Urang ngak brei pabak ginup dom bruk yau: hu klauk vaccine mbang 1 ginup 14 harei hadei di tuk klauk, atau thit ruak COVID-19

UBND TP.HCM bahrau njauk hatai haong jalan ngak peih bruk pajeng ba urang ngak meng dom tỉnh, ban mai ban raya ngak bruk dalam tukvak bahrau. Sở jalan mbak Pajeng ba hu brei bruk pasang iek brei harak ka radaih hu mã QR. Urang ngak brei pabak ginup dom bruk yau: hu klauk vaccine mbang 1 ginup 14 harei hadei di tuk klauk, atau thit ruak COVID-19. Bruk pajeng ba hu peih ngak meng jalan radaih, jalan pasei, jalan kapal haoh, khik kajap bruk pacang caga jit. Anak meta, mbang 1 (meng harei 1/10 tal harei 31/10) peih bruk pajeng ba meng jalan radaih saong mbang 2 (meng harei 1/11) hu pajeng ba tui abih 3 jalan, lac jalan radaih, jalan pasei, jalan kapal haoh.

Tỉnh Bà Rịa-Vũng Tàu brei thau, 9 bilan akaok thun ini, tỉnh hu brei harak chứng nhận đầu tư ka 39 danak dak bahrau, dalam nan hu 11 danak dak FDI haong 28 danak dak dalam taneh ia. Abih tih phun jien dui pachreih tame dom labik ngak kong lac labaih 945 triệu đô la Mỹ, samu labaih 150% bruk ba tabiak dalam thun, tagok 52% duk haong vaktu ini thun bloh. Kuhria tal harei ini, dom labik ngak kong di Bà Rịa-Vũng Tàu hu 498 danak dak đầu tư daok hu adat, lac 242 danak dak dalam taneh ia saong 256 danak dak FDI, dalam nan hu 322 danak dak daok ngak.

Kiên Giang bahrau brei tapa danak dak ngak iek roak tuai dunya mai Phú Quốc pandar “passport vaccine”. Tui nan, meng harei 20/11, tỉnh peih bruk raok meng 1-3 mbang par camereip tal Phú Quốc piah ngak iek bruk taduan raok, duh pamere tuai piah taong yaom, bac megru ilamu. Jalan ngak ini daok hu mek panuac dom bộ ngành trung ương piah ngak pasiam, pok tagok Thủ tướng Rajaei. Phú Quốc hu ba brei vaccine piah klauk ka bhap bini saong pasang iek hu siam jit ruak. Ini lac jalan lagaih piah peih pabah mbang taduan raok tuai du lịch.

Dalam bilan 9/2021, UB Bangsa brei buh tabiak 1 tỷ 358 triệu đồng daong ka bhap bini bangsa takik gaok kan kandah saong SV sang bac caga tame đại học TP.HCM njauk ruak COVID-19. Urak ini, jabat lambaok UB Bangsa di TP.HCM daok kham merat tacei pato dom tỉnh, ban dalam bhum Đông Nam bộ peih bruk daong ka njauk menuac, njauk yaom jien daong, samar pachreh ba mikva dalam tuk kan kandah kayua jit ruak.

Kuhria tal harei 28/9, dom tỉnh bhum Đông Nam bộ hu 10.864 urang bangsa takik njaom COVID-19. mBan Bangsa dom tỉnh kham merat jak ba piah daong ka urang bangsa. Di Đồng Nai, mBan Bangsa tỉnh jak ba hu 3 tấn brah, daong ka mikva bangsa takik labik njauk pacang veik piah pacang caga jit, alin hadiah 45 pok pandap ka urang hu angan je saong sang urang bangsa Chơro, yaok pok pandap yaom 500 rabau đồng.

Yaok rabau gru pato di Libăng padeih ngak, ndok tagok jien bilan kayua lạm phát biak khang saong jien lahik yaom. Dalam tuk nan, Rajaei oh ka ginum biai hu ka pok jien bilan jaik 500 triệu USD. Kayua yau nan ye, jaik 1 triệu 200 rabau anek saih Libăng oh thau tal tuk halei meng hu nao bac veik. Tui kuhria mboh di Liên Hợp Quốc, 55% dom menuac sia di Libăng urak ini daok dalam eik lipa, kathaot rambah.

Hadei di tuk yaok rabau anek saih haong gru pato di Indonesia njauk COVID-19 tuk sang bac peih pabah mbang veik, harei 30/9, Indonesia daok hu mboh dom urang njaom bahrau dalam sang bac angaok pulao Java, lac 42 anek saih, gru pato haong menuac ngak di sang bac njauk ruak. Taong abih dom urang ruak ini hu klauk vaccine blaoh, nan ye mboh ruak hanjul saong takik njom mbak. Urak ini hu 148 sang bac di Tangerang daok ngak iek bruk peih pabah mbang dom tal bac tapak.

Thủ tướng Australia Scott Morrison bahrau khan lac, meng bilan 11 tal, tuk menuac klauk vaccine caga COVID-19 di dom bang haong bhum taneh di taneh ia ini hu 80%, dom labik nan hu peih pabah mbang biên giới dunya. Rahra Australia hu klauk ginup 2 mbang vaccine meda tabiak negar langiu. Bruk peih pabah mbang biên giới dunya hu peih tabiak di dom bang hu 80% dom menuac umo meng 16 thun tagok hu klauk ginup vaccine caga COVID-19./.

Urang lang: M. Phuong – 02/10 14:30:00