Ngak adat mek hareik ka amuk akei 

Ramưwan – mbang muk kei di urang Cam Bàni lac bruk pambuak gauk di rilo adat cambat meng kan mai, yau ye: nao gol mek hareik, da-a muk kei di sang saong tame bilan eik Ramưwan di dom ong Imem dalam sang megik. Bruk nao gol mek hareik lac adat cambat peik akaok ka bilan Ramưvan. Taong abih but pajaih di dom palei Cam Bàni jeng ba gauk nao gol.

Kayua daok dalam tukvak pa-atah di gauk, oh brei pataom rilo menuac, meng harei 20 tal harei 22/4, mikva oh nao gol mek hareik. Ramưwan thun ini salih ka bruk nao gol, sang sa-ai Thập Thị Thu Sương daok di palei Phước Nhơn 1, xã Xuân Hải, huyện Ninh Hải, tỉnh Ninh Thuận jeng daok di sang da-a muk kei. Ngan saong sa-ai Sương, ini lac bilan mbang muk kei njauk hadar kanal di abih, sa-ai brei mboh hatai thau dhar phor muk kei, ong kaok, ong kơr saong saong hatai anit taneh ia meng bruk ngak di drei: Tỉnh Ninh Thuận urak ini hu labaih 34.500 urang Cam Bàni saong Islam daok pataom gauk di dom huyện Ninh Hải, Ninh Sơn, Ninh Phước, Thuận Nam. Hu 11 sang megik di urang Cam Bàni haong Islam hu padang ngak praong, siam di dom palei Cam: Văn Lâm, Tuấn Tú, Thành Tín, Phú Nhuận, Phước Nhơn, An Nhơn, Lương Tri. Piah pacang caga bruk njom mbak di ruak Covid-19, urang pan akaok UB bhap bini tỉnh Ninh Thuận brei padeih ngak dom adat uan raok Ramưwan saong Ramadan di bhap bini Cam, padeih bruk pataom gauk eik dalam dom sang megik, bruk uan raok di sang jeng oh brei pataom rilo menuac tui jalan sang halei ngak adat di sang nan. Ong Lê Huyền – urang dang akaok UB bhap bini huyện Thuận Nam, tỉnh Ninh Thuận ndom ka bruk peih ngak dom jalan pacang jit Covid-19 piah ka bhap bini dalam huyện uan raok njauk tui asal kadha di Chỉ thị 16 di Rajaei saong tui tacei pato di tỉnh: Ngak tui tacei pato di tỉnh, dahlau di nan huyện hu harak ka bruk uan raok Ramưwan. Kol dahlak hu da-a dom ong Imem mai khan brei thau. Tui jalan lac kol drei daok ngak tui Chỉ thị 16 dalam bilan Ramưwan ini. Kol dahlak jeng hu panuac ieu brei padeih dom bruk ngak adat di dom sang megik, padeih nao gol, oh pataom gauk eik dalam sang megik. Kol dahlak jeng ieu mikva jhui pataom gauk rilo menuac. Oh da-a payak tuai damuai..

Palei Văn Lâm 3, xã Phước Nam, huyện Thuận Nam meng blaoh hu 2 urang njom Covid-19, tui nan labaih 5.000 rahra brei daok di sang dalam luac 28 harei. Yaom lac abih tukvak brei daok di sang min mikva jeng takik nao mai dalam tukvak pa-atah di gauk. Meng hatai sahneng ka bruk ngak di drei brei ka urang karei, brei ka taneh ia, dom sang megik brei padeih dom bruk ngak adat dalam bilan Ramưwan saong Ramadan, gam haong nan, khan brei mikva thau ka bruk kan kandah di jit praong.

Mikva urang pang rayo anit ranam!

Dalam tuk mikva Cam Bàni di tỉnh Ninh Thuận, Bình Thuận raok Ramưwan, ye urang Cam di An Giang, Tây Ninh saong TP Hồ Chí Minh tame bilan eik Ramadan. Ini lac tuk piah ka mikva likei, kumei umo meng 15 thun tagok pasang iek veik dom bruk ngak di drei dalam thun blaoh piah pasiam veik dom bruk ngak suan. Yaok urang dalam luac bilan ini, meng tuk ia harei tagok tal tuk ia harei tame oh mbang menyum, oh njuk pakao, oh brei hagait tame dalam rup pabhap. Bilan ini brei ngak pahala rilo, jum pataom gauk, anit ranam gauk, oh puac, mesao gauk. Dalam bilan eik Ramadan ini, jeng oh brei pataom gauk daoh takơ, me-in sambai.

Tui bhain randap meng kan mai, dahlau di tuk tame eik, mikva dalam palei rik jien padai ngak ahar, blei limo mai ngak ralow pataom gauk mbang huak bui sambai di sang megik. Rilow lamo bhian hu ngak cà-ri saong cà-púa, lac pandap mbang bingi meng kan mai di mikva. Min thun ini kayua jit praong Covid-19, bilan eik Ramadan tok hu ngak dalam yaok baoh sang.

Dom Sang megik haong dom Surao di TP Hồ Chí Minh jeng ngak njauk tui Chỉ thị 15 saong 16 di Rajaei dalam pacang caga jit ruak. Mbang akaok meti, bilan Ramadan, ong Haji Mousa – Na-ib Masjid Jamiul Anwar, labik 157 Dương Bá Trạc, Phường 1, Quận 8 saong mikva dalam jumaah sambahyang di sang.

Ong Lý Du Sô, urang dang akaok mban lambaok urang Islam di TPHCM brei thau, meng tuk hu jit ruak, ong haong dom urang pan akaok dom jumaah hu jak ba mikva sambahyang di sang. Ini jeng lac jalan piah ka mikva ngak siam rukun di urang Islam, gam khik caga prein yava ka rup drei, ka sang di drei.

Pathau mikva saong taong abih gauk! 

Jeng yau mikva Cam di TPHCM, mikva Cam daok di tỉnh Tây Ninh jeng ngak njauk tui Chỉ thị 16 di Rajaei, sambahyang di sang. Dom harei ini, dom jalan dalam dom palei Cam di Tây Ninh jeng joa menuac saong radaih nao mai, kayua mikva takik tabiak jalan saong taong abih jeng cuk khẩu trang, daok atah di gauk tuk hu bruk njauk tabiak truh sang.

Mikva urang pang rayo anit ranam! Di tỉnh An Giang, jaik 17.000 urang Cam Islam jeng daok yam tame bilan eik Ramadan thun 2020.

Dom thun tapa, Rajaei hu buh tabiak yaok pluh tỉ đồng piah ngak jalan, daong taneh, daong sang daok ka jaik 300 sang, ngak bahrau 852 baoh sang tui Danak dak 134, 135, padang 223 baoh sang ka urang kan kathaot, daong labaih 6,3 tỉ đồng brei ka dom sang kathaot mesraiy piah ngak mbang, pablei salih…Meng hu dom sarak ini bo mbaok meta palei pala bhum urang Cam An Giang hu hadah hadai jang biak rilo duk saong dahlau daih. Raidiuk di mikva hu siam tagok, jien mek tame kuhia rah tapa tui akaok menuac hu labaih 30 triệu đồng sa thun, dom sang kathaot tui tanut bahrau daok 187 baoh, samu 5,7%.

Anak dom kan kandah di jit COVID-19, meng bruk kham merat abih drei di urang jakar, di karja, abih di nyu lac bruk sahneng mboh saong ba tangin tame di bhap bini urang Cam dom puk palei, bilan Ramưwan saong Ramadan thun 2020 hu rah tabiak dalam siam mekre, salamat, bui sambai saong haniem phul./.

Urang lang: Musa