Sa urang nong halan hatain brei taneh ngak sang bac.
Meng 5 công hamu amaik ame brei tuk tabiak dok karei, tal urak ni, sang ong Dương Văn Đây hu 20 công taneh (lac 2 ha) pala phun durian hu labaih 15 thun. Ni lac bein durian prong abih di palao kaoh Ngũ Hiệp. Ong Dương Văn Đây khan lac, yaok thun, bein ni hu jiak 40 tấn boh durian. Meng thau ba ilamu kỹ thuật tame pala song palih njauk tuk vak darak pasar takik hu baoh durian piah ngak ka phun tabiak boh nan ye boh durian bein ong tuk halei jeng pablei hu yaom glong. Tui yaok janih phun durian dalam bein yau: Ri6, Mõn Thon, Chuồng bò, bo yaom pablei tabiak drak pasa meng 60-90 ribau đồng/sa kg. Yaok thun, meng bein durian, sang ong Đây duah hu labaih 2 tỷ đồng. Ndom ka dom ilamu pala phun durian hu siam mekre, ong Dương Văn Đây khan lac:“Drei brei ngak njauk dom kỹ thuật, meyah drei buh dom khak hóa học biak rilo nyu oh siam ka phun, baoh oh hu rilo. Kayua yau nan ye drei pandar tui ilamu di drei gam song bruk hu mboh yaok thun drei pandar tui liều lượng ye phun tamuh siam, hu rilo baoh. Dok ngan saong urang nong tuk durian hu yaom glong bo buh tame ka nyu biak rilo, min puac di abih phun oh siam, baoh oh hu rilo, nan lac bruk prong .”
Langiu di bruk iek kham merat ngak mbang, ong Dương Văn Đây daok abih drei haong dom bruk xã hội di puk palei, abih di nyu nan lac rik dong padang ngak jalan mbak palei pala, dong ka bruk pachreih bac. Njauk ndom tal di abih lac thun 2015, ong halan hatain brei labaih 800 mét vuông taneh mbaok jalan huyện lộ 70 yaom labaih sa tỷ đồng piah karja pak ni padang 02 balik bac mẫu giáo, palagaih ka labaih 60 uranaih hu labik bac da-a siam mekre. Anai Trần Thị Kim Cương dok rong pato uranaih pak ni khan lac:“Dahlau deih, dom kamuan bac di sa labik sit, giniuk, meng harei hu brei taneh ni bloh padang sang bac siam mekre pabak ka dom kamuan bac biak siam. Amaik ame sahanang hatai payua nek pak ni, urang mboh biak bui sambai kayua dahlau deih pato di labik hajan hangin. Urak ni hu dom tal bac ni uan tabuan lo, biak siam.”
Taneh riya bhum pulao kaoh Ngũ Hiệp biak takik song hu yaom kinh tế biak glong. Bruk brei taneh ngak balik bac di urang nong Dương Văn Đây lac bruk biak siam hu makna prong. Ong Dương Văn Đây brei thau, bruk ngak ni rik dong hasit prein yava di drei piah padang puk palei: “ Drei ngak yau habar hu sa sang bac dok jiak piah daong ka anek kamuan, mik va oh daok ba anek nao bac di atah. Kayua yau nan ye, hulin ginum haong diuk anek alin brei taneh mbaok jalan di anak sang brei ka karja padang 2 balik mẫu giáo brei ka anek kamuan hu labik bac jiak jang. Drei ngak hu bruk nan mboh bui sambai kayua hu rik dong ka puk plei.
Kham merat ngak mbang piah ngak kaya meda ka sang drei song rik dong pandap panda pabak ka bhap bini di urang nong Dương Văn Đây dok di paeli Long Quới, xã Ngũ Hiệp, huyện Cai Lậy, tỉnh Tiền Giang biak njauk pok meyaom song peih prong. Ong Dương Văn Đây lac sa urang hu daong ngak ka pulao kaoh Ngũ Hiệp dak harei dak hadah mekre, trei sir, kaya meda./.
Viết bình luận