui LHQ, meng harei 1/2, tuk bol bala  Mi-an-ma tagok pan karja, takik di abih 138 urang metai dalam dom mbang taong gauk di urang trun jalan haong cảnh sát. Kuhria ta-eng harei 14/3, hu tal 38 urang metai dalam dom mbnag trun jalan di ban Yăng-gun (Yangon).

Iran bahrau peih pakak 5 danak dak praong ba ia tasik hu halang klaak sara tame dom labik pandiak thu lagu. Danak dak hu abih tih jien buh tame lac 1,28 tỷ rials (labaih 30,47 tỷ USD) piah jhul samar bruk ngak công  saong ngak nong, jang yau pabak ia ka bhap bini di dom bhum thu lagu, pandiak bhang di dom labik dalam bhum kreih di negar. Dom danak dak ni kayua tư nhân peih tabiak, meda ba mai bruk ngak ka 54.000 urang./.

Urang lang: Thu Thảo -Mousaphuong-16/3