Lac sa urang ky su kong nghe khau tin min lac pabuak haong bruk ngak binguk gambar meng nyom, saai Nguyễn Thanh Tùng daok di huyện Bến Lức, hu dom baoh sahaneng tui jalan karei. Saai pandar kanduh kandaoh mbia, kandaoh ia yamen meng nyom blaoh cih ngak tagok ngak tabiak dom akhar, thaot 2D, 3D hu ba tame dak ngak tabiak dom blah thaot binguk biak gheih.

Saai Nguyễn Thanh Tùng brei thau lac, meng bahrau pataok bruk ngak gaok oh takik kan kandah saong jeng hu tuk ngak oh jeng, alah, min tapi mai meng hatai takre ilamo, saai patui duah jalan ngak bahrau, duah thau, roh duah piah ngak ka bahu. Tal urak ini, saai hu ngak tabiak blah thaot praong sit, pablei hu yaom meng yaok ratuh ribau ndong tal yaok trieu dong. Gam tui di nan, blah thaot saai ngak tabiak jeng hu Cục bản quyền urang ngak brei angan njauk adat ngak tabiak ndap nda pasiam veik meng nyom.

"Anak tal piah duah jalan pablei tabiak ndap nda, dahlak meda pataom prein tame mayaih khan di mangaok dom gah mang xa hoi yau ye tiktok atau facebook…pataom tame dom ndap nda alin. Urak ini hu peih ngak dom adat tut angan ndap nda OCOP, jeng caong maong anak tal hu dom jabat di tinh daong ka dom ndap nda di dam dara peih bruk mbang ngui hu pambuak veik haong urang mai blei abih di nyu nan lac dom mbang mayaih khan parang iek di mbang nyaom biai, darak pasa parang iek,…”

Dahlikan ka bruk duah jalan pablei tabiak dom ndap nda tuk halei jeng lac bruk gaok kan kandah di rilo urang ranaih peih bruk mbang ngui. Saai Nguyễn Hoài Lộc, po labik ngak tabiak ia ce manyum Kombucha meng dom janih baoh kayau di palei Thanh Lợi, xã Đức Tân, huyện Tân Trụ brei thau lac: peih bruk mbang ngui ngan haong dom ndap nda ia manyum caik di kalaok, caik di paca lon hu asal ngak meng baoh kayau, kaya lac oh njauk mbuan kayua darak pasar daok sit. Sahaneng ngak habar piah duah jalan pablei tabiak baoh kayau di urang ngak nong dalam bhum palei, saai hu sahaneng ngak tabiak labik ngak ia manyum. Urak ini dom janih ia manyum kayua saai roh duah, ngak tabiak hu urang ngak nong dalam bhum jia tui tame saong daok kham marat ngak habar piah ka rilo urang thau tal jang. 

Saai Lộc ndem mayai lac, kham marat di adei saai dam dara peih bruk mbang ngui ye thei jeng hu, min tapi darak pasar blei tame lac biak kan, caong hu bruk daong di kanja saong dom jabat meng kein lagaih:  "Yaom lac bahrau ba tabiak darak pasa min hu mikva pak ini pachreih tui lac tani tanat paje, min tapi jeng caong cak rok njom pambak tabiak ndap nda ini tabiak rilo jang. Jalan ba tabiak di drei lac ngak tui jalan OCOP blaoh drei pandar ndap nda, urang ngak dalam bhum palei piah drei pachreih ba ngak tabiak sa ndap nda siam jang piah pablei salih ka dom tinh, ban karei. Mayah darak pasa hu peih praong, ye labik ini meda ba bruk ngak mbang duah jien ka rahra daok pak ini”

Thun 2024 tỉnh meda brei angan ka takik di nyu 30 ndap nda OCOP mek hu meng 3 patuk tagok. Dalam nan, tinh meda caik hatai sangka tal bruk daong ka dom ndap nda angan je, siam lagaih saong hu ngak rilo di dam dara peih bruk mbang dalam ban.

Tal urak ini, ngak mbang blei salih gah ngak nong saong kong thuong tinh hu peih bruk mayaih khan ndap nda OCOP tagok dom san pablei salih online. Gam tui di nan, daong ka dom po ngak tabiak ndap nda OCOP ka ndap nada, mac moc jamraik, padang ngak he thong pasang iek angan je ndap nda. Amuk Lê Thị Lệ, Phaok Yam ndok Sở Công thương tỉnh Long An brei thau: "Sở Công thương bhian hu dom bruk ngak pambuak haong gah parabha daong padang ngak dom labik mayaih khan saong pablei ndap nda OCOP. Blaoh bhian pambuak gauk pablei salih tapa nyaom zalo, dui pachreih ndap nda ka gauk. Abih di nyu nan lac pandar dom ndap nda angan je ini piah ngak pandap alin ka dom doanh nghiep saong bhum palei dalam tỉnh".

Tỉnh Long An daok pandar dom tanut njauk ka labik ngak, dom jamraik khik ramik angan ndap nda piah jhul khang dom bruk pambuak pablei salih – salih saong duah jalan pablei tabiak ndap nda di mangaok web pablei salih online. Dom ndap nda angan je pabak hu dom adat meda hu tinh pambuak ba hu mbaok tame dom sàn saong pasak pablei salih. Langiu di bruk kham marat brei thau yaom glaong di yaok ndap nda, bruk pambuak ini meda daok daong patagok bruk duah jalan pablei tabiak ndap nda, abih di nyu nan lac ndap nda angan je di Long An ./.