Ralo thun dahlau diah, urang nong di bhum taneh njaom likhun trak di huyện Bến Lức, tỉnh Long An njauk pambuak pagam bruk pala drak di drei haong phun tabau, yaom lac yaom kaom tuk trun tuk  tagok, njauk urang blei kateik yaom atau halak palai kaik. Kayua oh hu phun pala halei salih hu ka phun tabau. Urak ini bruk nan karei paje, sa bhum taneh prong pala kruac aik hu peih tabiak, hu mbaok gam haong phun tabau, kein laba di nyu glaong jang phun tabau, angaok mblang taneh “pandiak ye thu lagu, hajan ye bak lakhun” ini. Dalam nan, amuk Bùi Thị Ba daok pak xã Lương Hòa lac urang akaok meti ba phun kruac aik oh hu asal mai ini pala saong padang hu angan kruac aik oh hu asal Vica” hu mbaok di taong abih siêu thị dalam negar, pablei tapa dom negar Trung Đông, Singapore, Thái Lan…

 Amuk Bùi Thị Ba daok pala 30 hecta kruac aik oh hu asal ngan haong angan “Nông trại Hải Âu”, yaok thun laba hu jaik DUA tỷ đồng. Yaok harei, sang amuk daok pablei tabiak negar langiu sa container 40 feet “kruac aik oh hu asal Vica”. Kruac aik ini hu mek meng nông trang Hải Âu saong jaik 200 sang urang nong pala kruac aik di huyện Bến Lức, tỉnh Long An saong dom labik dalam tỉnh Hậu Giang. Min piah hu jak jeng yau harei ini, amuk Bùi Thị Ba saong sang di amuk jeng njauk nao tapa biak ralo cuang kandah yau dom urang ngak nong karei, yam tapa dom khat lahik di bruk pala tabau – ngak ghing saradang meng tangin, raong menuk công nghiệp… Thun 2006, amuk Ba peih bruk pala 2 hecta kruac aik oh hu asal, tal tuk paik baoh oh thau pablei ka thei kayua janih kruac aik ini biak karei. Anek likei di amuk Ba njauk klak bruk daok ngak, nao grauk labik luac 2 bilan tal dom quán mbang, nhà hàng, khách sạn, siêu thị pak bal raya Hồ Chí Minh piah daa urang pandar iek kruac aik ini. Hadei di nan, kruac aik pala oh ginup pablei saong 1 doanh nghiệp mai blei piah pablei tabiak negar langiu. Thun 2008, amuk Bùi Thị Ba dang tabiak pablei kruac aik di sang drei tabiak negar langiu saong dom urang nong karei jeng khang hatai pala kruac aik oh hu asal yau amuk. Min mbiah tal thun 2011, bruk pablei kruac aik tabiak negar langiu meng hu peih prong, hu siam mekre yau urak ini. Nan lac tuk amuk Ba pah taneh, peih prong taneh pala kruac aik saong buh tabiak 800 triệu đồng pah thợ cơ khí gam haong amuk duah jalan ngak tabiak mac ngak hacih saong pilih ruah kruac aik. Amuk Bùi Thị Ba khan lac: Thun 2006 kruac aik di drei bahrau hu baoh, pablei tabiak siêu thị hu, tuk nan kruac aik pablei 1 ribau đồng sa kg, kruac aik di drei hu 14 ribau đồng sa kg. Urang nong jaik taphia mboh yau nan meng pala tui saong drei jeng urang blei salih tuk halei oh thau. Meng akaok mereip drei pala piah pablei, blaoh pablei oh hu nan ye njauk  nao duah labik pablei ka drei. Tuk pablei hu, tuk hu labik pablei ye kurang chanh, njauk nao tapa tal Hậu Giang, Bến Tre duah blei,min yaok sang jeng hu meng 5kg tal 10kg. Mboh yau nan drei meng nao pah taneh piah pala kruac aik.

Meng hatai saneng phun kruac aik oh hu asal oh laghaih haong taneh riya pak ini, oh pablei tabiak negar langiu hu nan ye meda njauk urang kateik yaom, caong khin pablei tabiak negar langiu hu tani tanat ye njauk khik hu chất lượng, amuk Bùi Thị Ba gam pala kruac aik njauk ilamu gam duah jalan ngak tabiak mac sơ chế chanh, tut angan tame bruk bảo hộ angan je kaya nong. Kham merat hu mbaok tame dom mbang panduan jao ilamu kỹ thuật, nao taom gaok dom urang ilamu piah tangi sua, piah hu tacei pato, amuk Bùi Thị Ba hu jeng sa urang nong ngak mbang naih jioy, hu pato tacei veik ka dom urang nong karei. Tuk halei jeng caong duah urang blei bahrau, darak pasar bahrau, amuk Bùi Thị Ba jeng sa doanh nhân pablei kaya nong ka baoh sang drei haong yaok rituh baoh sang karei. Sa-ai Phạm Thị Thanh Tuyền pala 1,5 hecta kruac aik oh hu asal pak xã Lương Hòa, yaok bilan paik hu 3 tấn kruac aik, hu nông trại di amuk Ba blei abih, khan lac: Kruac aik urak ini hu labik pablei tani tanat, pablei biak nduac, urang nong oh ka thei huac lac oh pablei hu. Urak ini biak  laghaih urang mai tal bein piah blei kruac aik, yaom kaom tani tanat, po blei thau cambaih ilamu nan ye caong thau hagait ye hu langyah abih.

 Meng bruk ba akaok nao dahlau di amuk Bùi Thị Ba, mblang taneh pala kruac aik oh hu asal di xã Lương Hòa urak ini hu jaik 400 hecta saong meda hu rilo jang 300 tal 500 hecta tra. Phun kruac aik hu jeng sa dalam dom phun pala prong di xã, ba mai kein laba glaong. Jeng meng phun kruac aik hu daong paglaong jien mek tame, ngak salih bahrau mbaok meta palei pala pak ini. Ong Huỳnh Thành Tâm, Akaok Ủy ban bhap bani xã Lương Hòa, huyện Bến Lức brei thau: Bruk pala phun hagait, raong anek hagait, bruk ngak mbang pala drak ye khaol dahlak oh ka hu jalan. Khaol dahlak biak pachreih dom kareih camin urang nong ngak mbang naih jioy hu jalan nao bahrau paih cakrok patagok, duah hu labik pablei. Urak ini, meng cơ sở di amuk Ba - kruac aik Vica hu pablei tabiak negar langiu, nan ye amuk duah blei kruac aik di mikva pala dalam xã, langyah hu labik pablei kaya nong.

Meng phun kruac aik oh hu asal, meng pala tal pablei tabiak negar lingiu, meda iew amuk Bùi Thị Ba lac “Urang nong ngak mbang naih jioy”, lac “tỷ phú” atau lac “urang nong saman mbeik drei tame dunya” jeng hu. Bruk jak jeng di lanik ini, mai meng thau cambaih mblang taneh di drei, meng nan saneng duah jalan saong pala janih phun lagaih, hu kein laba. Taong abih jeng mai meng bruk pambuak gauk ba tabiak jalan ngak di urang khik iek gah ngak nong ngan haong bruk tacei pato di urang khoa học saong bruk khin saneng khin ngak di urang nong./.