Ong Huỳnh Tấn Hưng takre puac tapuk, báo

Prong tagok dalam sa baoh sang ngak nong kan kathaot, ong Huỳnh Tấn Hưng, umo 63 thun daok di ấp 8, xã Mỹ Lộc, huyện Tam Bình, tỉnh Vĩnh Long biak takre puac tapuk, báo. Ong bhian pato dom urang anek di drei saong anek kamuan dalam palei lac "hu ilamu nan lac hu taong abih" saong njauk puac tapuk piah ka ilamu puac oh njauk klaak van tui thun bilan. 

Hu ame tacei ba, 5 dalam 7 urang anek di ong Hưng hu bac tamat đại học saong hu rai diuk tani tanat. Taong abih dom urang anek jeng pachreih tui bruk ngak siam brei ka bol bhap rah ra di ong meng bruk brei tapuk, tạp chí, báo... saong daong jien ka ong piah pabak tapuk ka  gilang tapuk hu sa oh hu dua di bhum taneh ngak padai in. Hadei di yaok mbang yuak padai saong paik baoh kayau, hadiuk pasang ong Hưng jeng cai pandar kali kalih piah hu jien blei tapuk, blei báo duh ka urang puac tapuk.

Urak ini gilang tapuk Tứ Hưng daok hu jaik 9.000 baoh tapuk duh ka bhap bani, rilo abih nan lac truyện tranh, tapuk brei ka uranaih, giáo khoa, ilamu ngak nong... Urak ini yaok harei hu meng 40 tal 50 urang puac tapuk mai duah taom ong. Dom anek saih di dom sang bac Tiểu học Cái Ngang, THCS Cái Ngang, sang bac THPT Phan Văn Hòa yaok harei jeng vaih tapa njim tapuk mai sang. Hu dom urang karei puac tapuk di labik angaok yaok pluh baoh kik, baoh yuan hu ong  buh jien tabiak blei caik ka dom urang puac tapuk.

Adei Võ Thị Quyên Thanh, anek saih sang bac THCS Cái Ngang ndom lac: "Gilang tapuk di ong Hưng hu rilo tapuk gheih saong hu yaom glaong. Langiu di bruk puac tapuk, báo, tạp chí di sang bac, di gilang tapuk huyện Tam Bình, khaol dahlak bhian mai ini duah thau, roh duah rilo janih tapuk biak hu kein laba. Ong tuk halei jeng pachreih khaol adei sangka tal ilamo puac tapuk.

Yaok harei, ong Hưng daok hu vak pataom veik dom khau tin njauk caik hatai piah puac angaok loa di baoh sang, daong ka bhap bani hu thau. Gam haong nan ong daok tari taring tiếp âm rayo papar sap dalam dom van page, jala pandiak, biar harei piah pabak hatai caong thau di bhap bani. Ong ngak meng hatai takre pambak prong tri thức ilamu tal taong abih bol bhap rah ra.

Thun 2008, ong tut angan tame pakacah "Tu tapuk baoh sang" kayua TPHCM peih ngak saong mek hu giải đặc biệt. Bahrau ini di bilan 5/2019,  gilang tapuk di urang ngak nong ini, lac jabat duy nhất di bhum taneran kraong CL hu palih ruah pok brei angan naih gheih abih saong taduan mek hu harak pok meyaom di Mentri Ilamo padhih saong rivang ma-in meng hu rilo rik daong brei ka ilamo puac saong duh ka bol bhap rah ra. Ong Phạm Hoàng Hảo, Phaok akaok Pasak ilamo bac megru dalam bol bhap rah ra xã Mỹ Lộc, huyện Tam Bình, tỉnh Vĩnh Long brei thau: Ini lac gilang tapuk tư nhân duy nhất dalam bhum taneran kraong CL kuhria tal tukvak ini, rik daong tame bruk pambak prong yaom glaong meng dom baoh tapuk sit tal bol bhap rah ra./.

Urang lang: Jasi-10/8