Rilo D.N kuhriahu yaom jien thưởng Tet saong hu jalan khik takai urang ngak

Urak ini labaih 12.000 D.N dalam taong abih 13.400 D.N dalam tỉnh Long An hu ngak bruk veik hadei di jit ruak Covid -19. Rilo D.N kuhriahu yaom jien thưởng Tet saong hu jalan khik takai urang ngak. Dalam nan hu labaih 20 D.N meda brei jien Tet lac sa bilan jien bilan 13, rilo D.N daok brei pabak 2 atau 3 bilan jien bilan cơ bản. Dom D.N oh ka ngak abih prein di drei, oh ka ginup urang tame ngak ye kuhria caga daong ka urang ngak 1 paok pandap yaom ala 1 trieu dong. Langiu di nan, dom D.N daok daong brei vé radaih saong ve kapal haok nao saong mai ka urang piah nao palei. Caong khin urang ngak gilac veik mai ngak bruk, Liên đoàn Lao động tỉnh Long An jeng kaoh tabiak jaik 70 tỷ đồng daong jaik 250.000 urang công đoàn mbang Tet. UB bhap bini tỉnh Long An brei alin 5.000 paok pandap ka urang công đoàn.

Dom harei tapa dom urang njom Covid-19 dalam tỉnh Cà Mau mboh lac daok trun. Meyah dahlau harei 31/12/2021, yaok harei hu labaih 1.000 urang, ye dom harei ni yaok harei dok labaih 500 urang njom. Dalam thun bloh dalam tỉnh hu 192 urang metai, meblah oh ka tal 0,2% urang njom Covid-19. Ong Nguyễn Văn Dũng, Yam ndoc Sở Y tế Cà Mau brei thau, urang njom ruak song metai bier lac kayua peih prong bruk klauk vaccine dalam bhap bini. Urak ni, hu jiak 99% bhap bini rahra meng 12 thun tagok hu klauk 2 mbang vaccine. 

396 anek saih, sinh viên naih gheih mek hu angan “Anek saih 3 siam”, “Anek saih 3 pasram”, “Sinh viên 5 siam” pakat Ban raya thun 2021 birau hu Thành đoàn Ban raya HCM peih bruk pok meyaom, di tuk pahadar 72 thun Harei Ilamu Anek saih, sinh viên saong Kapol Sinh viên Viet Nam. Ini lac dom sinh viên bac da-a naih joi, tari tarieng pasram megru; mek hu giải glong dalam dom mbang pakacah Ilamu Ky thuat pakat negar, ban raya; hu Trung ương pok meyaom ; mek hu dom angan “ 5 siam” dalam rilo thun gam…Tapa nan, Kapul dam dara pakat negar, Hội Sinh viên Việt Nam pakat negar jeng hu pok meyaom 68 kareih camin “Anek saih 3 siam”, “Anek Saih 3 pasram megru”, 3 kapol mek hu angan “Kapol Sinh viên 5 siam” saong 96 urang mek hu angan “Sinh viên 5 siam” pakat negar, mek hu giải Patuk bilan sa pakat Negar, daok bac da-a di Ban raya HCM.

Tỉnh Vĩnh Long urak ni hu labaih 29.000 anek saih oh hu jamriak bac online , dalam nan hu labaih 6.500 anek saih sang kan kathaot, jiak kathaot. Hadei di tuk, danak dak “Rayak song komputer brei ka adei” hu peih ngak, urak ni, taong abih anek saih sang kan kathaot, jiak kathaot hu komputer piah bac online . Min, dom anek saih kan kandah oh dok dalam sarak boh sang kathaot, jiak si kathaot oh ka hu komputer bac online dok biak rilo. Tuk vak anak tal, Sở pato megru tỉnh Vĩnh Long pasang iek veik piah dong samar ka dom adei hu pandap bac daa .

Công an Đồng Nai birau chap hu kapol nyaom ngak pandap, kaya mbang ja biak praong, pasang iek 16 labik, chap mek hu labaih 10 tấn pandap ja mek angan labik danei angan. Dahlau di nan, di Ban Biên Hòa hu dom janih kaya mbang, pandap panda danei angan, nan lac dom janih jabon papah khan ao, menyek mbang, ia yamen, bột ngọt, ia mesir, ba-ar…mboh yau ngak ja. Page harei kabroi 5/1, kapol urang jakar brei pasang iek sumu abih 16 labik ngak tabiak, pablei salih di dom huyện Định Quán, Trảng Bom, Thống Nhất, TP Biên Hòa (Đồng Nai) saong TP.HCM. Taong abih, dom labik nan pandap panda oh hu harak ba-ar chứng từ saong oh thau meng halei mai. Langiu di nan, công an daok duah mboh rilo mac jamraih piah tame paok, ao papaoh, nhãn mác piah ngak pandap ja…Taong abih pandap nan hu tauk pacang sir piah peih praong bruk duah thau, langyah tui hukum karja.

Hãng thông tấn Triều Tiên KCNA brei thau, Triều Tiên bahrau ngak iek hu jak jeng tên lửa siêu thanh dalam adit ni song pamong njauk labik. Ni lac mbang cuh camereip di Triều Tiên kuhria meng bilan 10 meng bloh, gaok bruk oh njuak hatai di Hàn Quốc, Mỹ song Japon. Mintri Ngoại giao Mỹ brei thau, bruk ngak iek nan nyu suan haong rilo sarak di Hội đồng Bảo an Liên hợp quốc song ba tal bruk srau kadau ka dom taneh ia dok jiak tapen di Triều Tiên song bhap bini dunya , saong hu panuac ieu Triều Tiên hu mbaok tame ginum biai. 

Kadung jien dunya (IMF) meda khan brei thau bruk kahria mboh dahlau Patagok kinh tế dunya di harei 25/1, suai jang sa adit dut saong bruk ba tabiak kayua jit ruak Covid-19 rah tabiak sraw kadau. Dahlau di nan (IMF) brei thau, rilo kuhria mboh meda biar jang bruk kuhria dahlau patagok kinh te dunya di bilan Sa kayua dom bruk kandah pambuak tal biến thể Omicron. Bilan 10 thun 2021, IMF kuhria bruk patagok kinh te di dunya lac 5,9% di thun 2021 saong 4,9 % dalam thun 2022.

Dom uranaih njauk tame sang iek ruak Covid-19 dok tagok rilo di Mỹ, abih di nyu lac dalam tuk biến thể Omicron dok pambak khang di grauk labik dalam negar. Dom uranaih mboh lac dương tính song Covid-19 tapa dut iek, min biak rilo uranaih tame sang iek ruak kayua dom biến chứng meng Covid-19. Tiến sĩ Mác Cờ-lin, Akaok sang iek ruak Nhi đồng Niu Óc-lin, bang Lui-di-a-na brei thau, mboh yau menuac urang daok kham merat patrun tanut trak damak di janih ruak ni ngan song uranaih . Rilo urang ndom lac Covid-19 “oh jhak hagait” ka uranaih, min anak meta mboh lac oh yau nan./.

Urang lang: Hani Pha – Bhumi – 06/01