Dom urang jakar yer tangin njauk tai saong ong Tráng A Dương

UB Bangsa hu ngak dom bruk njauk tui adat ba menuac tabiak piah palih ruah ka Quoc hoi chuyên trách mbang 15 ngan saong ong Tráng A Dương, quyền Vụ trưởng Vụ Địa phương 2. Ong Tráng A Dương lac urang bangsa Mông, hu pato pakai ilamu bruk ngak, lý luận chính trị saong khik iek bruk karja; thau cambaih adat cambat tanarakun, ilamu di bhap bini dom bangsa takik; thau ka sarak bangsa di Đảng, Karja hu gunup kadha piah ngak urang Quoc hoi chuyên trách mbang 15. Dahlau di nan, UB bangsa ba ong Bế Trung Anh, bangsa Tày, Đảng ủy viên, Ủy viên Ủy ban Pasang iek Đảng ủy jabat UB bangsa; Bí thư Đảng ủy, Akok Hội đồng Học viện Bangsa tame angan piah pilih ruah ka Quoc hoi mbang 15.   

Cục Hàng không bahrau tabiak sarak brei peih ngak catang bruk pathau khan y tế dahlau di tuk par ka tong abih tuai. Tui nan, ieu kakei dom hãng kapan haoh peih ngak njauk bruk tacei pato tuai pathau khan y tế điện tử tuk ngak harak gar tapa online. Dom  hãng brei peih bruk pasang iek, brei ka tuai pathau khan y tế dahlau di tuk tagok kapan haoh, oh taduan pajeng  dom urang oh pathau khan  y tế song oh ngak tui dom adat ka pacang caga jit ruak.

Cục Khik iek  y, dược meng kan di Metri Y tế hu harak iew Sở Y tế tỉnh Bình Thuận samar drah pathau khan hadei di tuk mehit lac bruk ngak di ong Võ Hoàng Yên suan hukum. Tapa khaw tin, thau lac chứng chỉ ngak bruk iek ruak, taong ruak di ong Võ Hoàng Yên kayua Sở Y tế tỉnh Bình Thuận brei. Rilo thun tapa, ong Yên hu menuac sia pok lac gru iek ruak gireih, meda taong dhit ruak kamlo, tangaoh, metai rup…Birau ini, ong Yên njauk urang khan lac pagat pachot yaok rituh tỉ đồng.

Mban khik ramik danak dak padang ngak tỉnh Đồng Nai brei thau, bhap bini hu taneh njauk giải tỏa dalam danak dak mblang kapan haoh dunya Long Thành (ieu katut lac mblang kapan haoh Long Thành) hu dok di labik  tái định cư Lộc An - Bình Sơn hu taneh prong labaih 280ha meda padang sang dok. Tal urak ni , 4 jalan nao mai prong di labik tái định cư ni hu ngak salah bloh. Tui kuhria tal harei 20/3, dom bruk karei dok veik hu ngak salah bloh. Urak ni, bruk padang ngak  2 sang bac mầm non song jabat  UBND xã di labik  tái định cư Lộc An - Bình Sơn dok hu dom po padang ngak jhul samar.

Jabat CSĐT Công an tỉnh An Giang brei thau birau chap kareih 3 urang jakar chi cục kak je dom labik Tân Châu - An Phú, Tịnh Biên – Tri Tôn piah duah thau ka bruk “Pambak tame bruk ngak piah mbang jien dalam tuk ngak bruk karja” saong “ Pablei salih suan hukum hoá đơn” piah mek jien tame ka drei. Gah chức năng jeng hu tabiak bruk khởi tố, pasang iek labik daok  saong pakauk nao tabiak truh labik daok ngan saong 4 urang karei kayua blei saong pandar hoá đơn GTGT piah vak tagok tui hatai, ngak khat lahik jien karja labaih 10 tỉ đồng.

Rajaei Anh ndom lac vaccine Covid-19 di  AstraZeneca "siam mekre song kein lagaih" hadei di bruk brei padeih pandar di Đan Mạch song rilo negar karei ngan saong vaccine ni dalam 14 harei, hadei di dom pathau khan ka dom mbang gar drah trak " di dom urang hu klauk vccine ini. Urang brei panuac di Thủ tướng Anh hu kakei Đan Mạnh lac oh ka hu talei pambuak di vaccine song bruk njauk gar drah. Vaccine Covid-19 di AstraZeneca hu pablei angaok drak pasa labaih 50 negar, dalam nan hu Anh song Liên minh châu Âu (EU).

Dom taneh ia Đông Âu daok glaih glar saong mbang ka 3 di jit praong Covid-19. Dom urang birau njom ruak saong metai daok tagok biak samar, dom urang ruak brei hu iek glang tagok tal tabung glaong bahrau di dom taneh ia yau Cộng hòa Séc, Ba Lan, Hungary… Dalam tuk nan, bruk klauk jru caga ruak di bhum Đông Âu daok suai damuai jang dom labik karei. Urak ini, tok hu Slovakia saong Hungary patagok parilo vaccine hadei di tuk taduan dom vắc-xin Sputnik V meng Nga. 

Quốc hội Trung Quốc bahrau brei tapa "Sarak di nyaom roya bhap bini  pakat negar ka bruk pasiam sarak palih ruah di đặc khu hành chính Hong Kong". Bruk ni peih jalan ka bruk salih bahrau prong abih ka bruk palih ruah di  Hong Kong meng di tuk đặc khu ni hu Anh bayar veik ka Trung Quốc di thun  1997. Tui sarak nan, Hội đồng lập pháp Hong Kong hu  90 urang dalam yaok mbang. Njauk caik hatai lac, sa ủy ban pasang iek tư cách ứng viên di Hong Kong meda hu padang tabiak./.

Urang lang: H.Pha –A.Nghiem  12/3/2021