Urang nong dok pala padai pajiah piah pablei ka drak pasa 

Anak bruk rah tabiak srau kadau di jit ruak COVID-19, ban Hải Phòng hu brei ngak dom bruk samar drah ka pacang caga jit ruak pambuak tal dom urang njom COVID-19 dalam ban. Tui nan, brei padang bhum pacang cakak di 3 labik pambuak tal dom urang njom COVID-19. Ban sit Hải Phòng jeng patagok bruk brei pa-atah di gauk tui sarak ka 16/CT-TTg di xã Hoàng Động - huyện Thủy Nguyên; phường Dư Hàng - quận Lê Chân saong palei Kim Sơn - xã Lê Thiện, huyện An Dương dalam 15 harei, meng mon 6 biar harei 22/02/2021.

Urak ni, dom janih pajaih padai đặc sản saong padai pahe mbaih di Sóc Trăng hu doanh nghiệp, urang pablei salih blei khang ngan haong yaom glaong piah pablei dalam taneh ia saong pablei tabiak negar langiu. Ong Nguyễn Thành Phước, akaok Chi cục pala drak saong khik caga phun pala Sóc Trăng, brei thau: meng dahlau tal hadei di tết nguyên đán, darak pasa brak pahe đặc sản biak chreih chrai, oh ginup piah pablei tết. Padai pahe đặc sản tuk halei jeng daok di tanut glaong abih. Padai ST24, ST25 yaom pablei 7.500-7.700 đ/kg. Dom janih pajaih padai paha mbaih yau ye OM4900, RVT, Đài Thơm 8…yaom pablei meng 6.800 đ/kg tal 7.200 đ/kg.

Harei 22/2, CA ban sit.Biên Hòa (t.Đồng Nai) cap khik yaok pluh rabau pandap hu asal meng Mỹ blei tame Việt Nam min oh hu harak gar hagait, hu duah mboh di sa gilang daok dalam ban sit. Di labik pablei salih 158/7, khu phố 5B, phường Tân Biên, ban sit Biên Hòa (t. Đồng Nai) kayua ong Đào Doãn Dự (49 thun, daok di ban sit Biên Hòa) ngak po, CA mboh hu yaok pluh rabau pandap karei di gauk, yau ye: mỹ phẩm, jru tavao, khan ao, takhaoh dép, đồng hồ, camin meta… oh hu harak gar brei thau ka asal di pandap ini. Tapa duah thau, CA mboh lac taong abih pandap di gilang hu ba meng Mỹ mai Việt Nam.Ini lac dom pandap kayua tuai di Việt Nam kakei blei meng blah facebook Shop Mơ Đào kayua amuk Đào Thị Thanh Mơ (sa-ai kumei di ong Dự) livestream pablei online meng Mỹ.

Urang jaka tỉnh Quảng Ninh hu tabiak bruk taong phat 5 triệu đồng sa urang ba khau tin ja, oh njauk di mangaok Facebook. Urang bruk ba tagok, chia sẻ khau tin ja, oh njauk di mangaok mạng xã hội Facebook lac Nguyễn Đình S, ndik tapui thun 1988, daok di puk 8, xã Nguyễn Huệ, ban sit Đông Triều, Quảng Ninh.Ni lac urang ba khau tin ja,oh njauk ka var huak dalam labik brei daok karei di mangaok blah Facebook di drei. Di jabat Công an, Nguyễn Đình S. hu taduan bruk ngak suan di drei, gam tui di nan jeng yah klaak dom asak kadha ba tagok mạng xã hội saong sanya lac oh ba tagok dom khau tin ja oh njauk dreih yau nan.

Dom harei hadei di mbang padeih Tết 2021, dom labik hu rilo bruk prai paku di TPHCM hu mboh veik yau ye di tatua An Phú Đông 2, canah klau Vườn Lài (quận 12); canah 4 Bà Điểm (huyện Hóc Môn); jalan roya 1 (labik tapa KCN Tân Tạo, phường Tân Tạo A, quận Bình Tân); labik meng tatua Bình Phước tal jalan Võ Thị Thừa (jaik quận 12 haong ban Thủ Đức). Yaom lac urang jakar hu peih bruk pasang iek, pataom mek paku, min mbiah tal urak ini, bruk prai paku oh ka trun takik, meyah oh khin ndom lac rilo jang. Bruk ini hu meng rilo thun tapa, abih di nyu lac dom harei lễ, ngak ka bhap bini biak pandik hatai, kayua lingiu di khut drap ar, nyu daok mbuan ba tal bala, ba tal rambus atau metai lahik urang nao jalan.

Mintri jien padai Mỹ harei kabroi tabiak bruk taong phat 2 urang par akaok bol lin Myanmar, lac Trung Tướng Moe Myint Tun –akaok lục quân dahlau deih saong Tướng Maung Maung Kyaw – Tư lệnh không quân. Tui bruk taong phat, dom drap ar di Mỹ di dom urang ni njauk kareih abih mayah hu saong rahra negar Mỹ meda oh hu nao ngak bruk haong dom urang ni. Dalam sa panuac brei thau, mintri jien padai Mỹ brei thau, bol lin Myanmar njauk ngak salih veik dom bruk ngak jaik di ini, ngak pasiam rajaei hu pilih ruah dân chủ”. Mayah oh hu, mintri ni meda oh huac hagait ba tabiak veik dom harak taong phat karei.

Urang dang akaok gah Y tế dunya (WHO) Ghebreyesus harei kabroi (22/2) brei thau, danak dak vắc-xin Covax hu mbaok di labaih 190 taneh ia, taduan hu panuac sanya pabak 2 tỷ mbang dahlau di puac thun 2021 saong meteh dalam 2 tỷ mbang nan, lac brei ka 92 taneh ia hu jien meta takik saong mbiah. Min danak dak ini daok dang anak bruk mbuan jaoh jaleih anak dom kan kandah gah jien padai saong labik pabak vắc-xin.

Thủ tướng Anh Boris Johnson harei 22/02 hu pathau khan jalan ngak di negar ni piah tah klaak harak adat pacang cakak dalam labaih 3 bilan tapa, ngan haong bruk peih pambang gilac sang bac saong labik main, pahat rup di langik langiu meng akaok bilan 3/2021.Anak mata, meng harei 8/3, abih tih dom sang bac di Anh meda hu peih pambang gilac. Dom bruk pahat rup di langik langiu jeng hu peih veik. Min, hu rilo bruk ngak patakik karei meda hu khik veik saong meda hu rajaei Anh brei ngak tui 4 tanut tukvak, tui nan dom cửa hàng, bilik pahat rup njauk cang tal harei 12/04, hadei di tuk padeih Phục sinh meng hu peih veik./.

Urang lang: Thu Thảo -Mousaphuong -23/2