Saai Tân nao tal yaok baoh sang bhap bini di ban sit likau dom khan aw klak piah alin ka dom ranaih di bhum ceik

Ndom ka bruk bui sambai tuk saai taduan hu harak meyaom di Thủ tướng rajaei kayua naih ghieh dalam bruk bac megru saong ngak tui jalan hadah krah siam mekre di Hồ Chí Minh, saai Tân brei thau: “dahlak ngak bruk pahla mboh biak bui sambai kayua ni lac sa bruk pachreih ba drei kham marat jang saong dom rai hadei nao tui jalan di dahlak meda klah rabha anit ranam tal dom manuac gaok kan kandah”.

Thun 2014, saai padang kapul Pambuak talei anit ranam ngan haong bruk ngak lac cakak mbuk oh mek jien ka dom adei ranaih daok dalam puk palei bhum ceik. Saai lac: “yaok bilan, kapul nao tal yaok xã daong ka mikva. Kayua oh hu jien nan ye bruk ngak di kapul lac nao tal yaok baoh sang bhap bini di ban sit likau dom khan aw klak piah alin ka dom ranaih di bhum ceik”. Hadei di ni, saai hu mbaok tame kapul ngak pahla karei saong bac hu ilamo, meng nan jak ba hu rilo urang ngak pahla.

Labaih 7 thun tapa, kapul ngak pahla “Pambuak talei anit ranam” di saai hu Tân jak ba hu jaik 4 tỷ đồng daong ka dom sang kan kandah di huyện Trà Bồng, saai hu daong ka anek saih matui madar, kuac bingun di sang bac.

Saai Tân brei thau: “dahlau deih dahlak bhian pambuak haong urang pahla daong dom pandap yau ye mì tôm, brah, khan aw … min anak tal dahlak duah daong dom pandap ka mikva pandar dalam sang yau ye gaok glah, jam panyin, daok anek saih, sang bac ye meda daong kuac bingun saong mac halang ia, pandap pandar ka anek saih”.

Saai khan lac: “rilo thun kak kajap haong bhum ceik, dahlak mboh dom var huac di dom adei biak kurang, kayua yau nan ye dahlak duah dom menuac ngak pahla daong var huac hu ralaow ka dom anek saih”. Saai hu jak ba dom urang ngak pahla di TPHCM daong var huac ka dom anek saih, pambuak haong saai dalam bruk cakak mbuk oh mek jien, alin khan aw saong ia tasau.

Muk Lê Thị Hồng Hải, akaok ban Tuyên giáo Huyện ủy Trà Bồng brei thau, saai Tân biak njauk taduan hu harak meyaom kayua dom bruk ngak pahla di saai. Ban Tuyên giáo Huyện ủy Trà Bồng mboh hu hatai anit ranam di brei ka bhap bini saong anek saih bhum ceik daok kan kandah./.

Urang lang: Thu Thảo – 17/05