Đắk Nông daok hu jaik 16.800 urang umo meng 15 – 60 thun oh thau akhar haroh

Dom harei jaik ini, CA dom tỉnh, ban di bhum Đông Nam bộ yau: Bình Dương, Đồng Nai, Tây Ninh, Bình Thuận, BR-VT… hu caga dom jalan ngak piah khik khik siam mekre, salamat dalam tukvak dahlau, dalam saong hadei di nyaom roya apakt negar mbang ka XIII di Đảng. Ini lac bruk praong dang akaok, hu dom tỉnh, banpeih tabiak ngak tal yaok puk palei. Dalam nan brei thau cambaih bruk di puk palei, meyah hu bruk hagait rah tabiak jeng khik kajap siam mekre, salamat.

UBND tỉnh Đồng Nai bahrau batabiak danak dak pataom tame langyah urang oh hu labik dok, likau mbang dalam tỉnh. Tui danak dak, bruk hu ramik veik lac duah pataom, khik iek song rong ba dalam sa tuk vak urang oh hu labik dok, likau mbang , parabha janih, langyah urang oh hu labik dok, likau mbang di tỉnh Đồng Nai song peih ngak siam sarak dong urang hu dong gah xã hội. Danak dak jeng hu batabiak jalan ngak cambaih laih, pataom tame langyah urang oh hu labik dok, likau mbang song bruk pambuak gauk di dom pakat, dom gah piah dong palagaih ka dom urang nan hu tani tanat rai duik, sinya oh nao ban glai ban glo, likau mbang, pato pakai song hu jalan langyah tui hukum dom urang halei nao ban glai ban glo, likau mbang veik rilo mbang. 

Hadei di dom mbang rabuk ia sua thun 2020, tỉnh Quảng Nam hu jaik 45 rabau baoh sang khut, njauk ramik pasiam veik, dalam nan hu 740 sang khut abih, labaih 1.520 sang khat lahik trak. Tui jalan ngak lac oh caik ka bhap bini oh hu sang daok, hadei di tuk rabuk ia sua nao tapa, tỉnh Quảng Nam samar ngak sang brei ka mikva daok, abih di nyu lac brei ka mikva bhum jaleih ceik, mikva dom bangsa takik. Tỉnh Quảng Nam hu buh tabiak chip labaih 112 tỷ đồng piah ka dom puk palei pasiam veik dom khut khat kayau hajan ia sua. Tal urak ini, yaom jien hu dom tỉnh, ban, dom kapul nyaom, menuac ngak pahla dalam taneh ia payua daong tapa jalan di UBMT negar Việt Nam tỉnh Quảng Nam lac labaih 103 tỷ đồng. Meng yaom jien ini, UB hu parabha 57 tỷ đồng ka dom puk palei piah daong ka mikva pasiam dom khut khat hadei di bala meng langik tasik.

Tapa duah thau, 53 bangsa takik di tỉnh Đăk Lăk tal urak ini hu bruk tok diuk tok pasang tuk oh ka tal umo tui hukum lac jiak 29%, tok gauk dalam but pajaih labaih 1%, rilo meng mboh di dom huyện yau : Ea Súp, Krông Buk, Ea H’leo, Krông Bông, M’Drăk... Dom bangsa takik hu bruk tok diuk tok pasang rilo tuk umo daok sit lac: Êđê, M’nông, Mông, Tày, Nùng, Dao song Gia Rai. Urak ni, mban bangsa tỉnh hu pambuak bruk song dom jabat peih bruk caik padang labaih 100 áp phích jang yau peih bruk pathau khan ka 30 xã hu bruk tok diuk tok pasang di umo sit song tok gauk dalam but pajaih, hu jiak 3.900 urang hu mbaok tame. Langiu di nan, mBan dok hu ngak song brei 166.600 tờ rơi, 18.800 baoh Sổ tay tangi sua - javap jalei ka bruk tok diuk tok pasang tuk umo sit song tok gauk dalam but pajaih. Tapa nan, hatai sahneng di mik va bangsa takik ka bruk tok gauk tuk umo sit song tok gauk dalam but pajaih dak harei dak hu siam tagok ..

Urak ini, Đắk Nông daok hu jaik 16.800 urang umo meng 15 – 60 thun oh thau akhar haroh, dalam nan hu jaik 6.700 urang umo meng 15 – 35 thun. Dalam thun 2021, Đắk Nông brei patagok bruk phổ cập pato megru, palahik bruk oh thau haroh, langyah saong jhul kadun likuk bruk anek saih klaak bac, oh nao bac di bhum tapen negar, bhum atah bayah. Tỉnh daok pamaong tal bruk ieu pataom takik di abih lac 66% urang jaoh jo daok bac da-a hu, hu brei nao bac, dom urang bac tamat pakat Tiểu học blaoh, hu bac tagok Trung học cơ sở saong bac tamat dahlau di umo 18 thun, 69% ilei kumei umo meng 15 - 18 thun hu bac tamat Trung học phổ thông.

Tui kuhria mboh di danak dak padai brah dunya (WFP), dalam thun 2021, dunya mbuan si dang anak song bruk eik lipa khang di abih kuhria meng di tuk padang Liên hiệp quốc. Kayua kan kandah di jit Covid-19, dom menuac eik lipa meng 135 triệu tagok 270 triệu. Tui kuhria, menuac eik lipa meda hu rilo jang song mbuan si rah tabiak bruk eik lipa khang di anak meta meyah oh hu dom jalan langyah bruk kurang padai brah dok rah tabiak rilo di dom labik pandiak ka bruk di cư song mesruh gauk di dunya. 

Dalam adit camereip peih bruk klauk jru pacang Covid-19, Thổ Nhĩ Kỳ hu klauk ka labaih 1 triệu urang. Thổ Nhĩ Kỳ peih bruk klauk pacang Covid-19 di harei 14/1, meng vắc-xin kayua Cty Sinovac di Trung Quốc ngak. Dom urang ngak gah y tế lac dom urang hu klauk dahlau. Patui di nan lac dom menuac daok saong ngak bruk di dom labik raong urang taha, pasak iek glang urang taha saong urang jaoh jo. Lingiu di nan, dom urang Thổ Nhĩ Kỳ umo labaih 90 thun jeng hu dom urang y tế nao tal labik klauk brei vắc-xin Covid-19.

Tết nguyên đán thun ni jeng lac Tết camereip abih Trung Quốc peih bruk pacang Covid-19 tui jalan bình thường hóa. Tui kuhria, urang nao mai dalam tuk “tết” thun ni hu labaih 1,7 tỷ urang, trun khang dut song 3 tỷ urang nao mai dalam tuk vak ni thun 2020. Min, kan kandah ka gah pajeng ba biak khang kayua gam khik bruk nao mai luac harei melam ka bhap bini, gam khik siam mekre bruk pacang caga jit. Urak ni hu 29 tỉnh ban di Trung Quốc hu panuac ieu bhap bini mbang Tết pak di labik, takik nao mai dalam tuk “tết”, rilo doanh nghiệp, tỉnh ban di Trung Quốc jeng batabiak dom bruk daong piah khik takai urang ngak langiu tỉnh dok dalam tuk Tết./.

Urang lang: Hani Pha – M. Phương – 23/01 13:22:30