Cục khik iek karja gah ban raya HCM peih bruk taduan pandap khik piah pakat negar piah dong ka urang gaok kan kandah kayua jit Covid-19

Kapul urang jakar ngak bruk gah maraong di Mintri Ngak nong saong Patagok palei pala bahrau payua harak ka Phó Thủ tướng Lê Văn Thành ka bruk pabak pandap mbang ka ban raya HCM saong Bình Dương dalam 15 harei ngak catang bruk paatah gauk di dom harei anak tal. Tui nan, dom janih pandap panda pandar yaok harei khik tani tanat bruk pabak ka bhap bini dalam 15 harei. Abih di nyu nan lac, dom pandap panda, pandap mbang tui kuhria meng bilan 8 tal bilan 12/2021 di gah maraong negar rilo meng lac daok labaih hadei di tuk pabak ginup ka ban raya HCM saong Bình Dương. Kuhria tal harei 20/8 hu 1.218 gah pabak pandap mbang, kaya nong hu tut angan haong kapul ngak bruk di Mintri Ngak nong saong Patagok palei pala.

UBND ban raya HCM bahrau patabiak sarak taduan song parabha haong pandar pandap khik piah di negar dong ka urang gaok kan kandah kayua jit Covid-19 (mbang 1). Tui nan, dom pandap taduan lac jiak 14.550 tấn brah. Tuk vak peih ngak dahlau di harei 10/9. Bruk jao brei peih ngak gam harei car song adit, pak di labik UBND ban Thủ Đức song 21 quận, huyện. UBND ban raya HCM jao ka UBND ban Thủ Đức song 21 quận, huyện samar pambuak gauk kajap haong Cục khik iek karja gah ban raya HCM peih bruk taduan pandap khik piah pakat negar piah dong ka urang gaok kan kandah kayua jit Covid-19.

Hadei di 3 harei ngak tui sarak 15, meng maong 12 melam harei ni (24/8), dalam Cà Mau hu brei ngak tui sarak 16 di Rajaei ka bruk pacang caga jit Covid-19. Meng maong 7 melam harei dahlau tal maong 4 dah page harei hadei, bhap bini oh tabiak jalan, langiu di dom urang ngak bruk pacang caga jit ruak; ngak bruk samar drah saong dom bruk ngak bo hu brei adat. Hu thau, di dalam tỉnh bahrau rahtabiak veik 2 sruh jit Covid-19 bahrau di huyện Đầm Dơi saong ban Cà Mau ngan haong rilo urang njom ruak bo ka oh thau njom pambak meng halei mai.

Ong Nguyễn Hồng Tươi, Akaok UBND ban sit Tân Uyên njauk kỷ luật khiển trách kayua "kurang mong iek, luai ka jit njom mbak dalam bhap bini labik khik iek". Bruk ni hu Ban thường vụ Tỉnh ủy Bình Dương ba tabiak hadei di tuk ginum biai pasiam veik dom tavak tavaiy gam gam rah tabiak dalam bruk pacang caga jit Covid-19 di ban sit. Urak ni, Tân Uyên hu urang njom ruak rilo abih di tỉnh ngan song 22.226 urang, meblah labaih 30% dom urang ruak. Tui Tỉnh uỷ Bình Dương, lac urang pal akaok karja ban sit, ong Tươi hu "patui ngak oh siam bruk pacang caga jit, luai rah tabiak dom labik pandiak dalam ban sit".

Piah khik ramik saong cak rok patagok ilamo bangsa Cam, rik tame bruk jhul kinh tế-xã hội bhum palei hu cak rok patagok, UBND tỉnh Bình Thuận bahrau brei ngak danak dak daong khik saong cak rok patagok bruk ngak lan am meng kan di urang Cam daok di palei Bình Đức, xã Phan Hiệp, huyện Bắc Bình. Langiu di bruk khik ramik jalan ngak, ilamo, hluk lan meng kan saong paglaong chất lượng, ngak parilo pandap panda, danak dak daok pamaong tal bruk padang ngak saong cak rok patagok dom tour, gah du lịch tal bruk rivang iek, roh duah, ngak iek di palei ngak lan di urang Cam Bình Đức; kham marat tal thun 2030, dom baoh sang khik tani tanat bruk ngak lan tagok meng labaih 11% tagok tal jaik 15%, dom urang ngak lan khik tani tanat bruk ngak lan tagok meng jaik 12% tal labaih 16%.

Ai Cập hu khan brei thau dom urang ruak camereip biến thể Delta Plus dalam tuk negar ni jaik dang anak jit Covid-19 mbang ka 4. Tui nan, urang ruak camereip lac sa urang kamei negar langiu njauk ruak janih biến thể ni meng kreik bilan 7 meng bloh, min dok ruak hanjol song iek ruak di sang. Hadei di nan Ai Cập hu dom urang karei njauk vi-rút ni saong lac hu nao mai meng negar langui . Ai Cập khan brei thau ngak hu blaoh 15 triệu mbang vắc-xin Vacsera -Sinovac, dalam nan 1 triệu mbang camereip hu klauk brei saoh ka bhap bini dalam harei 24/8.

Tổng thống Indonesia Joko Widodo brei thau, meng harei ni (24/8), negar ni meda camriep brei peih pambang gilac veik sa binah dom nhà hàng, pasak pablei salih saong labik kakuk yang di dom tinh, ban, dalam nan hu ban ine Jakarta. Dom labik kakuk yang saong nhà hàng meda hu brei ngak ngan haong 25% prein, dalam tuk dom pasak pablei salih hu peih ngak 50% prein. Tui Tổng thống Indonesia, meng di tuk jit ruak tamuh tabiak di harei 15/7, dom urang njauk bahrau hu trun 78%.

Mỹ batabiak bruk kham merat panduan ba urang lin tabiak truh Apganixtan tal luac harei 31/8, yaom lac dom negar đồng minh hu panuac ieu dui atah tuk vak. Mintri Quốc phòng Mỹ brei thau ka oh tal tuk piah duah jalan pasalih,dalam tuk Anh, Pháp song Đức patagok bruk kateik gareik di sa mbang nyaom pakat glong G7 tapak rah tabiak harei ni. Dalam tuk nan, Taliban khan lac, meyah bruk dui atah tuk vak halei ngak suan thỏa thuận bo 2 gah njauk hatai njauk mong lac bruk "dui atah bruk blah mek"./.

Urang lang: Thu Thao – Hani Pha – 24/08 10:35:16