Jalan pasei Việt Nam khan lac brei padeih peih dom radeih pasei nao mai dom tỉnh Nghệ An, Hải Phòng, Lào Cai

Mesup ni (7/5), Mban tacei jalan pakat negar pacang caga jit Covid-19 brei thau, dalam 12 mon tapa, dalam negar hu sa urang njom Covid-19 dok di Thanh Hóa. Urang ruak lac F1 di chuyên gia Trung Quốc. Tal mesup ni, Việt Nam hu abih tih 1.691 urang njom Covid-19 kayua njom mbak dalam negar, dalam nan urang njom bahrau kuhria meng harei 27/4 tal urak ni lac 121 urang. Ndom tal bruk klau jru vaccine Covid-19, dalam negar hu 747.827 urang lac dom urang hu klauk dahalu dalam bruk pacang caga jit Covid-19 hu klauk vaccine Covid-19.

Đà Nẵng hu 3 urang birau njom ruak Covid-19 pambuak tal Kuan Bar New Phương Đông. UB bhap bini Ban Đà Nẵng iew brei padeih bruk ngak di nhà hàng, sang pablei pandap, labik pablei salih pandap mbang menyum mneg 12 tuk harei ini 7/5. Dom nhà hàng, cửa hàng, labik pablei salih pandap mbang menyum tok hu pablei pandap ka urang blei ba nao, blei pandap saong pablei tapa online, ba pandap tal labik ka urang. Pakauk duh ka tuai mbang di labik pablei. Darak Đống Đa jeng brei kareih pabah mbang meng harei 7/5 piah duh ka bruk pruh jru pametai anek ruakg kayua hu urang ruak Covid-19 rilo mbang mai ini blei pandap.

UBND TPHCM hu harak samar payua ka Sở pato megru, Sở Lao động Thương binh song Xã hội, UBND TP. Thủ Đức song 21 quận, huyện, dom jabat, labik pato pakai, pato bruk ngak di ban raya ka bruk padeih bruk pato pakai di ban raya meng harei 10/5. Daok anak saih tal 9 song tal 12, piah khik ramik siam ka bruk pakacah puac pakat song mbang pakacah tamat THPT thun 2021, tui bruk di anak meta, akaok dom sang bac meda padang danak dak ka nyu lagaih.

Meng harei 7/5, UB bhap bini tỉnh BR –VT brei padeih dom bruk peih ngak rija roya, ilamu, padhih thethao, agama, kakuh, dom bruk daoh tamia; dom labik main sambai hu rilo menuac, kuan bar, labik chiat tamia, beer club, Karaoke…piah pacang caga jit Covid-19. Dom bruk ngak di labik jalan nao takai, darak melam, mbang menyum pataom rilo manuac…oh pataom oh tapa 50 urang. Dom bruk ngak mbang pablei salih karei hu peih ngak min brei sanya khik kajap dom jalan pacang caga.

Jalan pasei Việt Nam khan lac brei padeih peih dom radeih pasei nao mai dom tỉnh Nghệ An, Hải Phòng, Lào Cai piah pacang cakak song patrun patakik bruk njom mbak jit Covid-19 dalam bhap bini. Tổng Công ty jalan pasei Việt Nam brei thau, dalam dom harei radeih pasei padeih peih, tuai hu bayar ginup jien harak vé di mblang radeih dahlau di tuk peih. Daok jalan radaih, dom tỉnh yau Hải Phòng, Quảng Ninh jeng brei padeih radeih pajeng tuai hu nao mai meng Vĩnh Phúc. Dom radeih pajeng tuai di dom tỉnh karei hu nao tapa Vĩnh Phúc ye oh hu padeih, pataok di tỉnh Hải Phòng, Quảng Ninh piah brei tuai trun, tagok.

Meng bruk dut iek mboh dương tính haong virus SARS-CoV-2 tagok tal 44% saong dom urang tame sang iek ruak tagok tal 57 mbang, Nê-pan daok dang anak bruk mbuan tamuh khang jit ruak. Negar Nam Á ngan haong 26 triệu 800 ribau bhap bini daok anak bruk njom mbak Covid-19 ka 2 ngan haong bruk njom mbak tagok tal 20 mangaok 100 ribau bhap bini yaok harei. Nê-pan hu ngak catang dom jalan pacang caga jit di dom bhum njauk kan kandah abih, padeih dom mbang par dunya tal harei 14/5 saong kareih pabah mbang tapen negar haong Ấn Độ.

Piah oh palai pajoa vaccine pacang Covid-19, meng harei 12/5, Prang hu brei adat ka urang umo 18 thun hu klauk jru avar jang tui kuhria. Prang hu oh takik bruk palai pajoa vaccine kayua oh hu menuac ginup tanut klauk jru. Dalam tuk nan, sa klaoh vaccine Pfizer-BionTech hu 5 mbang, ginup klauk ka 5 urang hu pandar oh tapa 6 mon hadei di tuk hu lai parang. Tổng thống Prang ndom lac, bruk ni piah dong jhul samar bruk klauk jru, mek hu tanut klauk jru pacang ka 20 triệu urang di kreih bilan 5 song 30 triệu urang tal kreih bilan 6.

Gah pandap mbang saong ngak nong Liên hợp quốc (FAO) bahrau khan brei thau, yaom pandap di dunya tagok dalam bilan ka 11 gam gam, abih di nyu nan lac yaom saradang. Yaom saradang tagok 3,9% dut saong bilan dahlau di nan kayua bruk suai damuai dalam tuk kaoh tabauh di Braxin saong njauk kan kandah kayua bilan laar di france. Dom kuhria dahlau di abih jeng brei mboh padai lúa mì saong tangei di dunya meda tagok dalam bilan anak tal.

Urang lang: Hani Pha – Ái Nghiêm – 07/05 10:22:45