Urang Cam An Giang cuk siuk pabang mbaok tuk tame sang megik

Bhap bani Cam Islam tỉnh An Giang urak ini hu jaik 17.000 urang, daok pataom gauk di 9 puk Cam, dalam 5 huyện, bal sit. Dalam tuk jit ruak Covid-19, hu bruk tacei pato di Mban Agama Raja-ei, Mentri Y tế, Mban lambaok urang Islam tỉnh An Giang, bhap bani urang bangsa Cam dalam tỉnh peih ngak siam jalan brei daok atah gauk, peih ngak siam 10 panuac kakei di Mentri Y tế yau: takik tabiak jalan tuk oh hu bruk hagait njauk nao; khik rup babhap ka nyu hacih sa-at, cuk siuk pabang mbaok tuk tabiak jalan, brei thau y tế. Dom urang nao bac  negar langiu atau hu mbaok dalam dom bruk ngak agama di Malaysia, tuk mai veik puk palei, mikva hu khan brei thau gah y tế, hu brei daok karei pataom sa labik.

Ong Haji Jacky, Akaok mban lambaok urang Islam tỉnh An Giang brei thau, tuk raja-ei hu jalan peih bruk brei daok karei, brei daok atah gauk, MBan Lambaok hu pathau khan ka jalan ngak ini tal taong abih 9 puk Cam dalam tỉnh saong mikva agama thei jeng ngak siam jalan ngak ini.

Ong Haji Jacky daok brei thau lac: “Tui adat cambat, yaok adit tame mon 12 jala pandiak harei Suk, taong abih urang Islam pataom gauk di sang megik piah sambahyang. Min, tuk hu bruk brei daok atah di gauk, mikva oh daok pataom gauk dalam sang megik bo sambahyang pak sang. Taong abih kuan mbang huak, cà phê dalam puk kareik pabah mbang abih, padeih pablei dalam tukvak jit ruak.

Phaok akaok UB bhap bani xã, Phaok akaok mban pacang caga jit ruak Covid-19 xã Châu Phong Nguyễn Văn To brei thau: Xã hu peih bruk pathau khan ka 15 Hakim saong na-ib di 4 sang megik, 11 surao ka dom kanjah jhak di jit ruak  Covid-19 saong jalan pacang caga, tacei pato mikva brei thau gah y tế ngan haong dom urang gilac veik puk palei meng bhum jit saong dom urang meng labik karei mai ; jak ba 4 baoh sang dalam puk (caga ngak lakhah ka anek) oh ngak ndam lakhah dalam tukvak ini. Taphia di nan, puk palei peih ngak siam bruk khik iek urang Việt Nam meng negar langiu mai, urang negar langiu daok dalam puk palei, meng hu yau nan bo bruk njaom mbaak dalam puk palei oh ka rah tabiak”.

Tui Mban lambaok urang Islam tỉnh An Giang, dalam tỉnh urak ini hu 247 baoh sang kathaot saong 288 baoh sang jaik kathaot. Dom harei tui bruk pa-atah di gauk, rilo baoh sang urang Cam gaok biak rilo kan kandah. Anak bruk yau nan, rilo baoh sang urang Cam hu mbang rik daong jien padai piah daong brei urang kan kandah. Bahrau ini, Mban lambaok urang Islam tỉnh An Giang hu peih bruk alin brei 588 pok pandap ka 588 baoh sang urang Cam di 6 sang megik, kuhria tabiak yaom jien lac jaik 165 triệu đồng, kayua ong Mách Du Số, urang Cam quận Phú Nhuận, TP. Hồ Chí Minh alin brei.

Amuk Ro Phi Ah, daok di xã Châu Phong, bal sit Tân Châu, tỉnh An Giang khan lac: “dahlak biak drut droi tuk taduan hu bruk daong ba di mikva urang Cam dalam puk. Paok pandap ini hu daong ka sang dahlak trun meneing kan kandah dalam bilan jit”.

Sa hatung hatai pacang caga jit ruak Covid-19, bhap bani Cam An Giang gam ngak siam bruk pa-atah di gauk, gam jhul khang bruk daong ba gauk. Dom bruk ngak hu makna ini hu rik daong haong taneh aia pasang iek siam jit ruak Covid-19 dalam tukvak anak tal./.

Urang lang: Jasi-28/4