Kapul urang lamaok Quốc hội tỉnh Đắk Lắk hu alin 16 anek saih di sang bac Tiểu học Nơ Trang Lơng, xã Cư ÊBur, ban Buôn Ma Thuột 

Urak ni, gah jalan mbak daok samar ngak ka nyu salah bruk pilih ruah urang buh jien tame, urang thầu padang ngak piah meda samar peih ngak gam 3 danak dak jalan cao tốc Bắc-Nam bahrau hu salih jalan buh jien tame dalam bilan 9/2020. Tui kuhria, tal puac thun 2025, Mintri jalan mbak meda ba tame pandar 3.858km jalan cao tốc (dalam nan hu 2.084km jalan cao tốc Bắc-Nam meng Lạng Sơn tal Cà Mau); danak dak padang mblang kapar haoh dunya Long Thành saong jalan cao tốc Bắc-Nam gah timur meda lac 2 danak dal pabak prein khang patagok ka taneh ia dalam dom thun anak tal.

Tui Sở Lao động Thương binh saong Xã hội ban Đà Nẵng, urak ini hu labaih 24 ribau urang ngak hu angan dalam harak daong jien abih tih jaik 24 tỉ đồng. Yaom daong ka urang ngak njauk padeih harak pambuak bruk, urang hu harak pambuak bruk min oh ginup kadha piah tadaun jien daong lahik bruk ngak; urang ngak oh hu harak pambuak bruk, lac 1 trieu đồng sa urang sa bilan. Langiu di nan, ban meda daong dom urang mbang tui sarak di Hội đồng bhap bini ban Đà Nẵng ka bruk peih ngak dom jalan pasiam veik saong patagok kinh tế xã hội.

Piah daong ka anek saih bangsa takik bhum biak kan kandah, di akaok thun bac bahrau 2020 – 2021, Kapul urang lamaok Quốc hội tỉnh Đắk Lắk hu alin 16 paok jien bac, yaok paok yaom  1 triệu đồng brei ka 16 anek saih di sang bac Tiểu học Nơ Trang Lơng, xã Cư ÊBur, ban Buôn Ma Thuột saong hu alin 60 sruh radiahh joak, yaom 1,8 triệu đồng/ sa sruh ka anek saih bangsa takik pakat 2 saong pakat 3 di xã Ea Drông (thị xã Buôn Hồ), xã Dur Kmăl (huyện Krông Ana), xã Cư Êwi (huyện Cư Kuin). Nan lac dom xã bhum atah bayah, xã biak kan kandah, hu rilo urang bangsa takik.

UB bhap bini tỉnh Lâm Đồng brei thau lac hu harak tacei pato dom gah pambuak tal brei patagok bruk pasang iek, langyah catang dom bruk padang ngak, caik rup patau suan hukum di dom labik rivang main dulich di tỉnh. Birau ini, tỉnh Lâm Đồng mboh hu dom doanh nghiep, labik ngak dịch vụ, dulich buh jien tame padang ngak, caik rup patau saong dom bruk karei oh njauk tui adat hukum. Dalam nan, hu bruk oh njauk haong adat cambat, tanarakun, ilamu meng kan, sajarah dakrai di taneh ia saong bhum palei, ngak haduh hatai manuac sia, tuia damuai saong bhap bini pak nan.

Paih padang thaot binguk “Huế- Kinh đô aw atah Việt Nam”, gah ilamo tỉnh Thừa Thiên- Huế daok padang veik dom siam gheih meng kan di aw tah ngũ thân ka likei. Bruk Sở ilamo Thể thao tỉnh Thừa Thiên Huế bahrau brei ka taong abih urang jaka, urang ngak bruk di Sở cuh aw tah meng kan dalam harei som akaok adit yaok bilan daok ba mai rilo panuac ndom karei di gauk. Min, ong Phan Thanh Hải, Giám đốc Sở ilamo Thể thao tỉnh Thừa Thiên Huế brei thau, Sở Văn hóa- Thể thao meda lac kapul nao dahlau yaih khan blah aw tah ngũ thân, oh njauk di kumei bo gam likei urang jaka di Sở. Sở ni jeng daok pasang iek saong padang ngak harak brei angan ka aw tah meng kan lac inem mek ilamo oh maong mboh pakat negar; anak tal lac pok panuac kakei UNESCO brei angan lac inem mek ilamo oh maong mboh lambaok ka manuac sia.

Tui dom roh duah di Australia, tui kuhria hu labaih 10 trieu nding nyuk hu bhap bini negar ini pandar yaok harei. Daok di dunya, takik di abih 8 triệu tấn pandap nhựa tuh tame dom tasik praong yaok thun. Meyah bruk nan daok rah tabiak, tal thun 2050 meda hu rilo hareik thải nhựa jang ikan dalam dom tasik praong.

19 võ sỹ Xu-mô Nhật Bản dalam nan hu 18 urang mai meng lò võ Ta-ma-noi hu dut iek mboh dương tính haong virus SARS CoV-2 dalam tuk daok dom harei tra lac giải Gran Xu-mô meda peih tabiak di tại Tô-ki-ô. Gah thông tấn Ki-ô-đô ndem lac, taong abih 28 võ sỹ di  lò võ Ta-ma-noi meda njauk ba tabiak truh giải dalam nan hu gam võ sỹ  Phu-gia-du-ma, 33 thun, urang daok dang di  2 xu-mô di Nhật Bản. Min, yaom lac hu rilo võ sỹ njauk njom Covid-19, bruk pacacah Gran Xu-mô jeng hu peih tabiak di harei 13/9. Pacacah Gran Xu-mô meda dui atah 2 adit di sang pacacah praong, daok hu tal 11 ribau urang. Dahlau nan, di Nhật Bản, sa mbang pacacah xu-mô tui kuhria peih tabiak dalam bilan 5 njauk brei klak kayua jit praong Covid-19.

Meng harei som adit anak (14/9), pakauk oh brei pataom gauk mengaok 6 urang di labik Inh-lần di negar Anh. Tui nan, adat birau nan hu pandar gam dalam sang jeng yau langiu langik. Yau nan min, oh pandar ka dom labik yau: sang bac, jabat ngak bruk atau dom labik lakhah, ndam padhi saong dom janih môn pasram rup pabha tui kapol nyaom ngak njauk tui bruk pa-atah di gauk. Thei ngak suan bruk ba tabiak nan njauk taong phạt 100 bảng Anh, sumu labaih 3 trieu dong. Jien taong phạt meda tagok dua mbang, glaong abih lac 3 ribau 200 bảng, sumu jaik 96 trieu ndong./.

Urang lang: Thu Thảo – Ái Nghiêm – 12/09 12:08:26