Pathau mikva saong taong abih gauk! di tỉnh Ninh Thuận, dalam tuk uraniah  kurang labik me-in ye rilo labik tuk padang ngak dom thiết chế văn hóa di puk palei ye oh sangka tal bruk caik taneh piah ngak bruk ini. Yaok thun tuk bilan hè tal mai, dom uraniah oh thau duah halei hu labik me-in jaik sang drei saong lagaih hong pren yava, hatai takre di drei. Thúy Linh – urang vak di rayo sap ndom VN daok di ban Hồ Chí Minh hu kadha vak brei thau ka bruk ini di huyện Ninh Phước, tỉnh Ninh Thuận – labik hu ralo anek kamuan bhap bini Chăm daok.

Yaok thun tuk bilan hè tal mai, baoh sang saai Vạn Thị Hoa daok di palei Hiếu Lễ, xã Phước Hậu, huyện Ninh Phước, tỉnh Ninh Thuận biak duh hatai kayua oh hu labik me-in brei ka uranaih. Langiu dom harei nao bac thêm, dom anek di saai tok di iek tivi. Tal harei puac adit atau hu tuk nao ban Phan Rang – Tháp Chàm, saai Hoa kham merat pajeng anek nao tal dom labik me-in ka nyu bui sambai. Saai Hoa khan lac:

 “Labik me-in ka uranaih di bhum palei lac oh hu,, ralo meng lac pataom di huyện saong tỉnh. Boah sang halei kaya meng hu điều kiện brei ka anek nao me-in”

Oh ta-eng hagaih baoh sang saai Hoa, bruk kurang mblang me-in siam mekre ka uranaih jeng lac bruk dom amaik ame urang Chăm dak di huyện Ninh Phước duh hatai tuk bilan hè mai. Kurang labik me-in bat al oh takik dom uranaih eng drei nao me-in, pataom gauk jeng kapul nyaom tabiak kraong, craoh menei bloh metai blung ia atau dom bala rah tabiak bo oh hu bruk tui iek di amaik ame. Tui amuk Trần Thị Yến Thu – Phaok akaok Ủy ban bhap bini xã Phước Thuận: kuhria eng thun 2016 saong akaok thun 2017, dalam xã hu 4 uranaih metai kayua mblung ia. Anak bruk pandik harao yau nan, karja xã daok pasang iek, duah quỹ taneh piah padang ngak labik me-in siam mekre ka dom adei. Amuk Yến Thu brei thau:

 “Ndom ka bruk uranaih meng thun 2016 hu rah tabiak bruk metai blung ia, dalam nan di palei Phước Lợi hu3 urang, di akaok bilan 3 hu sa urang lac adei bac tal 1. Kayau amaik ame nao ngak mbang atah oh hu thei iek glang nan ye metai blung ia. Anak bruk ini, UB xã jeng hu payua harak công văn saong ba tabiak jalan ngak  ka dom palei, dom sang bac. Ngan saong bruk padang ngak mblang me-in siam mekre ka dom adei ye gah puk palei jeng daok dalam tukvak padangngak mblang me-in ka dom adei di palei Thuận Hòa meng  darak pasar klak. Daok palei Hiệp Hòa mek labik pambu padai piah ngak mblang me-in ka dom adei”. 

Tui dom bruk di danak dak bruk ngak negar ka padang ngak palei pala barau,  bruk padang ngak sang ilamu bhap bini  brei hu mblang thể thao, mblang me-in giải trí piah ngak labik sinh hoạt, paglaong văn thể mỹ ka bhap bini. Min tal urak ini, hu oh takik puk palei daok di tỉnh Ninh Thuận, sang ialmu hu padang ngak khang kajap, min ralo meng piah ka hội họp, sinh hoạt di bhap bini, daok bruk ka uranaih biak takik kayua oh hu pandap me-in, oh hu tapuk báo… Dom labik hu tu tapuk, thư viện ye ralo meng lac tapuk báo klak, tapuk brei ka thiếu nhi kurang, oh peih pabah mbang gam gam. Urak ini, yaom lac dom puk palei jeng daok hu bruk ieu dom doanh nghiệp, urang ngak pahala buh jien piah padang ngak dom labik me-in siam mekre ka thiếu nhi di puk palei tui jalan xã hội hóa. Min, jalan ngak ini oh hu pachreih tui rilo. Ong Lưu Văn Nhạc – Phaok akaok Ủy ban bhap bini xã Phước Thái brei thau:

 “Piah padang ngak hu labik me-in brei ka dom adei, klah metai blung ia, brei hu bruk jak ba meng ralo gah doanh ngiệp, dom urang ngak pahala…”

Urak ini, dalam tỉnh Ninh Thuận hu labaih 10 sang thiếu nhi, pasak hoạt động thanh thiếu nhi. Min tok di hu dom adei thiếu nhi daok di dom labik thành thị, dom huyện jaik dom labik me-in ini meng hu lagaih piah tame me-in. Dom adei thiếu nhi daok di bhum palei pala, meda lac oh hu labik me-in giải rí. Nan ye, Dom pakat, dom gah chức năng tỉnh Ninh Thuận njauk duah sa jalan ngak lagaih yau: paglaong kein laba bruk pandar dom thiết chế ilamu hu mbiah ngak jeng sa mblang me-in siam mekre; kham merat ieu dom doanh nghiệp hu mbaok tame xã hội hóa labik me-in ka uranaih palei pala, daong ka dom adei patagok taong abih saong hu sa bilan padeih hè bui sambai, chreih chrai./.