Di mbang ngak bruk online di kapul ngak bruk đặc biệt di rajaei haong urang par akaok ban raya HCM ka bruk pacang caga jit di melam 11/8, UB bhap bini ban raya brei thau, bruk njom mbak jit ruak Covid-19 di pak ni mboh hu siam lagaih, dom urang njom daok hu dang veik, 81% dom urang njom di labik brei daok karei, labik pacang cakak, 19% pasang iek di sang iek ruak. Tal urak ni, ban raya hu taong  thit ruak ka jaik 63 ribau urang. Taphia di ngak catang bruk pa-atah di gauk tui sarak 16, ban raya hu pataom tame taong ruak piah ngak patrun dom urang F0 daok ruak trak, ba tame ngak bruk veik 4 pasak hồi sức tích cực praong 1.750 papar ndik; padang 5 labik taong ruak vệ tinh...Phó Thủ tướng Vũ Đức Đam brei thau lac, ban raya HCM njauk hu veik dom labik taong ruak ka dom urang trak, patrun dom manuac metai. Gam tui di nan jeng sangka tal dom rahra daok gah dalam ka oh hu taduan hu dom paok jien daong.

Mintri Y tế mesup 12/8 khan lac hu 3 urang njom Covid-19 tame Viet Nam  song  4.639 urang  di  24 tỉnh ban, dalam nan hu  1.256 urang dalam bhap bini. Glong di abih lac ban raya HCM hu  2.318 urang, patui di nan lac Bình Dương 911 urang, Đồng Nai 425 urang…2 tỉnh: Lai Châu, Tuyên Quang hu tapa 14 harei oh hu urang halei njom bahrau; Bắc Kạn, Quảng Ninh hu tapa 30 harei oh hu urang halei njom bahrau. Tong abih urang njom Covid-19 hu iek ruak abih ruak lac  85.154 urang.

UB bhap bini tỉnh Bình Dương bahrau ba tabiak jalan daong ba bhap bin kan kandah mai veik palei tui panuac ieu taduan di dom tinh, bal piah pacang caga jit Covid-19. Dom urang nan njauk hu harak dut iek PCR dahlau 3 harei saong test samar drah kháng nguyên âm tính haong SARS-CoV-2 dahlau di tuk tagok radaih mai palei. Ngan haong dom urang njom Covid-19 daok tagok samar drah dalam tuk vaccine hu parabha mai tỉnh jaik 570.000 mbang/2,6 triệu bhap bini, Bình Dương hu panuac likau Thủ tướng rajaei brei pabak dahlau veik 1 triệu mbang vaccine piah klauk caga ka bhap bini saong manuac ngak bruk.

Tui kuhria dalam adit ni hu jiak 218.000 mbang vaccine pacang Covid-19 di Pfizer tal Việt Nam.Tui mintri Y tế, tal quý 4, vaccine hu mai rilo. Taeng vaccine Pfizer hu tal Việt Nam labaih meng 47-50 triệu mbang. Dalam 2 adit tapa, bruk klauk jru hu jhul pakhang, tal urak ni,  klauk hu labaih 11,3 triệu mbang. Mintri Y tế brei thau hu harak ka bruk kuhria parabha vaccine meng ni tal abih thun 2021 piah dom tỉnh ban peih bruk klauk jru piah khik caga jalan ngak.

Tòa án bhap bini ban Long Khánh, Đồng Nai bahrau tabiak panuac taong phat 14 bilan guk bị cáo Vũ Nhật Tân, umo 38 thun ka duas pacang cakak urang jakar ngak bruk. Hu thau, page 22/7, Vũ Nhật Tân peih radaih mac nduac di jalan. Tuk nao tal bilai pacang caga jit Covid-19 di tatua Bình Lộc, ban Long Khánh, dom urang jakar  ieu Tân padieh radaih piah pasang iek saong pathau khan y tế tui njauk adat. Min, Tân oh ngak tui, khang sap puac veik dom urang jalar daok ngak bruk; gam tui di nan jeng peih radaih ginuh tame dom urang jakar…tapa dut iek samar drah, mboh Tân dương tính haong  jru phin.

Dom urang njom Covid-19 meda yam tapa 300 triệu di akaok thun 2022 meyah bruk njom mbak urak ni oh pacang cakak hu. Ni lac panuac khan di Tổng Giám đốc gah Y tế dunya (WHO) Tedros Adhanom Ghebreyesus di nyaom biai  di WHO harei 11/8. Min, Tổng Giám đốc WHO ndom lac, dunya hu rilo pandap piah pacang caga, pasang iek song langyah Covid-19, pagap lac  dom bruk ngak iek anak tal di 3 janih jru Artesunate, iimatinib song infliximab piah pacang Covid-19.

Dom urang njom Covid-19 daok tagok samar drah di negar Mỹ ba tal bruk kurang y tá saong dom urang pacang caga ruak di sang iek ruak praong di dom labik pandiak kayua oh langyah hu dom urang ruak ka oh hu klauk jru caga ruak. Florida, Louisiana, Arkansas saong Oregon lac dom bang mboh dom urang tame sang iek ruak kayua Covid-19 rilo abih di Mỹ saong daok gaok  bruk kurang urang sangka gah y tế. Mỹ daok mboh tui kuhria lac labaih 116.000 urang njom bahrau gam haong labaih 50.000 urang tame sang iek ruak kayua Covid-19 yaok harei, glaong abih meng di tuk tamuh jit ruak di bilan laar thun blaoh.

Jabat khik ramik bala meng langik tasik song apui khuah Japon brei thau, nhiệt độ tagok glong dalam adit tapa ngak ka 14 urang metai kayua pandiak song 7.943 urang karei tame sang iek ruak piah iek ruak rilo meng lac urang meng 63 thun tagok. Kuhria tal tuk vak urak ni dalam thun ni, urang tame sang iek ruak piah iek ruak dom triệu chứng kayua langik pandiak hu yam tapa 30 ribau urang. Mintri Y tế Japon hu batabiak panuac kakei bhap bini, abih di nyu nan lac dom urang umo taha./.

Urang lang: Thu Thảo & H.Pha