Ong Lê Văn Lịch, urang Pa Cô daok di palei Ra Loóc- A Sốc, xã Hồng Bắc, huyện A Lưới bahrau ngak lakhah ka anek kumei dalam bui sambai chreih chrai. Ong Lịch brei thau, dahlau daih, urang Pa Cô bhian ngak lakhah rilo harei blaoh ndok lakhah glaong, hu menuac lakhah anek tok pasang tuk daok sit, khin gauk dalam but pajaih. Min urak ini, dom adat cambat nan oh daok tra. Anek kamei di sa-ai bac tamat Đại học nao ngak ka Đoàn 92, huyện A Lưới blaoh tok pasang daok ngak bruk haong gauk:“Đảng, Karja sangka brei thau rilo. Tuk họp, Đảng, karja jak ba mikva meyah hu adat cambat, tanarakun halei oh daok lagaih ye jhui ngak, kham merat ngak mbang. Urak ini, anek bhik ngak lakhah, ngak klaoh panuac jeng ngak sit min. Adat cambat tanarakun meng kan hu salih bahrau biak rilo, oh daok ngak lakhah praong yau dahlau bo ngak sit min”.

Xã Hồng Bắc, huyện bhum ceik A Lưới hu 95% menuac lac urang Pa Cô. Dahlau daih, bruk likei kumei anit ranam gauk min oh jeng diuk jeng pasang hu kayua gah kumei ndok lakhah glaong bhian mboh rilo. Min jeng hu rilo gu, rilo yau tok gauk hu min sraiy meng bruk ndok lakhah glaong ngak ka dua diuk pasang ngak bruk glaih glar yaok pluh thun bo oh bayar abih sraiy. Dom thun jaik ini, hu bruk pathau khan, jak ba di karja, dom mban, ngành, kapul nyaom palei, rilo adat cambat klak oh daok lagaih dak harei dak hu klaak nao. Ong Trần Văn Đôn, Phaok akaok UBND xã Hồng Bắc, huyện A Lưới, tỉnh Thừa Thiên Huế khan lac:“Dom adat cambat klak oh daok siam, oh daok lagaih ye hu klaak nao. Min dom bruk siam, dom ilamu di bangsa drei ye drei khik veik piah cakrok. Adat cambat tarakun bo oh lagaih ye drei klaak nao. Pagap yau ndam lakhah dahlau daih ngak 2 harei, 2 malam, tok hu urang kaya meda meng tok hu diuk, daok urang kan kathaot ye oh ngak truh.

Bruk abih bhap bini jum pataom dak padang raidiuk ilamu lac sa dalam dom asal kadha hu dom pakat, dom gah di huyện A Lưới sangka peih ngak, jeng bruk pambak tabiak dalam bhap bini. Tapa dom bruk ilamu, daoh tamia, thể dục thể thao, dom mbang pathau khan, … dom adat cambat klak oh daok lagaih dak harei dak hu klaak nao. Huyện khik veik hu siam dom kalup kapul “Pacang caga bruk khin gauk tuk daok sit saong khin gauk dalam but pajaih”, kalup kapul “dahlau meng lakhah”, kalup kapul  “urang kumei ndih tapui anek likei saoh atau kumei saoh saong oh ndih tapui anek ka 3 tagok”, kalup kapul “baoh sang haniem phul”....

Thun 2021, ngak tui sarak di Huyện ủy A Lưới, UBND huyện A Lưới tabiak Danak dak “Padang raidiuk ilamu dalam huyện A Lưới, vaktu 2021-2025, pamaong tal thun 2030”. Asal kadha praong lac jak ba peih ngak catang adat ka bruk lakhah, bruk ngak ndam metai saong dom rija, roya, oh mê tín dị đoan. Huyện tabiak adat oh brei ngak lakhah praong, lavik harei, klaak bruk ndok lakhah glaong. Ong Nguyễn Mạnh Hùng, Chủ tịch UBND huyện A Lưới ndom cambaih lac: dom adat ka bruk lakhah, bruk ngak ndam matai hu tacei tabiak cambaih laih piah ka bhap bini mbuan ngak.“Bruk lakhah ye kol dahlak jak ba mikva ngak lakhah dalam siam mekre, hu ilamu, patak pataom. Kol dahlak pachreih mikva meyah ngak  hơp hôn ye tuai ta-a oh tapa 700 tuai, daok adat vu quy saong thành hôn, meng 300 tal 350 tuai, tacei tabiak cambaih laih dalam bruk lakha caga. Meng tuk hu sarak ka bruk pacang cakak, jhul kadun likuk bruk khin gauk tuk daok sit saong khin gauk dalam but pajaih ye dalam 10 thun mai ini, A Lưới oh daok bruk khin gauk dalam but pajaih saong bruk khin gauk tuk daok sit trun bik rilo”.

Bruk njauk ndom tal abih dalam raidiuk bhap bini lac meng tuk peih ngak Danak dak bruk ngak negar cakrok kinh tế - xã hội bhum urang bangsa takik saong bhum ceik tukvak 2021 – 2030, bruk ilamu, daoh tamia di puk palei hu pamedeih tagok, ngak ka ilamu dak harei dak njaom dalam tame yaok baoh sang, yaok urang saong taong abih bol bhap rahra./.