Palei di nghe nhan Đàng Quang Dũng daok di palei Cam caklaing My Nghiep, ban sit Phuoc Dan, huyen Ninh Phuoc, tinh Ninh Thuan, bhum palei ini daok khik hu ralo kadha tamia Cam. Thun ini sa-ai 55 thun. Ndih tapui saong paraong tagok dalam bangsa Cam takre ilamu nghe thuat bangsa meng kan mai, sa-ai Dũng oh thau meng tuk halei dom ragam tamia Cam njom tame rilo darah di drei, tok hadar tuk daok sit umo 12 thun, sa-ai meda thau tamia dom ragam tamia di harei rija roya bhap bini drei. Meng bruk takre nan ngak brei sa-ai hu jak jeng samar tui jalan nghe thuat. Praong tagok sa-ai Dũng hu pato pasram dalam Kapul daoh tamia Thuan Hai urak ini lac Kapul daoh tamia tinh Binh Thuan. Hadei di nan, sa-ai tame Ban raya Ho Chi Minh bac tal mbien ndao tamia kayua Nhà giáo ưu tu Bá Thái pato. Thun1992, bac tamat, sa-ai tame ngak bruk di Kapul daoh tamia bhap bini Ninh Thuận. Mbiak tal thun 1994, sa-ai tame veik Ban raya Ho Chi Minh ngak bruk di sang uranaih quan 5, lac akok khoa thẩm mỹ nghệ thuật, pato tamia saong đạo diễn.
30 thun tapa, likei dam Đàng Quang Dũng thun halei nan hu jeng urang nghe nhan danei angan hu rik prein yawa daong ka ilamu Cam. Sa-ai hu paneh tabiak rilo ragam tamia Cam hu mikva Cam saong dom kapul nghe thuat tamia di ralo labik dalam dom harei roya Cam yau Kate, Ramưwan…saong dom harei roya praong di Viet Nam. Sa-ai hu padang kapul daoh tamia bangsa Cam “ Hương Champa” saong hu mbaok tame pakacah rilo mbang di ban raya saong dom labik karei. Dom mbang pataom daoh tamia, sa-ai jeng mek hu giải, abih di nyu nan lac huy chương ameh ragam tamia “ Trống hội palei Cam”, huy chương pariak harei pataom rayo papar binguk pakat negar di danak dak daoh tamia “ Tháp nắng quê hương”, daoh tamia “apui ranam”, giải A kadha tamia “ Ribau bingu paling Wa Ho” di Festival bangsa Cam pak Hanoi…Tui sa-ai Dũng, urang Cam hu labaih 80 ragam tamia. Ngan saong urang Cam, daoh, tamia bhap bini hu makna biak praong. Jaik abih dom ragam tamia, kadha daoh di urang Cam hu pambuak tal dom adat cambat, rija roya. Yaok kadha daoh, ragam tamia bhap bini hu sa makna karei di nyu min taong abih jeng brei mboh bruk ngak mbang daoh dang jeng yau dom caong khin di urang Cam hu payua tal po yang likau chraong daong. Tamia daok rik tame ngak brei harei rija, roya chreih chrai jang. Labaih 30 thun pambuak saong bruk daoh tamia bhap bini, bruk sa-ai daok haduh hatai urak ini nan lac oh hu thei patui jalan. Sa-ai Dũng khan yau ini: "... Dahlak kham ngak habar oh brei ilamu daoh tamia bhap bini Cam lahik nao"
Ong Nguyen Minh Tân, Pho akok Sang uranaih quan 5, Ban raya Ho Chi Minh taong yaom ka sa-ai Đàng Quang Dũng yau ini:
" Nghe nhan Đàng Quang Dũng lac urang abih hatai oh lac ka ilamu Cam bo daok hu ilamu dom bangsa karei. Abih di nyu, sa-ai biak sangka tal bruk patoa veik ragam tamia Cam ka dom rairah dam dara, ini lac sa bruk ngak hu makna biak praong, rik tame biak ralo dalam bruk khik ramik ilamu bangsa."
Ngan saong dom bruk rik daong di drei, nghe nhân Đàng Quang Dũng jeng sa dalam dom urang nao dahlau dalam bruk khik ramik saong patagok dom ilamu hadah krah di nghe thuat tamia Cam./.
Viết bình luận