Labaih sa bilan dahlau, ông B’Đam Minh daok di palei 3, xã Đông Giang, huyện Hàm Thuận Bắc, tỉnh Bình Thuận daok bui sambai tuk maong mboh jaik 3 ha tangei di apuh sang drei tamuh hijao siam saong daok caong sa bilan jaoh hu rilo tangei. Yau nan  min, tal tuk jaoh tangei, yaom lac phun tangei tabiak ndo bak apuh, min takik asar, gaok ndo mai oh hu asar halei:“ Dahlak sahaneng lac kayua hajan ralo ba tal yau nan, daok bruk pala nyu yau gauk abih. Kayua pajaih APC 999 angaok kadung vak lac pajaih diuk hu di pandiak bo thun ini hajan rilo tal tuk tabiak mbuk ye njauk ruak yau nan ye khat lahik rilo. Sang dahlak dom thun dahlau hu pluh dom tấn, daok thun ini trun jaik 60 -70%, hu 5  - 6 tấn min.”

Jeng oh mbluak hagait jang sang ong B’Đam Minh daok di palei 3, sang amuk K’Thị Đa daok di palei 6, xã Đông Giang thun ini jeng gaok bilan tangei khat lahik.  Amuk pandik hatai lac: “Bilan tangei thun ini Pasak dịch vụ bhum ceik tỉnh buh brei dahlau pajaih, khak drak, jien piah ngak. Jaik abih dom sang dalam palei pala pajaih tangei ini. Thun ini pala oh njauk, ndo tangei oh hu asar, amuk Đa nao jaoh pataom mai sang hu hasit”: “ Sang dahlak pala 2 hecta, hu buh brei dahlau khak, pajaih labaih 40 trieu đồng. Urak ini tangei bruk abih. Kayua hajan rilo atau kayua pajaih jeng oh ka thau. Dahlak pala pajaih PAC 999. Tangei jaoh mai sang blaoh, bruk abih oh hu asar.”

Oh lac ta-eng sang muk Đa, ông Minh, yaok rituk hecta apuh tangei di dom baoh sang karei dalam xã Đông Giang jeng gaok yau nan. Tui ong K’Văn Vền, Phó AKok UB bhap bini xã Đông Giang, huyện Hàm Thuận Bắc, tỉnh Bình Thuận, palei daok pasang iek, duah thau dom khat lahik di vụ tangei ini. Tal urak ini, hu 51 baoh sang ngan saong taneh pala labaih 67 hecta gaok khat lahik, rilo meng lac pala pajaih tangei PAC 999. Daok Jabat Ngak nong saong patagok palei pala, Pasak khik caga phun pala huyện Hàm Thuận Bắc,tapa pasang iek, taong yaom hu panuac lac kayua pajaih tangei PAC 999 mbuan ruak tuk langik tasik oh lagaih. Ong K’ Văn Vền brei thau:“Hadei di tuk ngak bruk jeng yau duah thau hatai caong di mikva  ye rilo baoh sang biak kan kandah dalam bruk bayar jien buh brei ngak dahlau. Thun ini khat lahik meng 70 tal 80%. Thun blaoh hu 12 tấn min thun ini daok 4 tấn. Xã jeng hu pok panuac likau UB bhap bini huyen, UB bhap bini tỉnh hu jalan daong meneing ka mikva.”  

 Tui Pasak Dich vu bhum ceik tỉnh Bình Thuận lac labik buh brei dahlau khak drak, pajaih, pandap pandar ngak nong saong blei veik kaya nong di urang bangsa takik daok di bhum glaong di tỉnh, thun 2018 Pasak ini buh brei ngak dahlau  2.000 ha tangei lai saong tui kuhria blei veik hu 7.000 tấn tangei asar. Min kayua gaok khat lahik, tal urak ini Pasak tok blei hu labaih 4.000 tấn  yaom 3.300 – 3.600 đồng sa kilo. Ong Nguyễn Văn Chi, Akok Pasak Dịch vụ bhum ceik tỉnh Bình Thuận lac:“Thun ini, langik tuk hajan tuk pandiak oh lac di Hàm Thuận Bắc, bo Hàm Thuận Nam, Bắc Bình jeng gaok khat lahik. Anak meta hu daong ka mikva pajeng ba tangei nao pablei, pablei hu du halei ye bayar ka mikva du nan. Daok hadei ini, meyah sang halei jaoh tangei bloh bo oh ginup jien bayar sraiy ye pasak likau angok brei tavak veik sraiy. Thun hadei buh brei ka mikva ngak veik piah hu jien bayar sraiy ka Karja.”

 Ngan saong mikva urang bangsa takik di bhum glaong tỉnh Bình Thuận, tangei hlai lac phun pala piah duah jien tame. Bilan tangei khat lahik jeng hu makna lac mikva daok dang anak bruk eik lipa. Yaom lac langik hajan pandiak oh lagaih meda ngak kan kandah tal bruk pala drak di mikva, min chât lương asar pajaih jeng njauk iek veik. Hu yau nan meng caong patrun hu tal tanut biar di abih dom khat lahik, daong ka mikva sahanang hatai pala drak, tani tanat raidiuk./.