Thau hu kein laba di Danak dak padang ngak palei pala bahrau, mikva Cam di Bình Thuận ba gauk rik pren yava tame ngak jalan mbak nao mai dalam palei pala. 

Dalam sa tukvak katut panak, rilo jalan mbak di palei Cam, xã Phan Hòa, huyện Bắc Bình, tỉnh Bình Thuận hu tuh bê-tông. Meng akaok palei tal jhung puk, labik halei jeng mboh mikva chreih chrai ginum biai bruk ngak jalan. Sa-ai Văn Thị Hạnh daok di palei Bình Thắng, xã Phan Hòa khan lac: tuk nao nyom, pang mehit ka danak dak padang ngak palei pala bahrau, ndom ka bruk ngak jalan, tuk camereip oh ka thau cambaih nan ye mikva oh ka mbak carak lô. Hadei nan, thau hu kein laba saong yaom glaong di danak dak, mikva biak njauk hatai pachreih tui saong sang dahlak jeng yau nan: ."Kol dahlak rik tame 30%. Caong ka jalan hu ngak samara, tal bilan hajan klah gluh baok. Sang halei hu jien ye buh sa mbang bloh, daok oh hu ye rik tame 2 mbang, yaok mbang 300 ribau đồng min" – sa-ai Hạnh lac.

Mikva Cam daok di Phan Hòa biak pachreih tui bruk xã hội hóa ngak jalan palei pala. Rilo sang halan hatian brei taneh, yah paga, yah sang ging… piah ka jalan hu laneng lanoi jang. Ong Văn Sĩ Khánh – urang pan akaok UB bhap bini xã Phan Hòa brei thau: tỉnh, huyện daong 65%, daok veik mikva rik tame. Tui tanut ba tabiak, thun 2012, xã njauk ngak 300 mét jalan bê-tông, gar praong 4 mét. Tuk peih ngak, thei jeng abih hatai pachreih tui nan ye ngak hu 672 mét, rilo jang tanut ba tabiak".

Oh ta-eng hagait mikva Cam palei Phan Hòa, bo rilo mikva Cam daok di dom labik karei dalam tỉnh Bình Thuận jeng biak njauk hatai haong bruk ngak jalan palei pala. Tukvak tapa, xã Phan Hiệp, huyện Bắc Bình hu buh brei jaik 17 tỷ đồng piah ngak jalan mbak dalam palei pala. Tal urak ini, dom jalan nan hu ngak bloh brei ka mikva nao mai. Ta-eng bilan 1 thun ini (2013), dalam xã ngak hu jaik 250 mét jalan tame palei Bình Tiến saong yaom jien abih tih jaik 300 triệu đồng. Amuk Lâm Thị Giàu daok di palei Bình Tiến lac: Jalan ini dahlau deih tuk hajan, ia nyu kandaong, nao mai kan kandah, mboh biak jhak. Urak ini jalan thu, siam, nao mai biak mbuan lagaih. Haci sa-at yau nan, mikva oh bui sambai habar hu". Daok sa-ai Đồng Thông Minh, daok di palei Cam, ban sit Lạc Tánh, huyện Tánh Linh, tỉnh Bình Thuận ndom lac, danak dak ini ba mai rilo kein laba ka bhap bini, abih di nyu nan lac anek kamuan nao bac hu mbuan lagaih: "Taong abih dom jalan palei jeng hu tuh menyek abih. Mboh mbaok meta palei drei karei jang, bhap bini dalam palei uan tabuan lô" – sa-ai Minh bui sambai lac haong kol dahlak.

Ngan saong kadha “rahra thau, rahra ginum, rahra ngak, rahra tui iek”, tal urak ini, bruk ngak jalan mbak palei pala hu peih ngak grauk labik saong hu rilo bhap bini dalam tỉnh Bình Thuận, dalam nan hu mikva urang Cam bui hatian pachreih tui. Yaok pluh ribau mét jalan palei hu tuh menyek, tuh bê-tông, ngak ka mbaok meta palei pala dalam tỉnh hu hadah hadai jang. /.