Di angaok kraong Can Tho, dom harei ini hu rilo sruh gilai kapal prong hadah tanjak gom ngan haong sap adaoh capi bhap bini bhum taneran kraong mekong nagar đờn ca tài từ atau kadha daoh bhap bani pajeng tui tuai damuai nao mai cagar tui tui mbaok ar kraong daok pachreih hu bruk sangka di bhap bani saong tuai damuai. Ini lac pandap panda bahrau ba tame pandar di palei rivang ma-in sinh thai Mỹ Khánh, huyen Phong Điền - Can Tho – hu angan ieu lac Nha hang kadai mbang manyum angaok gilai Mỹ Khánh.

Kadha biak karei di sruh gilai ini dut haong dom sruh gilai di tapen Ninh Kiều nan lac danak dak  -  hu padang ngak tui 2 canah nao mai cagar kraong Can Tho tuk tuai damuai caong khin. Canah 1 meng palei rivang ma-in alam sinh thái Mỹ Khánh tal darak angaok kraong Cái Răng saong canah 2 meng palei rivang sinh thái Mỹ Khánh tal tapen Ninh Kiều. Ngan haong pren pajeng hu jaik 300 urang tuai damuai gam haong rilo bruk daoh take, mbang menyum,…vaktu sruh gilai angaok kraong ini daok brei mek meta tuai damuai tuk nduac tapa dom baoh tatua bahrau hu padang ngak di Can Tho. Sa-ai Trần Thị Thanh Nga, urang tuai mai meng Ban raya Ho Chi Minh khan brei thau:

“Ini ieu lac mbang akaok meti adei hu duah thau nao angaok gilai yau habar, dahlak mboh biak sron mbon saong gheih mekre. Abih di nyu lac tuk mong mboh hu dom baoh tatua gheih mekre yau ini ye drei hu mboh anit ranam ka bhummi drei jang saong hu mboh Cần Thơ lac labik dhua njauk caik ka khaol drei nao jirah rivang ma-in.” 

Yaom lac kaya angui brei ka jirah rivang ma-in di jalan kraong biak prong, biak rilo mada, dom tinh/ban bhum Taneran kraong CL urak ini jeng daok kan kandah dalam bruk pambuak pagam tour haong dom bhum palei, pandap panda rivang ma-in jirah krah di dom puk palei daok oh ka njauk hatai caong khin, binah prong rivang ma-in jalan kraong nan lac roh duah jalan jaik dalam tỉnh saong piah ka nyu biak biai patagok khang kajap ye oh ka ginup.  

Oh lac janih daok kurang gah jalan mbak, kaya mbang main, di luruh luac tukvak masa nao mai angaok kraong aia – dalam nan mbluak di abih nan lac labik mai darak kandon Cái Răng, amuk Lê Đình Minh Thy - Akaok Công ty Vietravel ban Can Tho khan brei thau:

“Khaol drei njauk hu dom sarak, dom jalan ngak biak cambaih laih jang piah meda ngak bahrau jang labik mai jirah ini, piah ka tuai damuai mboh gheih mekre jang, jeng yau caik veik ka tuai damuai dom kadha siam gheih jang tuk mai tal darak kandon Cái Răng.”

Ong Nguyễn Minh Tuấn, Akaok Sở Ilamo – Padhih saong rivang ma-in Ban Can Tho hu panuac lac, tukvak anak tal, Can Tho meda gam haong Ban Ho Chi Minh, 12 tinh di dalam bhum ĐBSCL pambuak bruk haong gauk khang kajap dalam bruk padang ngak daok dang nao mai ket cau hatang ar blang, labik peih ngak mayit di tapen kraong. Langiu di dom canah jalan kraong duah ngak meng Tapen Bạch Đằng, Ban raya Ho Chi Minh ye pambuak pagam jalan kraong daok peih tabiak ka bhum ĐBSCL, jalan peih ngak dom tuyến bahrau tamuh tabiak meng 4 labik dang kreh pasak jao nao mai bahrau nan lac: Pabah lamnge sruh gilai Mỹ Tho - Cái Bè, tinh Tien Giang, Pabah lamnge raok tuai damuai Vinh Long, Tapen gilai pajeng tuai damuai rivang ma-in Can Tho, Tapen gilai rivang ma-in Châu Đốc, tinh An Giang. Ini meda lac 4 tapen bahrau hu si buh jien tame ngak piah cak rok patagok bruk rivang ma-in jalan kraong, daong ka tuai damuai hu duah thau ka nyu siam ralo jang:

“Taphia dom pandap panda rivang ma-in jalan kraong, khaol dahlak hulin jeng pambuak pagam haong dom pandap panda gah ilamo, inem krung. Dak padang dom tour yau nan meda pambuak pagam dom labik inem mek dak rai sajarah, ilamo, labik rivang ma-in gah sinh thái; taphia di nan, ngan haong bruk rivang ma-in ye hu brei thau lac kinh tế dang akaok di Ban Can Tho.”

Tukvak masa anak tal, ngan haong bruk pambuak bruk catang haong gauk di 13 tinh/ban ĐBSCL saong Ban raya Ho Chi Minh dalam bruk pambuak pagam gauk cak rok patagok tour lien tinh, rilo labik mai di ĐBSCL jang yau di Ban Can Tho meda hu brei thau ka janih pandap panda siam gheih di jalan kraong, abih di nyu lac ilamo darak kandon, meng nan paglaong pakhang pren meriak gauk haong dom janih rivang ma-in karei dalam jaman bahrau./.