Palei Cái Mòi, xa Đất Mũi, huyen Ngọc Hiển, tinh Ca Mau sa palei hu rilo mikva bangsa Khmer. Ong Nguyễn Văn Hiền jeng lac urang bangsa Khmer saong ngak Akaok palei hu 12 thun tapa. Mboh bruk ngak kinh te di rilo baoh sang rahra daok kan kandah, ralo di nyu hu dom baoh sang mikva bangsa takik, ong Hiền hu ndom biai haong urang jakar pakat glaong jang ka bruk peih tal pato pakai bruk ngak, daong phun jien daong mikva uak drei tagok.

Ong Dương Văn Bai baoh sang mikva bangsa Khmer, hu truh kathaot meng bruk daong patagok bruk raong krang darah brei thau:

"Dahlau daih bruk ngak mbang daok ralo kan kandah, blaoh hu karja haong palei daong ka 50kg krang pajaih, jeng tacei ba bruk pasiam danao ia ini daih piah palao raong. Meng 50 kg krang nan bo ngak mbang hu. Tal tukvak ini hulin dahlak jeng daok palao krang, thun halei jeng palao meng nan mboh hu mboh jeng mboh kuran hu kan kandah."

Ong Hiền jeng kham merat duah thau ka dom bruk raong bahrau, hu kein lagaih, ngak iek dahlau piah hu ilamo bruk ngak di drei, yau bruk raong krang sang ong Hiền jeng hu pandar. Ong Hiền jeng lac urang nao dahlau ka bruk “raong lamek” ikan thòi lòi. Ong blei gilac ikan thòi lòi sit di dom urang taong ikan, ba mai raong ikan praong tagok, pablei mek hu jien laba. Dom bruk ngak mbuan, samar daong pasiam veik kinh te baoh sang ini biak mbuan ba tame pandar. Meng nan, mikva hu hatai caong patagok, ong pato tacei tani tanat. Ong daok pambuak haong karja palei daong mikva hu mesre phun jien, patagok kinh te ngak mbang siam lagaih jang saong ong jeng hu urang je tame jang.

Lac urang hu angan je dalam bol bhap rahra urang bangsa takik, ong Hiền tuk halei jeng jak ba rahra ngak siam jalan di Ndang, sarak, hukum di Karja. Langiu di nan, rahra jeng chreih chrai hu mbaok tame bruk dak padang palei pala bahrau, trun kathaot karo kajap, tapa di nan, daong padang bhum palei cakrok patagok jang. Ong Nguyễn Văn Hiền ndom mayai lac: 

"Bruk jaik taphia mikva biak hu yaom glaong, meng nan pathau khan tal mikva ka jalan, sarak karja. Hulin dahlak jeng pang panuac ndom meyai di mikva, blaoh ngak abih tung tian ka bruk ngak piah daong mikva uak rup patagok, sangka hu raidiuk baoh sang. Harei ini, jalan bhum palei, sang bac, balai jeng hu ginup. Daok di gah palei ye hulin dahlak patui veik ndom biai ka UB Bhap bini xa padang dom bruk ngak kinh te cambaih laih, blaoh drei tacei ba mikva blaoh brei mesre phun jien piah patagok kinh te hu siam jang."

Palei Cái Mòi, xa Đất Mũi hu 226 baoh sang rahra, dalam nan hu 40 baoh sang mikva bangsa Khmer. Dahlau daih, dom baoh sang kathaot, jaik kathaot daok glaong jang min dom thun barau tapa mboh tukik jang. Thun ini, hu 6 baoh sang kathaot saong 6 baoh sang jaik kathaot di palei Cái Mòi truh blaoh kathaot, dalam nan hu 4 baoh sang kathaot, 3 baoh sang jaik kathaot urang mikva bangsa takik. Bruk di ong Nguyễn Văn Hiền dalam bruk salih karei gah kinh te, xa hoi di palei hu karja palei taduan. Ong Lâm Quốc Trạch, Phaok akaok UB Bhap bini xa Đất Mũi taong yaom:

"Dalam tukvak masa tapa, ong Hiền jeng pambuak haong karja palei saong Chi mbo palei sangka, bhian brei kein lagaih ka mikva hu hatai caong ngak mbang, patagok kinh te baoh sang. Ong Hiền ngak siam bruk di bhum palei, dalam nan bruk padang palei pala bahrau. Tapa nan, daong tame bruk patagok kinh te, xa hoi di xa drei jeng yau di palei Cái Mòi."

Gam haong labaih 12 thun ngak Akaok palei Cái Mòi, ong Nguyễn Văn Hiền tuk halei jeng brei mboh bruk ngak di drei piah padang hu angan je. Bruk ngak di ong lac tuk halei jeng ba drei ngak dahlau, jaik taphia, iek praong saong pang panuac ndom meyai di rahra piah hu mek hu tung tian rahra, blaoh pathau khan dom jalan, sarak piah rahra thau, rahra ngak. Dom bruk ngak, rik daong di ong hu UB Bhap bini tinh Ca Mau saong huyen Ngọc Hiển alin hadiah rilo harak pok meyaom./.