Meng akaok bilan 12, dom baoh kadai sang kuan, labik jirah rivang di Binh Thuan hu salih bahrau, cang raok sa dalam dom bilan hu takre di abih dalam thun. Yaok labik jeng hu bruk ngak hadah krah piah ka labik biak gheih meta maong saong tanriak hadah sambo bar dui pachreih hatai sambai di tuai damuai.

Phan Thị Anh Thư saong Nguyễn Thị Quỳnh Trâm urang tuai damuai jirah daok tut tangin mek harak di labik me-in Mũi Né, Ban Phan Thiết chreih chrai ndom meyai lac:

“Phun ngo kayau biak hu ralo thaik thaot, hu buh rilo jien tame piah ngak pagheih. Urang cakak hala blaoh gavang talei gom vil taom dal nyu biak gheih.”

“Masa bui sambai No-el thun ini mai biak awal, biak chreih chrai jang dut haong dom thun dahlau. Thun ini mboh urang nao jirah me-in rilo jang. Kuan kadai kaphe dak harei dak peih praong saong ngak pagheih biak drah, drah jang dut haong dom thun dahlau biak rilo.”

Thaik thaot phun ngo kayau, rup ong taha No-el saong anek rasa hu dom baoh kadai sang kuan, labik jirah rivang ramik ngak biak gheih,… Di langik la-an bingi, harei Yang sinh jeng hu ngak gheih ghang jang kayua hu pruh ia kakua ia khan ngak ka bruk ba drei tame di tuai damuai biak chreih chrai.

Di dom labik ini, biak rilo baoh sang mai piah mek thaot binguk. Oh sa janih dam dara blaoh daok hu dom tuai damuai ralo thun umo jeng biak chreih chrai mai main.

Piah duh siam di abih brei ka hatai chreih chrai di tuai damuai khin caong me-in, padeih padei saong salam raok bilan harei raya puac thun, jaik di abih dom resort, hotel pakat meng 3-5 baoh patuk jeng hu peih ngak dom danak dak piah duh ka tuai jirah rivang dalam melam No-el (24/12), harei salam thun bahrau (31/12) yau ye: Melam raya gala dinner, parang iek nghe thuat, pandap mbang bhap bini rahra Viet Nam, pandap mbang Asia – Euro,...

Langiu di nan, dom labik padeih padei di tapen tasik Ban Phan Thiet daok raok tuai damuai meng lagaih di langik tasik, hatai pok glaong tuai damuai di urang anek menuac di ini.

Amuk Lê Thanh Xuân, urang iek glang manuac urang nao mai di labik padeih padei Asteria Mui Ne Resort brei thau:

“Akaok bilan 11 di resort hu peih brei srap gap raok tuai damuai dalam masa tukvak 24/12, 31/12. Urak ini, harei 17/12 hu danak dak raya truac hadah phun ngo No-el, drei jeng hu yaih khan angaok fan page di facebook jeng yau payua ka dom kongti jirah rivang. Patui di nan peih ngak harei Yang sinh ka taong abih tuai damuai daok padeih padei di dalam resort saong patui veik lac harei 23/12 srap gap ka danak dak raok uan thun bahrau 2025”

Tui jabat karja So Ilamo, Padhih saong Jirah tinh Binh Thuan, kuhria bilan Po Jesu trun saong Tet saka ia harei thun barau ini, Binh Thuan raok labaih 65.000 mbang tuai damuai mai tal me-in jirah padeih padei, dalam nan hu labaih 3.000 mbang tuai damuai jirah rivang dunya haong tukvak padeih padei meng 5 tal 7 harei.

Dalam akaok thun, UB Bhap bini tinh Binh Thuan hu harak peih ngak bruk pachrei jirah dalam negar thun 2024 piah ngak tui Danak dak pachreih jirah dalam negar ngan haong kadha “Urang Viet nao jirah rivang Viet – Viet Nam drei anit ranam”.

Tinh Binh Thuan brei ka dom labik, labik ngak mbang gah jirah haong kadha “Pandap gheih ghang – Jirah siam mekre – Harak gar mbuan lagaih – Yaom kaom lap gap pakre– Labik jirah hacih sa-at saong gheih - Labik me-in salamat karo, ilamo siam mekre” ngak jeng sa thaik thaot labik jirah siam gheih ngan haong tuai damuai./.